ސަރުކާރުން ދޫކޮށްފައިވާ 3 ރަށުން ދަނޑުވެރިކަން ކުރުމަށް ބޭނުންވާ ފަރާތަތްކަށް ބިން ދޫކުރެވޭނެ- އެގްރޯނެޓް
ދަނޑުވެރިކަމުގެ ނަފާ ގިނަބަޔަކަށް ލިބިގެންދާނެކަމަށް އެ ކުންފުނިން ބުނޭ
މި މަޝްރޫއުގެ ސަބަބުން ރާއްޖޭގައި ޒަމާނީ ދަނޑުވެރިކަމަކަށް ފުރުސަތު ހުޅުވޭނެކަމަށް އެގްރޯނެޓުން ބުނޭ
އެގްރޯ ނެޝަނަލް ކޯފަރޭޝަން ލިމިޓެޑަށް ސަރުކާރުން ދޫކުރުމަށް ނިންމާފައިވާ ތިން ރަށުގައި ކޮންޓްރެކްޓް ފާރމިންގެ މަޝްރޫއު ފެށުމާއިއެކު ފުޅާދާއިރާއެއްގައި ދަނޑުވެރިކަން ކުރުމަށް ބޭނުންވާ ފަރާތަތްކަށް ބިން ދޫކުރެވިގެންދާނެކަމަށް އެ ކުންފުނިން ބުނެފިއެވެ.
މިކަން ކުރުމަށް ނިންމާފައިވަނީ ހއ. މުލިދޫ، ލ. ގާދޫ އަދި ގދ. ގަމުގައެވެ. އެގްރޯނެޓުން ބުނީ ދަނޑުވެރިންނަށް ދިމާވެފައިވާ ދަތިތަކަށް ދާއިމީ ހައްލުތައް ހޯދައިދިނުމަކީ އެ ކުންފުނީގެ އެންމެ ބޮޑު އަމާޒު ކަމަށެވެ. އަދި މި ތިން ރަށުގައި ހިންގާ މަޝްރޫއުގެ ސަބަބުން ރާއްޖޭގައި ޒަމާނީ ދަނޑުވެރިކަމަކަށް ފުރުސަތު ހުޅުވި ދަނޑުވެރިކަމުގެ ނަފާ ގިނަބަޔަކަށް ލިބިގެންދާނެ ކަމަށެވެ. މި ތިން ރަށުގެ ބޮޑުބައި ބޭނުން ކުރެވިގެން ދާނީ ކޮންޓްރެކްޓް ފާރމިންގ އުސޫލުން ދަނޑުވެރިކަން ކުރުމަށް ކަނޑައަޅާފައިވާ ބާވަތްތަށް އުފެއްދުމަށްކަމަށް އެ ކުންފުނިން ބުނެއެވެ.
އެގްރޯނެޓުން ބުނީ ކޮންމެ ރަށެއްގައިވެސް ދަނޑުވެރިކަމަށް ބިންތަކެއް ކަނޑައެޅި ދިގު މުއްދަތަކަށް ދަނޑުވެރިންނަށް ދޫކުރުމަށް ރޭވިފައިވާ ކަމަށެވެ. އަދި މިފަދަ ބިންތައް ދޫކުރުމުގައި އިސްކަން ދޭން ނިންމާފައި ވަނީ އެ އަތޮޅެއްގެ ދަނޑުވެރިންނަށް ކަމަށެވެ. މި މަސަކަތްކުރުމުގައި ދަނޑުވެރިންނަށް އެރަށްރަށަށް ދަތުރު ކުރެވޭނެ އިންތިޒާމް ހަމަޖެއްސުމާއި އެ ރަށްރަށުގައި ތިބެވޭނެ އިންތިޒާމްވެސް ކުންފުނީގެ ފަރާތުން ހަމަޖައްސައި ދެވޭނެކަމަށް އެގްރޯނެޓުން ބުނެއެވެ. މީގެ އިތުރުން މިރަށްތަކުގައި ކަރަންޓާއި ފެން ފަދަ އަސާސީ ޚިދުމަތްތައް ގާއިމްކުރުމާ ދަނޑުވެރިން ހައްދާ ބާވަތްތައް ރަށުގައި ރައްކާތެރިކަމާއެކު ޕްރޮސެސް ކުރުމާއެކު މި ތަކެތި ކައިރި ރަށްތަކަށާއި ރިސޯޓްތަކަށް މާކެޓްކުރުމުގެ މަސަކަތް އެ ކުންފުނިން ކުރާނެއެވެ.
މި ތިން ރަށުގައިވެސް ދަނޑުވެރިކަމަށް ބޭނުންކުރާ އާލާތްތަކާއި، ގަސްކާނާއާއި ބޭހާއި، އެހެނިހެން ވަސީލަތްތައް ލިބޭނެ ގޮތަށް އިންތިޒާމް ކުރެވޭނެކަމަށް އެ ކުންފުނިން ބުނެެއެވެ. އަދި، ދަނޑުވެރިންނަށް ދިމާވާ ދަތިތަކަށް ހައްލު ހޯދައިދީ ބޭނުންވާ ތަމްރީންތައްވެސް ދިނުމަށް ހަމަޖެހިފައިވެއެވެ. މިހާތަނަށް 1500 އަށްވުރެ ގިނަ ދަނޑުވެރިން މިމަޝްރޫއުގައި ބައިވެރިވުމަށް ފޯމު ހުށައަޅާފައިވެއެވެ. އަދި 400 ފަރާތަކާއިއެކު އެއްބަސްވުންތަކުގައި ސޮއި ކުރެވި، އިތުރު 654 ފަރާތަކާއިއެކު އެގްރިމެންޓުކުރުމުގެ މަސައްކަތްދަނީ ކުރެވެމުންނެވެ.
