ރާއްޖެ ބަދަލުވެއްޖެ، ދެން އެމްޑީޕީ އެހެން ތަނަކަށް ނުގެންދެވޭނެ - ރައީސް ނަޝީދު
ތަރައްގީގެ ވައުދުތަކާއި އެވައުދުތައް ފުއްދުމަށް ހުރި ވިސްނުމަކީ އެމްޑީީޕީގެ ވިސްނުމެއް
މުހައްމަދު ނަޝީދު - އެމްޑީޕީގެ ވިސްނުމަކީ ތަރައްގީގެ ވިސްނުމެއް، މިކަމުގައި ޝައްކެއް ވެސް ނެތް
އެމްޑީޕީ އަނބުރާ އެހެން ތަނަކަށް ދެން ނުގެންދެވޭނެކަމަށް އެމްޑީޕީގެ ރައީސް މުހައމަދު ނަޝީދު ވިދާޅުވެއްޖެއެވެ.
ނ. އަތޮޅު ކައުންސިލް އަދި ރަށު ކައުންސިލް ހަރަކާތްކުރާނެ ގޮތުގެ މަޝްވަރާ ބައްދަލުވުން ފައްޓަވައިދެއްވައި ވާހަކަފުޅުދައްކަވަމުން ރައީސް ނަޝީދު ވިދާޅުވީ، ތަރައްގީގެ ވައުދުތަކާއި އެވައުދުތައް ފުއްދުމަށް ހުރި ވިސްނުމަކީ އެމްޑީީޕީގެ ވިސްނުމެއް ކަމަށެވެ. އަދި އެހެން ބަޔަކަށް މި ވިސްނުން ނޭނގޭނެ ކަމަށް ވިދާޅުވިއެވެ. މިހާރު އެމްޑީޕީގެ ގައުމީ މަޖިލީހުގެ ކެމްޕެއިން މުޅި ރާއްޖޭގައި ފެށިގެން ކުރިއަށްދާ ކަމަށާއި، މުޅި ރާއްޖެ މިއޮތީ ބަދަލުވެފައި ކަމަށް ވިދާޅުވިއެވެ. އެހެންކަމުން ދެން އެމްޑީޕީ އަނބުރާ އެހެން ތަނަކަށް ނުގެންދެވޭނެ ކަމަށްވިދާޅުވިއެވެ.
އެމްޑީޕީ އުފެދި ހިނގަމުން މި އަންނަ އެއްމެ މުހިއްމު މަގްސަދަކީ އަތޮޅުތަކާއި ރާއްޖެ ތަރައްގީ ކުރެވޭނެ ގޮތްތައް ދެނެގަނެ އެގޮތްތަކެއްގެ މައްޗަށް ކަންކަން ހިންގުން ކަމަށް ވިދާޅުވިއެވެ. މިފަދަ މަޝްވަރާތަކުގެ ބޭނުމަކީ ވެސް އަތޮޅުތަކުގައި ލިބެން ހުރި ވަސީލަތްތައް ބޭނުންކޮށްގެން އާއްމު ހާލަތު ރަނގަޅުކުރުމަށް މަސައްކަތްކުރުން ކަމުގައި ވިދާޅުވިއެވެ. އަންނަން އޮތް ޖީލުތަކަށް ތަރައްގީގެ ފަހި ފުރުސަތުތައް ދެމިގެންދާނެ ގޮތްތައް ހޯދަން ޖެހޭ ކަމަށާއި ގާނޫނަށް އިސްލާހު ގެނެވުނީ ވެސް މި ބޭނުމުގައި ކަމަށް ރައީސް ނަޝީދު ވިދާޅުވިއެވެ. އެއީ ރައްޔިތުންނަށް ތަރައްގީ ހޯދައިދިނުމަށް ގެނެވުނު އިސްލާހުތަކެއްކަމަށާއި، ގުދުރަތީ ވަސީލަތްތަކުގެ މިލްކުވެރިކަމާއި، ރަށުގެ ބިން ބޭނުން ކުރާނެ ގޮތް މި ގާނޫނުގެ ދަށުން މިހާރު ކަނޑައަޅާނީ ރައްޔިތުން ކަމަށެވެ.
ކުރިއަށް މިއޮތް ދެ އަހަރަކީ ރާއްޖޭގެ އިގްތިސާދުގައި ބަނަ ދެ އަހަރު ކަމަށާއި، 2019 ވަނަ އަހަރު ހުރި މިންވަރަށް ދައުލަތުގެ އާމްދަނީ އަރާނީ 2023 ގައި ކަމަށް އެމަނިކުފާނަށް އަންދާޒާ ކުރެވޭ ކަމަށް ވިދާޅުވިއެވެ.
ލާމަކަޒީ ނިޒާމު މުހިއްމުވާ އެއް ސަބަބަކީ، އަސްލެއްގެ މައްޗަށް ބިނާވެގެން ނޫނީ މާދަމާ އުޖާލާ ނުކުރެވޭނެތީ ކަމަށާއި، ޕެންޑަމިކުން ދިމާވި ގެއްލުން ފޫބެއްދުމަށް މަސައްކަތް ކުރުމުގެ ފުރުސަތު ލާމަރުކަޒީ ގާނޫނުން ދީފައިވާނެ ކަމަށް ވިދާޅުވިއެވެ.
ސޯޝަލް ސެންޓަރުގައި ކުރިއަށްދާ މި މަޝްވަރާ ބައްދަލުވުމަކީ 2 ދުވަހަށް ބަހާލައިގެ ކުރިއަށްދާ ބައްދަލުވުމެކެވެ.
