އީރާނާއި ގުޅުން ބަދަހިކުރަން ބޭނުންވާކަން ސައުދީން ހާމަކޮށްފި

އީރާނާއި ގުޅުން ބަދަހިކުރަން ބޭނުންވާ ކަމަށާއި އީރާނަކީ ސައުދީގެ އަވަށްޓެރި ގައުމެއް ކަމަށް ސައޫދީ ވަލީއަހުދު މުހައްމަދު ބިން ސަލްމާން ވިދާޅުވެއްޖެއެވެ.

ސައުދީ މީޑިއާއަކަށް ދެއްވިި ބަސްދީގަތުމެއްގައި މުހައްމަދު ބިން ސަލްމާން ވިދާޅުވީ އީރާނަކީ ސައުދީގެ އަވަށްޓެރި ގައުމެއް ކަމަށާއި އީރާނާ ސައުދީގެ ގުޅުންތައް ރަގަޅުކުރުމަކީ ދެގައުމަށްވެސް އޭގެ ސަބަބުން ފައިދާތަކެއް ކުރާނެ ކަމެއް ކަމަށެވެ. އީރާނުގެ އަމަލުތައް ހުންނަ ގޮތުން އުފެދިފައިވާ މައްސަލަތައް ހައްލު ކުރަން މަސައްކަތް ކުރަމުން އަންނަ ކަމަށާއި ދެ ގައުމުން ބާއްވާ ބައްދަލުވުންތަކާއެކު އެކަންކަން ހައްލުވެގެންދާނެ ކަމަށްވެސް ވިދާޅުވިއެވެ.

ކުރިން އީރާނާމެދު ހަރުކަށި ވިސްނުންތަކެއް ސައުދީން ގެންގުޅުނުނަމަވެސް އީރާނާއެކު ގުޅުން ބަދަހި ކުރަން ބޭނުންވާ ކަމަށް ޕްރިންސް މުހައްމަދު ވިދާޅުވެފައި މިވަނީ ދުނިޔޭގެ މީޑިއާތަކުން އީރާނުގެ ވެރިރަށް ތެހެރާނުގައި ސައުދީގެ އިސް އޮފިޝަލުންނާއި އީރާނުގެ އިސް އޮފިޝަލުން ސިއްރު ބައްދަލުވުންތަކެއް ކުރިޔަށް ގެންދާ ކަމަށް ބުނެފައިވަނިކޮށެވެ.

މުހައްމަދު ވިދާޅުވީ އީރާނާއި ދެކޮޅަށް ފިޔަވަޅު އަޅަން ސައުދީން ބޭނުންނުވާ ކަމަށާއި އީރާނު ނިކަމެތިކޮށްލުމަކީ ސައުދީން ބޭނުންވާ ކަމެއް ނޫންކަމަށެވެ. އޭގެ ބަދަލުގައި ސައުދީން ބޭނުންވަނީ އީރާނާއެކު ގުޅުން ބަދަހި ކުރުމަށާއި އިގްތިސާދީ ގޮތުން އީރާނު ކުރިއަރައި އެގައުމުގެ ރައްޔިތުން ތަނަވަސް ކަމުގައި ދިރިއުޅޭތަން ބަލަން ކަމަށް ވިދާޅުވިއެވެ.

ރިޕޯޓްތައް ބުނާގޮތުން ސައުދީން އީރާނާއެކު ގުޅުން ބަދަހި ކުރަން ނިންމީ އެމެރިކާގެ ސިޔާސަތަށް އައި ބަދަލުތަކާއިއެކު އެގައުމުން އީރާނާއި ދެކޮޅަށް އަޅާފައިވާ ފިޔަވަޅުތައް އުވާލައި ނިއުކުލިއާ އެއްބަސްވުމަށް އަލުން ރުޖޫއަވާން ނިންމާނެކަން ޔަގީން ވުމުންނެވެ.