ކައުންސިލް އިންތިޚާބުގެ ދެވަނަ ބުރުގައި ހިމެނޭ 11 ރަށުން ރީ ރެޖިސްޓަރ ކުރުމަށް ހުޅުވާލައިފި
ބައެއް ދާއިރާތަކުގެ ނަތީޖާ ޝީޓުގައި މައްސަލަތަކެއް ހުރެގެން އީސީން ބަލާފައިވޭ
ލޯކަލް ކައުންސިލް އިންތިހާބު 2020 ގެ ވޯޓު ގުނުމުގެ ތެރެއިން- އީސީން ވަނީ ނަތީޖާ ޝީޓުގައި މައްސަލަ ހުރި ވޯޓު ފޮށިތައް އަލުން ގުނާފައި
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2020ގެ ދެވަނަ ބުރުގައި ވޯޓުލާން ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމަށް ފޯމު ހުށައެޅުމަށް އިލެކްޝަންސް ކޮމިޝަން (އީސީ) އިން ހުޅުވާލައިފިއެވެ.
އަންގާރަ ދުވަހު އީސީން ކުރި އިއުލާނެއްގައި ބުނީ، މެއި 1 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2020ގެ ދެވަނަ ބުރުގައި ވޯޓުލާން ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލުމަށްޓަކައި ރަޖިސްޓަރީވުމުގެ ފުރުޞަތު އެޕްރީލް 27 ވާ އަންގާރަ ދުވަހުގެ ހެނދުނު 09:00 އިން މެންދުރުފަހު 01:00ގެ ނިޔަލަށް ހުޅުވާލާފައިވާ ކަމަށެވެ. އެގޮތުން މި ފުރުޞަތުގައި ރަޖިސްޓަރީ ވާނީ ހއ. ތަކަންދޫ، ހއ. އުލިގަން، ނ. މަގޫދޫ، ރ. މާކުރަތު، ބ. ކެންދޫ، ބ. ކިހާދޫ، ވ. ފުލިދޫ، މ. ރަތްމަންދޫ، ފ. ދަރަނބޫދޫ، ލ. ކަލައިދޫ ރައްޔިތުން އެކަނިކަމަށް އީސީން ވަނީ ބުނެފައެވެ.
އީސީން ބުނީ، މި މުއްދަތުގެ ތެރޭގައި ރަޖިސްޓަރީވުމަށް އެދި ހުށަހަޅާނީ އެ ރަށްރަށުގެ ތެރެއިން ރަށަކަށް، ނުވަތަ މާލެ އަށް ރަޖިސްޓަރީވެފައިވާ ފަރާތްތަކުގެ ތެރެއިން ރަޖިސްޓަރީވެފައިވާ ތަން ނޫން އެހެން ރަށަކަށް ރަޖިސްޓަރީވާން އެދޭ ފަރާތްތައް އެކަނި ކަމަށެވެ. އަދި މިހާރު ރަޖިސްޓަރީވެފައިވާ ރަށް ނޫން ރަށަކަށް ވޯޓުލާން ބޭނުންނަމަ، މި މުއްދަތުގެ ތެރޭގައި އެމީހަކު ވޯޓުލުމަށް ރަޖިސްޓަރީ ކުރަންވާނެކަން ފާހަގަކޮށް އީސީން ބުނީ، ވިލިމާލެ، ހުޅުމާލެގައި ރަޖިސްޓަރީވެފައިވާ ފަރާތްތައް މާލެއަށް ބަދަލު ކުރެވިފައިވާ ކަމަށެވެ. އަދި މާލެ ފިޔަވާ އެހެން ތަނެއްގައި ރަޖިސްޓަރީކޮށްފައިވާ ނަމަ، އެފަރާތެއް ވާނީ އެމީހެއްގެ ދާއިމީ އެޑްރެހަށް ބަދަލުކުރެވިފައިކަމަށް އީސީން މައުލޫމާތު ދެއެވެ. މިހާރު ވޯޓުލުމަށް ރަޖިސްޓަރީވެފައިވާ ތަނުގެ މަޢުލޫމާތު ކޮމިޝަނުގެ ވެބްސައިޓުން ބަލާލެވޭނެކަމަށް އީސީން ވަނީ ބުނެފައެވެ.
ވޯޓުލާން ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލުމަށްޓަކައި ފޯމު ބަލައިގަތުމަށް ހަމަޖެހިފައިވަނީ އެ ރަށްތަކުގެ ރަށު ކައުންސިލް އިދާރާއިން ކަމަށާއި، މާލޭގައިނަމަ ފޯމު ބަލައިގަންނާނީ އިންތިޚާބާ ބެހޭ މަރުކަޒު ( ބައު ޖަމާލުއްދީން) އިން ކަމަށް އީސީގެ އިއުލާނުގައި ބަޔާންކޮށްފައިވެއެވެ.
އިންތިހާބުގެ ބައެއް ދާއިރާތަކުގެ ނަތީޖާ ޝީޓުގައި މައްސަލަތަކެއް ހުރެގެން އިލެކްޝަންސް ކޮމިޝަނުން ވަނީ އެ މައްސަލަތައް ބަލާފައެވެ. އަދި ނަތީޖާ ކަށަވަރު ކުރުމަށްޓަކައި އަލުން ބައެއް ރަށްރަށުގެ އިންތިޚާބު ބޭއްވުމަށްޓަކައި ވާންޖެހޭ ތައްޔާރީތައް އީސީން ދަނީ ވަމުންނެވެ.
