ކޮވިޑް-19ގެ ސަބަބުން އަތޮޅުތެރެއިން 23 ރަށެއް މޮނިޓަރިންގައި އެބައޮތް ކަމަށާއި އޭގެ ތެރެއިން ހަ ރަށަކުން 200 އެއްހާ ކޭސް ފެނިފައިވާ ކަމަށް އެޗްއީއޯސީން ބުނެފިއެވެ.

ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އަތޮޅުތެރޭގެ ކޭސްތައް ބަލަހައްޓަވާ އަބްދުﷲ މައުރޫފް ވިދާޅުވީ އަތޮޅުތެރެއިން ބޮޑެތި ކްލަސްޓަރތަކެއް ފެނިފައިވާ ކަމަށެވެ. އޭގެ ސަބަބުން މިހާތަނަށް 23 ރަށެއް މޮނިޓަރިންއަށް ލާފައިވާއިރު އޭގެ ތެރެއިން ހަ ރަށަކުން 100ށް ވުރެ ގިނަ ކޭސް ފެނިފައިވާ ކަމަށެވެ. އެއީ އޭދަފުށި، މާފުށި، ނައިފަރު މަތިވެރި އަދި ވޭމަންޑޫއާއި މާންދޫއެވެ.

މި ހަ ރަށުން ވެސް ފެނިފައިވާ ކޭސްތަކުގެ ތެރޭގައި ގިނައީ ދިވެހިންނެވެ. މި ހަ ރަށުން ޖުމްލަ 732 ދިވެހިން ޕޮޒިޓިވްވެފައިވާއިރު ބިދޭސީން ހިމެނޭގޮތުން ޖުމްލަ 902 ކޭސް ވަނީ ފެނިފައެވެ. އޭގެ ތެރޭގައި ހިމެނެނީ އޭދަފުށިން 119 ދިވެހިންނާއި 2 ބިދޭސީން، މާފުށިން 178 ދިވެހިންނާއި، 31 ބިދޭސީން ނައިފަރުން 125 ދިވެހިންނާއި 5 ބިދޭސީން އަދި މަތިވެރިން 165 ދިވެހިންނާއި 6 ބިދޭސީންގެ އިތުރަށް ވޭމަންޑޫން 137 ދިވެހިންނާއި 8 ބިދޭސީން އަދި މާންދޫން 118 ބިދޭސީންނާއި 8 ދިވެހިންނެވެ. މައުރޫފް ވިދާޅުވީ މި ހަރަށުގެ އިތުރުން ދެން މޮނިޓަރިން އަށް ލާފައިވާ ރަށްރަށުގެ ކޭސް ޖުމްލަ މިހާރު 1200ށް ވުރެ މައްޗަށް އަރާފައިވާ ކަމަށެވެ.

މައުރޫފް މިހެން ވިދާޅުވިއިރު ފާއިތުވި ދެތިން ހަފުތާއެއްގައި އަތޮޅު ތެރެއިން ވަނީ ބޮޑެތި ކްލަސްޓަރތަކެއް ފެނިފައެވެ. އަދި ކޮންމެ ދުވަހަކު ރިޕޯޓުކުރާ ކޮވިޑް-19 ކޭސްތަކުގެ ޖުމްލަ އަދަދުތަކުއް ވެސް އިތުރުކަން ފާހަގަކޮށްލެވެއެވެ.

މީގެ އިތުރަށް މާލެ ސަރަހައްދުން ގިނަ ކޭސްތަކެއް އަނެއްކާ ވެސް ފެންނަމުންދާ އިރު، ކޭސްތައް ކޮންޓްރޯލްކުރުމަށް ވަކި ފިޔަވަޅުތަކެއް އަޅާފައެއް ނުވެއެވެ.

އަދަދުތައް އިތުރުވަމުން އަންނަ އިރު މިހާރު އޮތީ ވެކްސިންގެ ދެ ޑޯޒު ފުރިހަމަކުރުމަށް ފަހު ދަތުރުކުރެވޭނެ ވަކި ޚާއްސަ އުސޫލެއް ކަނޑައަޅާފައެވެ. އެގޮތުން އާބާދީގެ ފަސް އިންސައްތަ އަށް ވުރެ ގިނަ މީހުން ޕޮޒިޓިވްވެފައިވާ ރަށަކުން ދަތުރުކުރާ ނަމަ އެމީހަކު ވެކްސިން ޖަހައިގެން ދެ ހަފުތާ ފުރިހަމަވާން ޖެހެއެވެ. އަދި ނެގެޓިވް ޕީސީއާރް ޓެސްޓެއް ވެސް ހުށަހަޅަން ޖެހެއެވެ. އެގޮތަށް ދެވެނީ އާބާދީގެ 60 އިންސައްތަ މީހުން ވެކްސިން ޖަހާފައިވާ ރަށްރަށަށެވެ.