ބުދަ ދުވަހުގެ ނިޔަލަށް ދޯންޏަކުން ކިރާނީ 4 ޓަނުގެ މަސް- މިފްކޯ
25 އެޕްރީލު 2021 | އާދީއްތަ 08:31މިފްކޯގެ ފްރީޒިންގ ކެޕޭސިޓީއަށް ވުރެ އިތުރަށް މަސް ލިބެމުން ދިއުމާއެކު މަސްކިރުވުމަށް ދަތިތަކެއް ދިމާވެފައިވޭ
ކޮވިޑާ ގުޅިގެން އެ ކުންފުނިން ވަނީ އޭޕްރީލް މަހު ފެލިވަރުގެ ޕްރޮޑަކްޝަން މަޑުޖައްސާލާފައި
28 އެޕްރީލް ވާ ބުދަ ދުވަހުގެ ނިޔަލަށް ދޯންޏަކުން 4 ޓަނުގެ މަސް ކިރާ ގޮތަށް ހަމަޖައްސާފައިވާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ)ން ބުނެފިއެވެ.
މިފްކޯއިން ބުނީ މި ދުވަސްވަރު ދެކުނުގެ މަސްވެރިކަން އާދަޔާ ޚިލާފަށް ރަގަޅުވެފައިވާ ކަމަށެވެ. އަދި ރާއްޖޭގެ ހުރިހާ ހިސާބެއްގެ ދޯނިފަހަރު އެއްފަހަރާ ދެކުނުގެ ސެންޓަރުތަކާއި ބޯޓުފަހަރަށް މަސްކިރުވުމަށް އަންނަމުންދާ ކަމަށާއި މިފްކޯގެ ފްރީޒިންގ ކެޕޭސިޓީއަށް ވުރެ އިތުރަށް މަސް ލިބެމުން ދިއުމާއެކު މަސްކިރުވުމަށް ދަތިތަކެއް ދިމާވެފައިވާ ކަމަށެވެ.
ވުމާއެކު މިހާރު ކިޔުގައި ހުރި ދޯނިފަހަރުގެ މަސް ކިރުމަށާއި ފްރީޒް ކުރުމަށް ވަގުތު ބޭނުންވާތީ 25 އޭޕްރީލުން 28 އޭޕްރީލުގެ ނިޔަލަށް ދޯންޏަކުން 4 ޓަނުގެ މަސް ކިރާ ގޮތަށް ހަމަޖައްސާފައިވާ ކަަމަށެވެ. މިގޮތަށް ހަމަޖެއްސި ކަމުގައި ވީނަމަވެސް ކޫއްޑޫ އާއި އައްޑޫ ގައި މިހާރު ކިޔު ނަމްބަރު ދެވިފައިހުރި ދޯނިފަހަރުގައި ހުރި މަސް ކޮންޓްރޯލް ކުރުމެއްނެތި ގަންނަ ގޮތަށް ހަމަޖެހިފައިވާ ކަމަށް މިފްކޯއިން ބުނެއެވެ.
ފެލިވަރުން ޕޮޒިޓިވް ކޭސްތަކެއް ފެނި އެ ކުންފުނިން ވަނީ އޭޕްރީލް މަހު ފެލިވަރުގެ ޕްރޮޑަކްޝަންތައް މަޑުޖައްސާލާފައެވެ. ކޮވިޑް-19އާ ގުޅިގެން މިފްކޯ ވަނީ ވަރަށް ބޮޑަށް އެހާލަތަށް ތައްޔާރުވެފައެވެ. މިފަދަ ހާލަތެއް ކުރިމަތިވެދާނެކަމަށް ލަފާކޮށް ޚާއްސަ އެސްއޯޕީއެއް ނެރެފައިވެއެވެ. މިއެސްއޯޕީއާ އެއްގޮތަށް ކުރީބައިގައި ޕްރޮޑަކްޝަންތައް ނިންމާފައިވާތީ ކުރިއަށް އޮތް ތިން މަހުގެ ތެރޭގައި ވެސް އެއްވެސް ދައްޗަކާ ނުލާ ޕްރޮޑަކްޓްތައް ނެރެވޭނެކަމަށް މިފްކޯގެ ޖެނަރަލް މެނޭޖަރު އަހުމަދު ނަވާޒު ވަނީ ވިދާޅުވެފައެވެ.
ސަރުކާރުން ވަރަށްބޮޑު ހޭދައެއް ކޮށްގެން މިިފްކޯގެ ވަރަށް ގިނަ ވަސީލަތްތަކެއް ތަރައްގީކުރުމަށް މަސައްކަތް ކުރަމުން ދާއިރު ވަރަށް ގިނަ ކަންކަން މިހާރުވެސް ރަނގަޅު ކުރެވިފައިވާ ކަމަށް އެ ކުންފުނީގެ މެނޭޖިންގ ޑިރެކްޓަރު އިސްމާޢީލް ފައުޒީ މީގެ ކުރިން ވަނީ ވިދާޅުވެފައެވެ.
