ވެކްސިން އަގުހެޔޮ ކުރުމަށް އިންޑިއާއިން އަންގައިފި

އިންޑިއާގެ ސެރަމް އިންސްޓިޓިއުޓް އަދި ބަހާރަތު ބަޔޯޓެކުން ކޮވިޑަށް އުފެއްދި ވެކްސިންގެ އަގު ހެޔޮ ކޮށްދިނުމަށް އިންޑިއާ ސަރުކާރުން އަންގައިފިއެވެ.

މި ދެ ކުންފުނިން ކޮވިޑަށް އުފެއްދި ވެކްސިންގެ އަގުހެޔޮ ކުރުމަށް އިންޑިއާގެ މައި ސަރުކާރުން އެދުނީ އެގައުމުގައި ހަލުވި ކަމާއިއެކު ފެތުރެމުން އަންނަ ކޮވިޑުން ރައްކާތެރިވުމަށް ވީހާވެސް ގިނަ މީހުނަށް ވެކްސިން ދިނުމުގެ ބޭނުމުގައެވެ.

އިންޑިއާގެ ބަހާރަތު ބަޔޯޓެކް ކުންފުނިން ކޮވިޑަށް އުފެއްދި ވެކްސިންގެ ޑޯޒެއް 600 ރުޕީސްއަށް ސަރުކާރު ހޮސްޕިޓަލްތަކަށް ވިއްކަމުން އަންނައިރު އަމިއްލަ ހޮސްޕިޓަލްތަކަށް އެކުންފުނިން ޑޯޒެއް ވިއްކަމުން އަންނަނީ 1200 ރުޕީސްއަށެވެ.

އިންޑިއާގެ ސެރަމް އިންސްޓިޓިއުޓުން ކޮވިޑަށް އުފެއްދި ކޮވިޝީލްޑް ވެކްސިންގެ ޑޯޒެއް 600 ރުޕީސްއަށް އަމިއްލަ ހޮސްޕިޓަލްތަކާއި ކުންފުނިތަކަށް ކުރިން ވިއްކި ނަމަވެސް ސަރުކާރު ހޮސްޕިޓަލްތަކަށް އެކުންފުނީގެ ވެކްސިން ޑޯޒެއް މިހާރު ވިއްކަމުން އަންނަނީ 400 ރުޕީސްއަށެވެ.

މައި ސަރުކާރުން ވެކްސިންގެ އަގު ހެޔޮ ކުރުމަށް މި ދެ ކުންފުންޏަށް ގޮވާލުމާއިއެކު ކުރިޔަށް އޮތް ހަފުތާއެއްގެ ތެރޭގައި ވެކްސިން ޑޯޒެއް ވިއްކާ އަގު 150 އަށް ތިރިކުރާނެ ކަމަށް ބެލެވެއެވެ.

ހޯމަ ދުވަހު އިންޑިއާގައި 352،991 މީހަކު ވަނީ ޕޮޒިޓިވްވެފައެވެ. މިއީ ޓެސްޓްކުރެވުނު އަދަދުގެ ފުރިހަމަ ނަތީޖާއެއް ނޫނެވެ. މިއަށްވުރެ ކޭސްތައް އިތުރުވާނެކަމަށް ކަމާބެހޭ ފަރާތްތަކުން ބުނެއެވެ. އަދި ހޯމަ ދުވަހު 2812 މީހަކު ވަނީ މަރުވެފައެވެ. ހޯމަ ދުވަހުގެ އަދަދާއެކު މުޅި ދުނިޔޭގައި ޖެހިޖެހިގެން ފަސް ދުވަހު ރެކޯޑް އަދަދަކަށް އިންޑިއާއިން ވަނީ ކޭސްތައް ރިޕޯޓްކޮށްފައެވެ.

އިންޑިއާގެ ހާލަތު އެންމެ ގޯސް އެއް ސިޓީއަކީ ވެރިރަށް ނިއުދިއްލީއެވެ. މެއި މަހުގެ 3 ވަނަ ދުވަހާ ހަމައަށް ނިއުދިއްލީ ލޮކްޑައުންކޮށްފައިވާއިރު، އޮކްސިޖަން ލިބުމުގައިވެސް ދަތިތަކާ ވަނީ ކުރިމަތިވެފައެވެ. އޮކްސިޖަން ހުސްވެގެން ދިއްލީގެ ހޮސްޕިޓަލްތަކުން އަންނަނީ "އެސްއޯއެސް" މެސެޖް ޓްވީޓް ކުރަމުންނެވެ. ހޮނިހިރު ދުވަހު އެކަނިވެސް ހާލުބޮޑު 20 މީހަކަށް އޮކްސިޖަން ނުލިބުމުގެ ސަބަބުން ވަނީ މަރުވެފައެވެ.