ދެވަނަ ކުއާޓަރގެ ނިޔަލަށް ވެކްސިން ޕްރޮގްރާމް ނިންމާލެވޭނެ
ރާއްޖެއަށް ޒިޔާރަތްކުރާ ފަތުރުވެރިންނަށް ވެކްސިން ޖަހާނީ ރާއްޖޭގައި ދިރިއުޅޭ އާބާދީއަށް ވެކްސިން ދިނުމަށްފަހު
ޓުއަރިޒަމް މިނިސްޓަރ ޑރ. އަބްދުﷲ މައުސޫމް
ރާއްޖޭގައި ވެކްސިން ޖެހުމުގެ ޕްރޮގްރާމް އަހަރުގެ ދެވަނަ ކުއާޓަރގެ ނިޔަލަށް ނިންމާލެވޭނެކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖޭގެ ފަތުރުވެރިކަމާއި ބެހޭގޮތުން ބީބީސީއަށް ދެއްވި އިންޓަވިއުއެއްގައި ޑރ. މައުސޫމް ވިދާޅުވީ މިއަހަރުގެ ފުރަތަމަ ކުއާޓަރގައި ރާއްޖޭގެ ފަތުރުވެރިކަމުގެ ދާއިރާ ކުރިއެރުންތަކެއް ހޯދާފައިވާކަމަށެވެ. އެގޮތުން ކޮވިޑްގެ ކުރިއާ އަޅާބަލާއިރު މި ކުއާޓަރުގައި ފަތުރުވެރިން އައި އަދަދު 30 އިންސައްތައިގެ ފަރަގަށް ކުޑަކޮށްފައިވާކަމަށް ވިދާޅުވިއެވެ. ރާއްޖޭގެ ފަތުރުވެރިކަން ކުރީގައި އޮތް ހާލަތަށް ނުގޮސް ލަސްވަނީ ރާއްޖޭގެ މައި މާކެޓްތައްކަމަށްވާ ޗައިނާ، ޖަޕާން އަދި ކޮރެއާ ފަދަ ގައުމުތަކުން އަންނަ ފަތުރުވެރިންގެ އަދަދު ދަށްވުމާ ގުޅިގެންކަމަށް ވިދާޅުވިއެވެ. އަދި ހުޅަނގުގެ ގައުމުތައް ފުރަބަންދުކުރުމާއި ދަތުރުފަތުރުކުރުމުގައި ގިނަ ހުރަސްތަކެއް ހުރުމުންކަމަށް ވެސް ޓުއަރިޒަމް މިނިސްޓަރ ވިދާޅުވިއެވެ.
ރާއްޖެއަށް ޒިޔާރަތްކުރާ ފަތުރުވެރިންނަށް ވެކްސިންދިނުމުގެ ޕްރޮގްރާމާއި ގުޅޭގޮތުން ވާހަކަދައްކަވަމުން މިނިސްޓަރ ވަނީ "ވިޒިޓް، ވެކްސިނޭޓް، ވެކޭޝަން" މި ޕްރޮގްރާމް ފެށުމަށް ރާވާފައިވަނީ މިހާރު ރާއްޖޭގައި ދިރިއުޅޭ އާބާދީއަށް ވެކްސިން ދިނުމަށްފަހު ކަމަށް ވިދާޅުވެފައެވެ. އެގޮތުން ވެކްސިން ޖެހުމުގެ ޕްރޮގްރާމް ދެވަނަ ކުއާޓަރގެ ނިޔަލަށް ނިންމާލެވޭނެކަމަށް ލަފާކުރެވޭކަމަށް ވިދާޅުވިއެވެ. މިހާރު ރާއްޖެއަށް އަންނަ ފަތުރުވެރިން ނެގެޓިވް ނަތީޖާއާއެކު އައުމުގެ ހުއްދަ ދީފައި އޮތްނަމަވެސް ކުރިއަށް އޮތް ހަފުތާއެއްހާ ދުވަހުގެ ތެރޭގައި ވެކްސިންގެ ޑޯޒް ފުރިހަމަ ކޮށްގެން ރާއްޖެއަށް އަންނަ ފަތުުރުވެރިންނަށް ހުއްދަދެއްވާނެ ކަމަށް ވިދާޅުވިއެވެ.
މިނިސްޓަރ ވިދާޅުވީ، ފަތުރުވެރިކަމުގެ ދާއިރާގައި ހަރަކާތްތެރިވާ 90 އިންސައްތަ މުވައްޒަފުން ވެކްސިން ފުރަތަމަ ޑޯޒް ފުރިހަމަ ކޮށްފައިވާ ކަމަށާއި، ރާއްޖެ އަންނަ ފަތުރުވެރިންނަށް ވެކްސިން ދިނުމުގެ މައިގަނޑު މަގްސަދަކީ، މި ހާލަތުގައި ރާއްޖެއަށް ނާދެވިފައި ތިބި ފަތުރުވެރިންނަށް އެ ފުރުސަތު ދިނުން ކަމުގައެވެ. އެހެންނަަވެސް ވަކި ތާރީޚެއް ކަނޑައަޅަން އެނގޭނީ ރާއްޖެއަށް ވެކްސިން ލިބެމުން އަންނަ މިންވަރަށް ބަލާފައިކަމަށް މިނިސްޓަރ ވިދާޅުވިއެވެ.
މިއަހަރު ފެށުނު ފަހުން ރާއްޖެއަށް އަންނަ ފަތުރުވެރިންގެ އަދަދު އަންނަނީ އިތުރުވަމުންނެވެ. ޖެނުއަރީ މަހު ރާއްޖެ އައިސްފައި ވަނީ 92,103 ފަތުުރުވެރިންނެވެ. އަދި ފެބްރުއަރީ މަހު ރާއްޖެ އައިސްފައި ވަނީ 96,882 ފަތުރުވެރިންނެވެ. މާރޗް މަހު ޖުމުލަ 109،585 (އެއްލައްކަ ނުވަހާސް ފައްސަތޭކަ އައްޑިހަ ފަހެއް) ފަތުރުވެރިން ރާއްޖެއަށް ޒިޔާރަށްކުރި ކަމަށް ތަފާސްހިސާބުތަކުން ދައްކައެވެ. މިއީ 13 އިންސައްތައިގެ ކުރިއެރުމެކެވެ.
