އުމުރުން 3 އަހަރުގެ ކުއްޖަކަށް ޖިންސީގޯނާކުރި މައްސަލައެއް ފުލުހުން ތަހުގީގުކުރަނީ
މައްސަލައާ ގުޅިގެން އަޅަންޖެހޭ ފިޔަވަޅުތައް ލަސްކުރުމެއްނެތި އަޅަމުންދާނެ ކަމުގެ ޔަގީންކަން އާންމު ރައްޔިތުންނަށް ފުލުހުން އަރުވާފައިވޭ
ޕޮލިސް ހެޑްކުއަރޓަރ
އުމުރުން އެންމެ 3 އަހަރުގެ ކުޑަކުއްޖަކަށް ޖިންސީގޯނާކުރި މައްސަލައެއް ފުލުހުން ތަހުގީގު ކުރަން ފަށައިފިއެވެ.
ފުލުހުން ބުނީ، މި މައްސަލަ ހުށަހެޅުމާ ގުޅިގެން ކުއްޖާއަށް އެއްވެސް ކަހަލަ އަނިޔާއެއް ލިބިފައިވޭތޯ ބެލުމަށް ޑޮކްޓަރަށް ދައްކާފައި ވާކަމަށެވެ. އޭގެ އިތުރުން ނަފްސާނީ ގޮތުން ވެސް ކުއްޖާއަށް އަސަރުކޮށްފައިވޭތޯ ބެލުމަށް ސައިކޮލޮޖިސްޓަކަށް ދައްކާފައި ވާކަމަށެވެ. އެއާއެކު ސައިކޮލޮޖިކަލް ރިޕޯޓާއި މައްސަލައާ ގުޅިގެން ހަދަންޖެހޭ އެހެނިހެން ރިޕޯޓްތައް ހެދުމުގެ މަސައްކަތް ފުލުހުން މިހާރު ކުރަމުން ގެންދާ ކަމަށް ފުލުހުން ބުނެއެވެ.
ފުލުހުންބުނީ މި މަސައްލައިގައި ޖިންސީ ގޯނާގެ ޝިކާރައަކަށް ވެފައިވާ ކުއްޖާގެ ރައްކާތެރިކަން ކަށަވަރު ކުރުމަށްޓަކައި ކުރަންޖެހޭ މަސައްކަތްތައް ފެމެލީ ޕްރޮޓެކްޝަން ސަރވިސްއާ ގުޅިގެން ކުރަމުން ގެންދާކަމަށެވެ.
މި މައްސަލައަކީ ސީރިއަސް މައްސަލައަކަށް ވާތީ، ތަހުގީގަށް ބޭނުންވާ ހެއްކާއި ޤަރީނާ ހޯދުމަށް ކުރަންޖެހޭ އެންމެހާ މަސައްކަތްތައް ކުރަމުން ގެންދާނެ ކަމަށް ފުލުހުން ބުނެއެވެ. އަދި މި މައްސަލައާ ގުޅިގެން އަޅަންޖެހޭ ފިޔަވަޅުތައް ލަސްކުރުމެއްނެތި އަޅަމުންދާނެ ކަމުގެ ޔަގީންކަން އާންމު ރައްޔިތުންނަށް ފުލުހުން އަރުވާފައިވެއެވެ.
