މިއީ ރޯދަމަހާއި ގުޅިގެން ބައެއް މީހުން ފޮނުވާފައިވާ ސުވާލުތަކު ތެރެއިން ބައެއް ސުވާލުތަކުގެ ޖަވާބެވެ. ސުވާލުތައް ފޮނުވާ މިންވަރަކުން ތިބޭފުޅުންނާއި ހަމަ އަށް ގެނެސްދޭނަމެއެވެ. މިއީ ހަތަރުވަނަ ބައެވެ.

ޖަވާބު

ރޯދަ މަކުރޫހަވާ ކަންތައްތައް ވަރަށްވެސް ގިނައެވެ. އޭގެތެރޭގައި ޢާއްމު ކަންތައްތަކަކީ ތިމާގެ ދުލުންނާއި ރޯދަގެއްލޭ ކަންތައްތައް ފިޔަވައި ނޭދެވޭ، ނުވަތަ ލަޣުވަ ކަންތައް ކުރުމެވެ. މިފަދަ މަކްރޫހަ ކަމެއް ނުކޮށް ދޫކޮށްލުމުން ސަވާބު ލިބޭނެއެވެ. އެހެނަސް އެފަދަ ކަމެއް ކޮށްފިނަމަ ސަވާބުން މަޙްރޫމުވާނެއެެވެ. ރޯދަ ނުގެއްލޭނެއެވެ.

1- ވުޟޫ ކުރާއިރު ނޭފަތާއި ކޮލަށް ފެންލުމުގައި މުބާލަޣާ ކުރުމެވެ.

2- ތިމާގެ ކުޅު އަނގައިގައި ޖަމާކޮށްގެން ދިރުވާލުމެވެ.

3- ކަވާ ޖެހުމެވެ.

4- ދެމެފިރިން ޝާހުވަތު އުފެދޭގޮތަށް ލޯބިކޮށް، ކިސްކޮށް ހެދުމެވެ.

5- މާގިނައިން ދުވާލު ނިދުމެވެ.

6- ރޯދައިގެ ރޫޙު ގެއްލޭ މިންވަރަށް މާގިނައިން ލަހުވައިގެ ކުޅިވަރުކުޅެހެދުމެވެ.

7- ރޯދަމަހު މެންދުރު ފަހުން ދަތް އުނގުޅުމެވެ. (މިއީ އިމާމު ޝާފިޢީގެ އަރިހުގައެވެ. ގިނަ ޢިލްމުވެރިން ވިދާޅުވަނީ މަކްރޫހަ ކަމެއް ނޫންކަމަށެވެ.)

ޖަވާބު

ހިލޭ އަންހެނުންނަކީ ތިމާއާއި ކައިވެނި ކުރުން ހުއްދަމީހުންނެވެ. ބައެއް ފަހަރު ބަހުގެ ގޮތުން ދިވެހިން ގާތްތިމާގެ މިބަހުގެ އިދިކޮޅުބަހަކަށް ހިލޭމީހުން ބޭނުން ކުރެއެވެ. މިއުޞޫލުން ބަލާއިރު އަނބި މީހާ ހިލޭމީހެއް ނޫނެވެ.

ޖަވާބު

މަޛްޔަކީ ފިރިހެނާގެ ޝަހުވަތު އުތުރިއެރުމުގެ ސަބަބުން ނުކުންނަ އޮލަ ފެނެކެވެ. މިއީ ނަޖިހެކެވެ. ނިކުމެއްޖެނަމަ ދޮވެލުމުން ފުދޭނެއެވެ.

ޖަވާބު

ފިޠުރު ޒަކާތް ދެއްކުން އޮންނަނީ ޢީދަށް ހަނދު ބެލުމުންނެވެ. އެހެންކަމުން ޢީދު ނަމާދަށް ދިއުމުގެ ކުރިން ފިޠުރު ޒަކާތް ދައްކަންވާނެއެވެ. ނަމަވެސް ހަނދު ބެލުމުގެ ކުރިން ރޯދަމަހުގެ ތެރޭގައި ދެއްކުމަކީ ހުއްދަ ކަމެވެ. ޢީދަށް ދިޔައިރު ފިޠުރު ނުދައްކައި އޮތްނަމަ ޢީދުގެ ފަހުން ޤަޟާ ކުރަންވާނެއެވެ.