ކޮވިޑް-19ގެ ދިފާއުގައި ވެކްސިނުގެ ދެވަނަ ޑޯޒް ޖެހި މީހުންގެ އަދަދު ލައްކައަކާ ގާތަށް ޖެހިލައިފިއެވެ.

އެޗްޕީއޭއިން ބުރާސްފަތި ދުވަހު އާންމުކުރި ތަފާސްހިސާބުތައް ދައްކާގޮތުން 5،709 މީހުން ވަނީ ވެކްސިން ޖަހާފައެވެ. އޭގެ ތެރެއިން 982 މިހުންނަކީ ވެކްސިންގެ ފުރަތަމަ ޑޯޒު ޖެހި މީހުންނެވެ. އަދި ދެވަނަ ޑޯޒު ޖެހީ 4،727 މީހުންނެވެ.

ވެކްސިންގެ ފުރަތަމަ ޑޯޒު ޖެހި މީހުންގެ ތެރެއިން މާލެ ސަރަހައްދުން ވެކްސިން ޖެހީ 343 މީހުންނެވެ. އަދި އަތޮޅުތެރެއިން 639 މީހުންނެވެ. ދެވަނަ ޑޯޒު ޖެހި މީހުންގެ ތެރޭގައި ގިނައީ އަތޮޅުތެރެއިން ވެކްސިން ޖެހި މީހުންނެވެ. އެއީ 2،794 މީހުންނެވެ. މާލެ ސަރަހައްދުން ވެކްސިން ޖެހީ 1،933 މީހުންނެވެ.

މިއާއެކު ވެކްސިން ޖެހި މީހުންގެ ޖުމްލަ އަދަދު ވަނީ 295،251ށް އަރާފައެވެ. އަދި އޭގެ ތެރެއިން ދެވަނަ ޑޯޒު ޖެހީ 97،339 މީހުންނެވެ.

މިދިޔަ ފެބްރުއަރީ މަހުގެ 1 ވަނަ ދުވަހުން ފެށިގެން ރާއްޖޭގައި ވެކްސިނޭޝަން ޕްރޮގްރާމް ކުރިއަށްގެންދާއިރު ދެވަނަ ޑޯޒު ޖަހަން ފަށާފައި ވަނީ މި މަހު ކުރީކޮޅުއެވެ. ދެވަނަ ޑޯޒު ޖަހަނީ ކޮވިޝީލްޑް ވެކްސިންއާއި ސިނޮފަރމް ވެކްސިންގެއެވެ. ދެވަނަ ޑޯޒުޖަހަން ފެށުމާއެކު ވެކްސިން ކިއުތަކުގައި މައްސަލަ ދިމާވެ އެކަމުގެ ރަނގަޅު އުސޫލެއް ނެތި ކަންބޮޑުވުންތައް އިތުރުވެފައިވާތީ އެކަން ހައްލުކޮށްދޭނެ ކަމަށް އެޗްޕީއޭއިން ބުނެފައިވެއެވެ.

ހަލުހިކަމާއެކު ވެކްސިނޭޝަން ޕްރޮގްރާމް ކުރިއަށްދާއިރު ރާއްޖޭގެ އާބާދީގެ ބޮޑު އިންސައްތައަކަށް ވެކްސިން ދެވުމާއެކު ބަލި ކޮންޓްރޯލް ކުރެވޭނެ ކަމަށް ކަމާބެހޭ ފަރާތްތަކުން ވަނީ ލަފާކޮށްފައެވެ. ވެކްސިން ޖެހުމުގެ އުސޫލުތަކަށް ދާދި ފަހުން ބަދަލުތަކެއް ގެނެސްފައިވާތީ އެ ބަދަލުތައް ގެނައީ ރާއްޖެއިން ވެކްސިން ހުސްވާތީ ކަމަށް ބައެއް މީހުން ބުނެއެވެ. އެކަމަކު ހެލްތު މިނިސްޓްރީން ވަނީ އެކަން ދޮގުކޮށްފައެވެ.