މިއަދަކީ ރާއްޖޭގައި އެންމެ ގިނަ މީހުން ކޮވިޑް-19އަށް ޕޮޒިޓިވްވި ދުވަސް، ކޭސްތައް 300އިން މަތީގައި!
23 އެޕްރީލު 2021 | ހުކުރު 18:03ރާއްޖެއިން ޕޮޒިޓިވް ކޭސްތަކުގެ އަދަދު 27،403ށް ވަނީ އަރާފައި
ކޮވިޑް19 - ރޭގަނޑު މާލޭގެ މަގުމަތި
ހުކުރު ދުވަހު ރާއްޖެއިން ކޮވިޑް-19ގެ 300ށް ވުރެ ގިނަ ޕޮޒިޓިވް ކޭސް ރިޕޯޓްކޮށްފިއެވެ.
އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުން ބުރާސްފަތި ދުވަހު އިރު އޮއްސި ހަޔަކާ ހުކުރު ދުވަހު އިރު އޮއްސި ހަޔަކާ ދެމެދު ނެގި 3،094 ސާމްޕަލްގެ ތެރެއިން 319 މީހުން ވަނީ ޕޮޒިޓިވްވެފައެވެ. އޭގެ ތެރެއިން 182 ކޭސްއަކީ އަތޮޅުތެރެއިން ރިޕޯޓްކޮށްފައިވާ ކޭސްތަކެކެވެ. މީގެ އިތުރަށް މާލެ ސަރަހައްދުން 108 ކޭސް ރިޕޯޓުކޮށްފައިވާއިރު ރިސޯޓުތަކުން 21 ކޭސް ރިޕޯޓުކޮށްފައިވެއެވެ. އަދި އިންޑަސްޓްރިއަލް ރަށްރަށުން އަށް ކޭސް ރިޕޯޓުކޮށްފައިވެއެވެ.
319 ޕޮޒިޓިވްކޭސްއާއިއެކު މިއަދަކީ މިހާތަނަށް އެންމެ ގިނަ ބަޔަކު ޕޮޒިޓިވްވި ދުވަހެވެ. މީގެ ކުރިން މި މަހުގެ އެއް ވަނަ ދުވަހުވެސް ކޭސްތަކުގެ އަދަދު 300ށް އަރާފައެވެ.
މިއާއެކު މިހާރު ރާއްޖެއިން ޕޮޒިޓިވް ކޭސްތަކުގެ އަދަދު 27،403ށް އަރާފައިވާއިރު އޭގެ ތެރެއިން ފަރުވާހޯދަމުން ދަނީ 3،207 މީހުންނެވެ. އޭގެ ތެރެއިން 98 މީހުންނަށް ފަރުވާދެމުން އަންނަނީ އެޑްމިޓްކޮށްގެންނެވެ. އަދި 24،116 މީހުން ވަނީ ބަލިން ރަނގަޅުވެފައެވެ. ފާއިތުވެދިޔަ 24 ގަޑިއިރު ބަލިން ރަނގަޅުވީ 51 މީހުންނެވެ. މި ބަލީގައި ރާއްޖެއިން މިހާތަނަށް 71 މީހުން ވަނީ މަރުވެފައެވެ.
ފާއިތުވި ހަފްތާ ތެރޭގައި ރާއްޖެއިން ޕޮޒިޓިވްވާ ކޭސްތަކުގެ އަދަދު މަތިވާން ފަށާފައި މިވަނީ ޖެނުއަރީ މަހުން ފެށިގެން ރާއްޖެ ދެކެމުން އައި ކޮވިޑް-19ގެ ތިން ވަނަ ރާޅުގައި ކޭސްތަކުގެ އަދަދުތައް ހިފެހެއްޓި 100ން ދަށުގައި އުޅޭތާވެސް ދެތިން ހަފްތާ ފަހުންނެވެ.
