ރިކޯޑުތައް މުގުރި ޕޮޒިޓިވްވި މީހުންގެ އަދަދު 464ށް
ރާއްޖޭގައި ބަލި ޖެހުނު މީހުންގެ ތެރެއިން 73 މީހުން ވަނީ ނިޔާވެފައި
ކޮވިޑަށް ޓެސްޓު ކުރުމަށް ސާމްޕަލް ނެގުން
ބުދަ ދުވަހު ރާއްޖެއިން 460ށް ވުރެ ގިނަ މީހުން ކޮވިޑް 19 އަށް ޕޮޒިޓިވްވެފައި ވާކަމަށް އެޗްޕީއޭގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން އާންމުކުރި ތަފާސް ހިސާބުތަކަށް ބަލާއިރު އަންގާރަ ދުވަހުގެ އިރުއޮއްސި ހަޔަކުން ބުދަ ދުވަހުގެ އިރުއޮއްސި ހަޔަކާއި ދެމެދު ވޭތުވި ސައުވީސް ގަޑިއިރުތެރޭ ޖުމްލަ 464 މީހުން ވަނީ ކޮވިޑަށް ޕޮޒިޓިވްވެފައެވެ. މިއީ ރާއްޖެއިން މިހާތަނަށް އެންމެ ގިނަ މީހުން ޕޮޒިޓިވްވި ދުވަހެވެ.
ބުދަ ދުވަހު ޕޮޒިޓިވްވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 207 މީހުނާއި އަތޮޅުތެރޭގެ ރަށްރަށުން ޕޮޒިޓިވްވި 146 މީހުންނެވެ. އަދި ރިސޯޓުތަކުން ޕޮޒިޓިވްވި 14 މީހުނާއި ސިނާއީ ރަށްރަށުން ޕޮޒިޓިވްވި 93 މީހުނެވެ. މީގެ އިތުރުން ސަފާރީތަކުން 3 މީހަކު ޕޮޒިޓިވްވެފައި ވާއިރު ހަދަމުންދާ ރިސޯޓަކުންވެސް މީހަކު ޕޮޒިޓިވް ވެފައިވެއެވެ.
އަލަށް ޕޮޒިޓިވްވި މީހުންނާއިއެކު ރާއްޖެއިން ބައްޔަށް ޕޮޒިޓިވްވި މީހުންގެ ޖުމްލަ އަދަދު ވަނީ 29،052ށް އަރާފައެވެ. މީގެ ތެރެއިން 24575 މީހުން ބަލިން ރަނގަޅުވެފައި ވާއިރު އެކްޓިވް ކޭސްތަކުގެ އަދަދަކީ 4396 އެވެ.
ކޮވިޑަށް ފަރުވާ ހޯދަމުންދާ މީހުންގެ ތެރެއިން މިހާރު 122 މީހަކަށް ފަރުވާދެމުން ގެންދަނީ ހޮސްޕިޓަލުގައި އެޑްމިޓްކޮށްގެން ކަމަށް އެޗްޕީއޭގެ ތަފާސްހިސާބު ތަކުން ދައްކައެވެ.
ރާއްޖޭގައި ބަލި ޖެހުނު މީހުންގެ ތެރެއިން 73 މީހުން ނިޔާވެފައިވާއިރު ބުދަ ދުވަހު އެކަނި ވެސް ދެ މީހުން ނިޔާވެފައިވެއެވެ.
ފަހަކަށް އައިސް ބައްޔަށް ޕޮޒިޓިވްވާ އަދަދު ވަނީ ވަރަށް މަތިވެފައެވެ. އެގޮތުން ފާއިތުވި ދެދުވަހު ވެސް 300 އަށްވުރެ ގިނަ މީހުން ޕޮޒިޓިވްވެފައިވެއެވެ.
