ބ އޭދަފުށިން ކޮވިޑް-19ށް ޕޮޒިޓިވްވި މީހުންގެ އަދަދު 48ށް އަރައިފިއެވެ.

އޭދަފުށިން ޕޮޒިޓިވް ކޭސްތަކެއް ފެނި އެރަށް މޮނިޓަރިންގއަށް ލާފައިވަނީ އޭޕްރީލް މަހުގެ 19 ވަނަ ދުވަހުއެވެ. އޭގެ ފަހުން އޭދަފުށީގައި އަންނަނީ ހަލުވިކަމާއެކު ކޮވިޑް ފެތުރެމުންނެވެ. އޭދަފުށީގައި ހުންނަ ބ. އަތޮޅު ހޮސްޕިޓަލުން އެންމެ ފަހުން ހާމަކޮށްފައިވާ މައުލޫމާތުތަކަށް ބަލާއިރު ހުކުރު ދުވަހު އެކަނިވެސް 11 މީހަކު ޕޮޒިޓިވްވެފައިވެއެވެ. މި މީހުންގެ ތެރެއިން އެކަކަށް އަންނަނީ ރީޖަނަލް ކޮވިޑް ސެންޓަރުގައި ފަރުވާދެމުންނެވެ.

އެރަށުން ޖުމްލަ 469 ސާމްޕަލެއް ވަނީ ނަގާފައެވެ. އޭގެތެރެއިން 421 ސާމްޕަލެއް ވަނީ މިހާތަނަށް އައިއިރު ނެގެޓިވްވެފައެވެ.

ބ. އޭދަފުށިން ކޮވިޑް-19ގެ ޕޮޒިޓިވް ގިނަ ކޭސްތަކެއް ފެނިފައިވާތީ މިމަހުގެ 1 ގެ ފަހުން އޭދަފުށީގައި އުޅުމަށްފަހު އަތޮޅުތެރޭގެ އެއްވެސް ރަށަކަށް ގޮސްފައިވާ ފަރާތެއްވާނަމަ އެޗްޕީއޭއަށް އެންގުމަށް ވަނީ އިލްތިމާސްކޮށްފައެވެ. އެކަމާ ގުޅިގެން އެޗްޕީއޭއިން ނެރުނު ބަޔާނުގައި ބުނެފައިވަނީ 01 އޭޕްރީލް ގެ ފަހުން އޭދަފުށީގައި އުޅުމަށްފަހު އަތޮޅުތެރޭގެ އެއްވެސް ރަށަކަށް ގޮސްފައިވާ ފަރާތެއްވާނަމަ، ވީ އެންމެ އަވަހަކަށް އެރަށެއްގެ ހޮސްޕިޓަލް ނުވަތަ ހެލްތް ސެންޓަރަށް އެންގެމަށެވެ. އަދި މިތާރީޚްގެ ފަހުން ބ. އޭދަފުއްޓަށް ގޮސްފައިވާ ފަރާތެއްވާނަމަ، އޭދަފުށިން އަނބުރާ ރަށަށް އައި ދުވަހުން ފެށިގެން 10 ދުވަސްވަންދެން ކަރަންޓީންގައި ތިބުމަށާއި، އަދި 10 ދުވަސް ހަމަވެފައިވާ ފަރާތްތަކުން ވެސް ސާމްޕަލް ނަގަައި ޓެސްޓްކުރުމަށް އެޗްޕީއޭއިން ވަނީ އެދިފައެވެ. އަދި އެ ރަށެއްގެ ހެލްތު ސެންޓަރުން ނުވަތަ ހޮސްޕިޓަލުން މިފަރާތްތަކުގެ ސާމްޕަލް ނެގުމުގެ އިންތިޒާމު ހަމަޖައްސަންވާނެކަމަށް އެޗްޕީއޭއިން ބުނެފައިވެއެވެ.

މީގެއިތުރުން 01 އޭޕްރީލް ފަހުން އޭދަފުށިން މާލެއަށް އައިސްފައިވާ ފަރާތްތަކުން މާލެހިޔާ ކައިރީގައި ހުންނަ ފްލޫ ކްލިނިކް، ހުޅުމާލޭ ފްލޫ ކްލިނިކް، އަދި ވިލިމާލޭ ފްލޫ ކްލިނިކަށް ގޮސް ސާމްޕަލް ނެގުމަށާއި، ނަތީޖާ ނެގެޓިވްވި ކަމުގައި ވިޔަސް އޭދަފުށިން އަނބުރާ ރަށަށް އައި ދުވަހުން ފެށިގެން 10 ދުވަސްވަންދެން ކަރަންޓީނުގައި ތިބުމަށް ވަނީ އެދިފައެވެ. އެރަށަށް ކުރި ދަތުރުގެ މައުލޫމާތު އެޗްޕީއޭއާ ހިއްސާކުރުމަށް އަންގާފައިވާއިރު، 10 ދުވަސް ހަމަވެފައިވާ މީހުން ވެސް ސާމްޕަލް ނަގަައި ޓެސްޓްކުރަންވާނެ ކަމަށް އެޗްޕީއޭއިން ވަނީ ބުނެފައެވެ.

މިފަހަކުން އަތޮޅުތަކުގެ ގިނަ ރަށްތަކަކުން އަންނަނީ ބޮޑެތި ކުލަސްޓަރތަކެއް ފެންނަމުންނެވެ. މި ފަހުން މާލެ ސަރަހައްދަށްވުރެ ގިނައިން އަތޮޅުތެރެއިން ކޭސްތައް އަންނަނީ ރިޕޯޓްކުރަމުންނެވެ.