ސައުދީން އިންޑިއާއަށް އޮކްސިޖަން ފޯރުކޮށްދީފި

ސައުދީ އަރަބިއާއިން އިންޑިއާއަށް އޮކްސިޖަން ފޮނުވައިފިއެވެ.

ސައުދީ އަރަބިއާއިން އިންޑިއާއަށް ފޮނުވާފައިވަނީ 80 މެޓްރިކްޓަންގެ އޮކްސިޖަނެވެ. އިންޑިއާގެ ހޮސްޕިޓަލްތަކުން އޮކްސިޖަން ހުސްވެ ބަލިމީހުންނަށް ފަރުވާ ނުދެވޭތީ އިންޑިއާއަށް މިވަނީ ބޮޑު ކާރިސާއަކާ ކުރިމަތިވެފައެވެ. ވަރަށް ގިނަ ބަޔަކު ފަރުވާނުދެވިގެން މަރުވަމުންދާތީ އިންޑިއާއިން މިހާރު މިވަނީ އެކުވެރި ގައުމުތަކުގެ އެހީތެރިކަމަށް އެދިފައެވެ.

އާދީއްތަދުވަހު ވެސް އިންޑިއާއިން ވަނީ ތިންލައްކަ ފަންސާސް ދެހާހަށްވުރެ ގިނަ ކޭސް ރިޕޯޓުކޮށްފައެވެ. އަދި ބަލީގައި މަރުވި މީހުގެ އަދަދު އުޅެނީ ދެހާހުން މަތީގައެވެ. އަދި އެމަޖެންސީގައި ހޮސްޕިޓަލަށް ގެންދާ މީހުންނަށް ވެސް ފަރުވާނުދެވި މަރުވާން ދޫކޮށްލަން ޖެހޭ ހިސާބަށް ވަނީ ގޮސްފައެވެ. އިންޑިއާ ސަރުކާރުން އަންނަނީ ސިއްހީ ހާލަތު ބަދަލުކުރުމަށް މަސައްކަތްތަކެއް ކުރަމުންނެވެ. އެގޮތުން ވެރިކަން ކުރާ ނިއުދިއްލީގެ ފުރަބަންދުގެ މުއްދަތު އަނެއްކާވެސް މިވަނީ އަންނަ މަހުގެ 3ށް ދިގު ދަންމާލާފައެވެ.

ބައެއް ގައުމުތަކުން މިހާރު ވެސް އަންނަނީ އިންޑިއާއަށް އެހީތެރިކަން ފޯރުކޮށްދެމުންނެވެ. އެގޮތުން މިހާތަނަށް އެމެރިކާއާއި ފަރަންސޭސީވިލާތުން ވެސް ވަނީ އިންޑިއާއަށް އެހީތެރިކަން ފޯރުކޮށްދީފައެވެ.