އެމްއެމްޕީއާރްސީގެ މައްސަލަ ނިމޭއިރު ބައެއް މަޖިލިސް މެމްބަރުންނާއި ވަޒީރުންގެ ގޮނޑި ގެއްލިދާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވިއެވެ.

ރައީސް ނަޝީދު މިހެން ވިދާޅުވީ އެމްއެމްޕީއާރްސީގެ މައްސަލަ މިހާރު އޮތް ހިސާބެއް ބެއްލެވުމަށް ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް މަޖިލީހަށް ފޮނުއްވާފައިވާ ސިޓީއާ ގުޅުވައިގެން ރިޔާސަތުގައި އިންނަވައި ދެއްކެވި ވާހަކަފުޅުގައެވެ. ރައީސް ނަޝީދު ވިދާޅުވީ، 270 މީހުންގެ ދައުވާ މިހާރުވެސް ފާހަގަވެފައިވާކަމަށާއި، އެދައުވާތައް ކުރިއަށްގެންދާނެކަމާމެދު އެމަނިކުފާނު ޝައްކު ނުކުރައްވާ ކަމަށެވެ. އެދައުވާތައް ނިމޭއިރު މަޖިލީހުގެ ބައެއް މެމްބަރުންނާއި ބައެއް ވަޒީރުންގެ ގޮނޑި ގެއްލޭނެކަމަށް ވިދާޅުވިއެވެ.

ރައީސް ނަޝީދު ވިދާޅުވީ، ރައްޔިތުންގެ މަޖިލީހުގެ މެމްބަރަކަށް ވިޔަސް، ކިތަންމެ ބޮޑު ވަޒީރަކަށް ވިޔަސް އަދި ކިތަންމެ ބޮޑު އަމީރަކަށް ވިޔަސް އެމަނިކުފާނު އެ މަގާމުގައި އިންނަކަމުގައި ވަނީނަމަ އެމްއެމްޕީއާރްސީގެ މައްސަލައިގެ އަޑި ހޯއްދަވާނެ ކަމަށެވެ. އަދި މަޖިލީހުން އެކަމަށް އެހީތެރިވެދޭނެ ކަމާމެދުގެ ޔަގީންކަން އެބައޮތްކަމަށް ވިދާޅުވިއެވެ.

މައްސަލައިގެ ހަގީގަތް އެނގި ދައުވާތައް ނުނިމޭހާ ހިނދަކު އެންމެންގެ ބޮލުގައި ވެސް 70 މިލިއަން ޑޮލަރު އެޅިފައި އޮތް ކަމަށް ވިދާޅުވިއެވެ. އެހެންކަމުން ބެލެން އޮތް ހުރިހާ ތަނެއް ބަލައި ހޯދައިގެން ވެސް އެކަން ބަލަން ޖެހޭ ކަމަށް ވިދާޅުވިއެވެ. ހަތްދިހަ ހާސް ޓެކްސްޓް މެސެޖު ހިމެނޭ ޕެންޑްރައިވްއެއް ޤައުމީ ސަލާމަތުގެ ޚިދުމަތްތަކުގެ ކޮމިޓީއަށް ފޮނުވިފައިވާ ކަމަށާއި، އެ ޕެންޑްރައިވް މަޖިލީހުގައި އަރުޝީފް ކުރެވިފައިވާނެ ކަމަށް ވެސް ވިދާޅުވިއެވެ. އެހެންކަމުން މަޖިލީހުގެ މެންބަރުން ބޭނުންފުޅުވާނަމަ ދުނިޔޭގެ ފޮރެންސިކް މާހިރުން މެދުވެރިކޮށް 70 މިލިއަން ޑޮލަރު ހޯދައި ރާއްޖޭގެ ޚަޒާނާއަށް ގެނެވޭނެ ގޮތް އެބައޮތްކަމަށް ވިދާޅުވިއެވެ.

އެމްއެމްޕީއާރުސީގެ ޚިޔާނާތުގެ ފައިސާތައް ބޭނުންކޮށްފައި ވަނީ ސިޔާސީ މަންފާތަކެއް ހޯދުމަށް ކަމަށް އެސެޓް ރިކަވަރީ ކޮމިޝަނުންވަނީ ބުނެފައެވެ. މިހާތަނަށް ކުރެވުނު ތަހުޤީޤުތަކުން އެނގޭ ގޮތުގައި އެމްއެމްޕީއާރުސީގެ ޚިޔާނާތް 3.4 ބިލިޔަން ރުފިޔާއަށް އަރައެވެ.