މާލެ ހުޅުމާލެ އިންޓަކަނެކްޓިވިޓީ ގްރިޑްގެ މަސައްކަތް ނިމޭނެކަމަށް މިހާރު ބުނަނީ ޖުލައިމަހަށް
ޕްރޮޖެކްޓްގެ 93 އިންސައްތަ މަސައްކަތް މިހާރު ވަނީ ނިމިފައި
ސްޓެލްކޯގެ މެނޭޖިން ޑިރެކްޓަރ ހަސަން މުޣުނީ
މާލެ ހުޅުމާލެ އިންޓަކަނެކްޓިވިޓީ ގްރިޑްގެ މަސައްކަތް މިއަހަރުގެ ޖުލައި މަހަށް ނިންމާލެވޭނެކަމަށް ސްޓެލްކޯގެ މެނޭޖިން ޑިރެކްޓަރ ހަސަން މުޣުނީ ވިދާޅުވެއްޖެއެވެ.
ރާއްޖެޓIވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން މުޣުނީ ވަނީ، މި ޕްރޮޖެކްޓްގެ 93 އިންސައްތަ މަސައްކަތް މިހާރު ނިމިފައިވާއިރު ބާކީ ހުރި މަސައްކަތްތައް ކުރިއަށް އޮތް 2 މަހެއްހާ ދުވަހުގެ ތެރޭގައި ނިމޭނެ ކަމަށް ވިދާޅުވެފައެވެ. މަތިން އަޅަންޖެހޭ 6 ކޭބަލް ވެސް މިހާރު އަޅާ ނިމިފައިވާ ކަމަށާއި، ޑިސްޓްރިބިއުޝަން ސިސްޓަމާއި ޓްރާންސްފޯމަރ ބެހެއްޓުމުގެ މަސައްކަތް މިހާރު ނިމިފައިވާއިރު މި މަޝްރޫޢާއެކު ކަރަންޓުގެ ޚިދުމަތް ފޯރުކޮށްދިނުމުގައި މިހާރަށްވުރެ ލުއިފަސޭހަވެގެންދާނެކަމަށް މުޣުނީ ވަނީ ވިދާޅުވެފައެވެ. ވަކިން ޚާއްސަކޮށް ޖަނަރޭޓަރުތައް އޯވަރލޯޑުވެގެން ކަރަންޓު ކެނޑޭކެނޑުން ނިމުމަކަށް އައިސް، ޕަވަރ ޝޯޓޭޖެއް އަތުވެއްޖެ ޙާލަތެއްގައި ކުޑަވަގުތުކޮޅެއްގެ ތެރޭގައި ކަރަންޓު އަނބުރާ ފޯރުކޮށްދެވޭނެކަމަށް މުޣުނީ ވިދާޅުވިއެވެ.
"ގްރޭޓާރ މާލެ އިންޓަރ ކަނެކްޝަން ގްރިޑް ޕްރޮޖެކްޓް" ގެ ނަމުގައި ސްޓެލްކޯއިން ކުރިއަށްގެންދާ މި މަސައްކަތުގެ ދަށުން މާލެ އާއި ހުޅުމާލޭގެ ކަރަންޓު އެއްވިއުގައަކުން ގުޅާލެވި، ހުޅުމާލެ އިން މާލެ އަށް ނުވަތަ މާލެ އިން ހުޅުލެ އަށް ވެސް ބޭނުން ޖެހިއްޖެ ހާލަތެއްގައި ވަގުތުން ކަރަންޓު ފޯރުކޮށްދެވޭނެއެވެ. މިހާރު ހުޅުލެއަށް ސްޓެލްކޯއިން ކަރަންޓްފޯރުކޮށްނުދިން ނަމަވެސް ބޭނުން ޖެހިއްޖެ ހިނދެއްގައި މިވިއުގަ މެދުވެރިކޮށް ކަރަންޓް ދެވޭނެކަމަށް ސްޓެލްކޯއިން މައުލޫމާތުދެއެވެ. މިއާއެކު މާލެސީޓީގެ ކަރަންޓުގެ މައްސަލައަށް ހައްލު ލިބިގެންދާނެއެވެ.
ހުޅުމާލޭގައި އަޅާފައިވާ 50 މެގަވޯޓުގެ އިންޖީނުގެ އިން 50 މެގަވޯޓުގެ ކަރަންޓު އުފައްދާއިރު، މިހާރު ހުޅުމާލެ އަށް ބޭނުން ވަނީ އެންމެ 15 މެގަވޯޓު ކަމަށް ސްޓެލްކޯ އިންވަނީ ބުނެފައެވެ. އެހެންކަމުން، ބާކީ އުފައްދާ ކަރަންޓު މިވިއުގަ މެދުވެރިކޮށް ބަހައިލާނެއެވެ. މި ޖާގަ އިތުރު ކުރުމަށް އިތުރު 50 މެގަވޯޓުގެ ކަރަންޓު އުފައްދާ އިންޖީނުގެއެއް ހެދުމުގެ މަސައްކަތް ވެސް ސްޓެލްކޯ އިން ހުޅުމާލޭގައި ކުރިއަށް ގެންދާނެއެވެ. މިއާއެކު ހުޅުމާލޭގެ ދެވަނަ ފިޔަވަހީގައި މީހުން އާބާދުވާން ފެށުމުން ވެސް ކަރަންޓުގެ މައްސަލަތަކެއް ކުރިމަތިނުވާނެ ކަމަށް ސްޓެލްކޯއިންވަނީ ބުނެފައެވެ.
މި ޕްރޮޖެކްޓުގެ ދެވަނަ ފިޔަވަހީގެ މަސައްކަތުގެތެރެގައި ހިމެނެނީ، ވިލިމާލެ އާއި ތިލަފުއްޓާއި ގުޅީފަޅު ބްރިޖަކުން ގުޅާލުމުން މިވިއުގައިގެ ތެރެއަށް އެ ރަށްތައް ވެސް ވެއްދުމެވެ. މި ޕްރޮޖެކްޓުގެ މަސައްކަތް ފަށަން ހަމަޖެހިފައިވަނީ ބްރިޖު ނިމުމުންނެވެ.
