ހަނދާންވަނީ ބައްޕާފުޅު ގެއަށް ބަދަލުކޮށްދިނުމަށް އެދި ބޮޑުބޭބެއަށް ކުރި އާދޭސް - ޔުމްނާ
ބައްޕާފުޅު ޖަލުބަންދުގައި ހުންނަވަނިކޮށް އާލާސްކަންފުޅާ އުޅުއްވާތީވެ ގެއަށް ބަދަލުކޮށްދޭން އެދުނީ
ޔުމްނާ މައުމޫން - ހަނދާނަށް އަންނަނީ ބައްޕާފުޅު ގެއަށް ބަދަލުކޮށްދިނުމަށް އެދި ބޮޑުބޭބެ އަރިހުގައި ދެންނެވި އާދޭސް
ރައީސް ޔާމީން ގެއަށް ބަދަލުކުރުމުން ހަނދާނަށް އަންނަނީ ބައްޕާފުޅު ގެއަށް ބަދަލުކޮށްދިނުމަށް އެދި ބޮޑުބޭބެ އަރިހުގައި ދެންނެވި އާދޭސް ކަމަށް ރައީސް މައުމޫނުގެ ދަރިކަނބަލުން ޔުމްނާ މައުމޫން ވިދާޅުވެއްޖެއެވެ.
އެއީވެސް ރޯދަ މަހެކެވެ. ޓެރަރިޒަމްގެ ދައުވާ އުފުލައި ކުރީގެ ރައީސް މައުމޫނު ހުންނެވީ ޖަލު ބަންދުގައެވެ. ރޯދަ މަހަށް ގޭ ބަންދަށް ބަދަލުކޮށް ދިނުމަށް އެމަނިކުފާނުގެ އަނބިކަނބަލުން ނަސްރީނާ އިބްރާހިމް ކްރިމިނަލް ކޯޓާއި ޕީޖީގައި އެދިވަޑައިގެންނެވިއެވެ. ޕީޖީ އަށާއި ކްރިމިނަލް ކޯޓަށް ވަކިވަކިން ފޮނުއްވި ސިޓީގައި ވިދާޅުވެފައި ވަނީ މައުމޫން އަކީ މިހާރު އުމުރުފުޅުން 80 އަހަރަށް ވުރެ ގިނަ ދުވަސްވެފައިވާ ބޭފުޅެއް ކަމަށާއި އެކަމުގެ ސަބަބުން އެމަނިކުފާނު ތަފާތު ސިއްހީ މައްސަލަތައް ކުރިމަތިވެފައިވާ ކަމަށެވެ. އަދި ވާޓިގޯގެ ސަބަބުން އެމަނިކުފާނަށް އެ ބަލީގެ އުނދަގޫތައް ކުރިމަތިވެ އަނބުރައިގަނެގެން ވެއްޓުމާއި ޒަރޫރީ ބޭނުންތައް އެކަނި ނުކުރެވޭނެ ފަދަ ހާލަތަކަށް މައުމޫންގެ ހާލުކޮޅު ގޮސްފައިވާކަން ނަސްރީނާގެ ސިޓީގައި ވަނީ ފާހަގަ ކުރައްވައިފައެވެ.
އެފަދަ ހާލަތެއް މައުމޫންއަށް ކުރިމަތިވެފައިވާ އިރު، މި ރޯދަ މަހުގެ ތެރޭގައި އެމަނިކުފާނު އާއިލާއާ ދުރުގައި ޖަލުގައި ބެހެއްޓުމަކީ މައުމޫންގެ ހާލަތު އިތުރަށް ގޯސްވެދާނެ ކަމެއް ކަމަށް ނަސްރީނާ ވަނީ ފާހަގަކުރައްވާފައެވެ. އަދި ރޯދަ މަހުގެ ތެރޭގައި އެމަނިކުފާނަށް އާއިލާގެ އެހީތެރިކަން ނުހަނު ބޭނުންވާނެ ކަން ވެސް ނަސްރީނާގެ ސިޓީފުޅުގައި ފާހަގަކުރައްވާފައިވެއެވެ.
އެހެންނަމަވެސް އޭރު ވެރިކަމުގައި ހުންނެވި ރައީސް ޔާމީން މިކަމަށް އިޖާބައެއް ނުދެއްވައެވެ. ސިޔާސީ ގޮތުން ހައްޔަރުކޮށްފައިވާ ބޭފުޅުންނަށް ލުއި ދޭ ވާހަކައަށް ތަކުރާރުކޮށް ދެއްވަނީ އެއް ޖަވާބެކެވެ. " އެމަނިކުފާނު ކޯޓުތަކަށް ނުފޫޒު ނުފޯރުވަމޭ" މިހެންނެވެ.
2018 ވަނަ އަހރުގެ ފެބްރުއަރީ މަހުގެ 5 ވަނަ ދުވަހު ކުއްލި ނުރައްކަލުގެ ހާލަތު އިއުލާންކޮށް، ރައީސް މައުމޫން ހައްޔަރުކުރީ ސަރުކާރު ވައްޓާލަން ރޭވުމާއި ފަނޑިޔާރުންނަށް ރިޝްވަތު ދިނުމުގެ ތުހުމަތުގައެވެ. އޭގެ އިތުރުން ހެކި ނައްތައިލުމުގެ ދައުވާ ކޮށްދިނުމަށް އެދި ފުލުހުން ވަނީ ޕީޖީގެ އޮފީހަށް ފޮނުވައިފައެވެ. އެކަމަކު އެންމެ ފަހުން އެ މަނިކުފާނުގެ މައްޗަށް އުފުލާފައި ވަނީ ޓެރަރިޒަމްގެ ދައުވާއެވެ.
މިހާތަނަށް އެންމެ ގިނަ ސިޔާސީ ވެރިން ޖަލު ބަންދަށް ގެންދިޔަ ސަރުކާރަކަށް ރައީސް ޔާމިންގެ ސަރުކާރު ވާނެކަން ޔަގީނެވެ.
ރައީސް ޔާމީން ގެއަށް ބަދަލުކުރަން ނިންމާފައިވާކަން ހާމަކުރުމާއެކު، ޔުމްނާ މައުމޫނަށް އެދުވަހުގެ ހަނދާންތައް އާވިއެވެ. ވިދާޅުވީ، ރޯދަމަހެއްގެ ތެރޭގައި ބައްޕާފުޅު ޖަލުބަންދުގައި ހުންނަވަނިކޮށް އާލާސްކަންފުޅާ އުޅުއްވާތީވެ ގެއަށް ބަދަލުކޮށްދޭން، ޢާއިލާގެ ފަރާތުން، އެތައް ފަހަރެއްގެ މަތީން އެދެމުން ދިޔަ ހަނދާންތައް އާވާކަމަށެވެ.
ޔުމްނާ މައުމޫނަށް އޭރުގެ އަނިޔާވެރިކަމުން ކޮށްފައިވާ އަސަރު މި ޓްވީޓުން ވަރަށް ފުރިހަމައަށް އެނގެއެވެ. ބައްޕާފުޅުގެ ހައްގުގައި ބޮޑުބޭބެއަށް ކުރި އާދޭހުގެ ހަނދާންތައް އަދިވެސް ތާޒާކަންމަތީގައި ހުރިކަން ހާމަވެއެވެ. ބޮޑުބޭބެގެ އަނިޔާވެރިކަމުގެ ހިތި ރަހަ އަދިވެސް އަރު ތެރޭގައި ހުރިކަން ޔަގީންވެއެވެ.
ރައީސް މައުމޫން ގެއަށް ބަދަލުނުކުރުން އެކަންޏެއް ނޫނެވެ. ދޫނިދޫގައި ބަންދުކުރިތާ 40 ދުވަސް ފަހުން 2018 ވަނަ އަހރުގެ މާޗް މަހުގެ 20 ވަަނަ ދުވަހު ބަންދުގެ މުއްދަތު އިތުރުކުރުމަށް މާލެ ގެނެސް ގާތްގަނޑަކަށް ހަތް ގަޑިއިރު ވަންދެން ކޯޓުގައި ބޭންދުމަށްފަހު ބަންދުގެ މަޖިލިސް ކެންސަލް ކުރިއެވެ.
އޭރު ރައީސް މައުމޫނު އާއިލާއިން ކުރި އާދޭހަށް ކޮއްކޯފުޅު ރައީސް ޔާމީން ބީރުކަންފަތެއް ދީ ނިންމާލީ އިންސާފުގެ ކުރިމަތީގައި އެންމެން ހަމަހަމަވާނޭ ބުނެއެވެ. އެހެންނަމަވެސް މިއަދު އެތައް ދައުވާއެއް އުފުލާފައިވާ އަދި ހުކުމެއް ތަންފީޒުކުރަމުން އަންނަ ބޭފުޅެއްގެ ސިއްޙީ ހާލަތަށް ބަލައި ރޯދަމަސް ނިމެންދެން ގެއަށް ބަދަލުކުރީއެވެ.
