އެމްޑީޕީގެ އިންތިޚާބުގައި ވޯޓުލާ މީހުންގެ ލިސްޓަށް ޝަކުވާ ބަލައިގަތުމުގެ މުއްދަތު އިތުރުކޮށްފި
ޝަކުވާ ހުށަހެޅުމުގެ މުއްދަތު އިތުރުކޮށްފައިވަނީ 30 އޭޕްރީލް ވާ ހުކުރު ދުވަހުގެ ރޭ މެންދަމު 12:00 އާ ހަމައަށް
އެމްޑީޕީގެ ސްޕޯކްސް ޕާސަން އިމްތިޔާޒް ފަހްމީ ނޫސްވެރިންނާ ބައްދަލު ކުރެއްވުން
އަންނަ މެއި މަހުގެ 29 ވަނަ ދުވަހު ބޭއްވުމަށް ހަމަޖެހިފައިވާ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ދާއިރާތަކުގެ އިންތިޚާބުގައި ވޯޓުލާ މީހުންގެ ލިސްޓަށް ޝަކުވާ ބަލައިގަތުމުގެ މުއްދަތު އިތުރުކޮށްފިއެވެ.
ޝަކުވާ ހުށަހެޅުމުގެ މުއްދަތު އިތުރުކޮށްފައިވަނީ 30 އޭޕްރީލް ވާ ހުކުރު ދުވަހުގެ ރޭ މެންދަމު 12:00 އާ ހަމައަށެވެ. 24 އޭޕްރީލުން ފެށިގެން އިންތިޚާބުގައި ވާދަކުރުމަށް އެދި ހުށަހެޅުމުގެ ފުރުސަތު ވަނީ ހުޅުވާލާފައެވެ. ޕާޓީ އޮފީހަށް ފޯމު ހުށަހަޅައިގެންނާއި އޮންލައިންކޮށްވެސް ހުށަހެޅޭގޮތަށް ހަމަޖެހިފައިވާއިރު ކޮންމެ ފޯމަކާއެކު އެ ކެންޑިޑޭޓަކަށް ތާއީދުކުރާ މީހުން ސޮއި ކޮށްފައިވާ އެކްސެލް ޝީޓެއް ހުށަހަޅަން ޖެހޭނެއެވެ.
ދާއިރާއެއްގެ ރައީސްކަމަށް ކުރިމަތިލާނާމަ އެ ދާއިރާއަށް ނިސްބަތްވާ އެމްޑީޕީގެ 50 މީހުންގެ ސޮއި ހަމަކުރަންޖެހެއެވެ. އަދި ޕްރޮވިންސް ނުވަތަ ސިޓީއެއްގެ ރައީސްކަމަށް ކުރިމަތިލާނަމަ 200 މެންބަރުންގެ ސޮއި ހޯދަން ޖެހެއެވެ.
ޖުމްލަ 455 މަގާމަކަށް މެންބަރުން އިންތިޚާބުކުރުމަށް އެމްޑީޕީން ނިންމާފައިވާއިރު އިންތިޚާބުގައި ވާދަކުރުމުގެ ސުންގަޑިއަކީ މެއިމަހުގެ އަށްވަނަ ދުވަހުގެ 4:00 އެވެ.
އިންތިޚާބަށް ކުރިމަތިލާ ކެންޑިޑޭޓުންގެ މަންދޫބުން ކަނޑައެޅުމުގެ ފުރުސަތު މެއިމަހުގެ ނުވަވަނަ ދުވަހުން ފެށިގެން 12 ވަނަ ދުވަހާއި ހަމައަށް އެމްޑީޕީން ވަނީ ހުޅުވާލާފައެވެ. އަދި ހަމަ އެދުވަހު ކެންޑިޑޭޓުންގެ ދާއިމީ ލިސްޓް ނެރެ ކެންޑިޑޭޓް ނަންބަރު އިއުލާނު ކުރާނެއެވެ.
އިންތިޚާބުގައި ވޯޓު ލެވޭނީ 18 އޭޕްރީލްގެ ނިޔަލަށް ޕާޓީގައި ރަޖިސްޓްރީވެފައި މެންބަރުންނަށެވެ. ޝަކުވާތައް ބެލުމަށްފަހު ވޯޓުލެވޭ މީހުންގެ ދާއިމީ ލިސްޓް ނެރުމަށް ހަމަޖެހިފައިވަނީ މެއި މަހުގެ ފަސްވަނަ ދުވަހުއެވެ.
ދާއިރާތަކުގެ އިންތިޚާބުގައި ވޯޓުލުމުގެ ފުރުސަތު ލިބޭނީ އެމްޑީޕީގެ ދަފްތަރުގައި ރަޖިސްޓަރީ ކޮށްފައިވާ މެންބަރުންނަށެވެ. ޕާޓީގެ ދަފްތަރުގައި ޖުމްލަ 93،354 މެންބަރުން ރަޖިސްޓަރީ ވެފައިވާ ކަމަށް އެމްޑީޕީން މައުލޫމާތުދެއެވެ. އެމްޑީޕީގެ މެންބަރުންގެ ލިސްޓް ޕާޓީގެ ވެބްސައިޓްގައި ޝާއިއުކޮށްފައި ވާއިރު އެސްއެމްއެސް ކޮށްގެން ޕާޓީގެ މެންބަރެއްތޯ ބެލޭނެ ކަމަށް އެ އެޕާޓީން ބުނެއެވެ.
މި އިންތިޚާބު ކުރިއަށްދާނީ، ނިމިދިޔަ ލޯކަލް ކައުންސިން އަދި އަންހެނުންގެ ތަރައްގީއަށް މަސައްކަތްކުރާ ކޮމެޓީގެ އިންތިޚާބެކޭ އެއްގޮތަށް، އެޗްޕީއޭއިން ކަނޑައަޅާފައިވާ މިންގަނޑުތަކާއި އެއްގޮތަށް ކަމަށް ވެސް އެމްޑީޕީން ބުނެއެވެ. އިންތިޚާބުގައި ވޯޓުލުން ކުރިއަށް ދާނީ، މެއި މަހުގެ 29 ވަނަ ދުވަހުގެ ހެނދުނު 9ން ހަވީރު ފަހަކާއި ދެމެދުއެވެ.
