ކަޑިޒް ބަލިކޮށް ރެއާލް އެއްވަނައަށް

ސްޕެނިޝް ލީގުގައި ބުދަ ދުވަހުގެރޭ ކަޑިޒް އަތުން މޮޅުވެ، ތާވަލުގެ އެއްވަނައަށް އެންމެ ފަހުގެ ޗެމްޕިއަން ރެއާލް މެޑްރިޑް ޖެހިލައިފިއެވެ.

ރަށުން ބޭރުގައި ކުޅުނު މެޗުން ރެއާލް މޮޅުވީ 3-0 ގެ ނަތީޖާއަކުންނެވެ.

މި މެޗުގައި ރެއާލުން މޮޅު ކުޅުމެއް ދެއްކިއިރު، އެ ޓީމުން ތިން ލަނޑުވެސް ޖަހާފައިވަނީ ފުރަތަމަ ހާފުގައެވެ. އެގޮތުން މެޗުގެ 30 ވަނަ މިނެޓުގައި ލިބުނު ޕެނަލްޓީއަކުން ތަޖުރިބާކާރު ފޯވާޑް ކަރިމް ބެންޒެމާ ވަނީ ރެއާލަށް ލީޑު ނަގައިދީފައެވެ. މިއީ އޭރިއާ ތެރެއިން ރެއާލުގެ ވިނީޝިއުސް ޖޫނިއާއަށް ކުރި ފައުލަކަށް ރެފުރީ ދިން ޕެނަލްޓީއެކެވެ.

އޭގެ ތިން މިނެޓު ފަހުން އަލްވާރޯ އޮޑްރިއޮޒޯލާ ރެއާލަށް ލީޑުފުޅާކޮށްދިންއިރު، އެ ޓީމުގެ ތިންވަނަ ލަނޑު ފުރަތަމަ ހާފު ނިމެން ފަސް މިނެޓަށް ވެފައި ވަނިކޮށް ކާމިޔާބުކޮށްދިނީ މެޗުގައި މޮޅު ކުޅުމެއް ދެއްކި ބެންޒެމާއެވެ. މި މެޗުގައި ބެންޒެމާ ދެ ލަނޑު ޖެހިއިރު، މި ދެ ލަނޑާއެކު ބެންޒެމާ ވަނީ މި ފަހަރުގެ ލީގުގައި މިހާތަނަށް 21 ލަނޑު ޖަހާފައެވެ.

މި މޮޅާއެކު ތާވަލުގެ އެއްވަނައަށް ރެއާލް ޖެހިލިއިރު، އެ ޓީމަށް ކުޅުނު 32 މެޗުން ވަނީ 70 ޕޮއިންޓް ލިބިފައެވެ. އަދި ދެވަނައަށް ވެއްޓުނު އެތުލެޓިކޯއަށް 31 މެޗުން 70 ޕޮއިންޓް ލިބިފައިވާއިރު، ރެއާލަށް ކުރި ލިބެނީ ހެޑް-ޓު-ހެޑް ގަވާއިދުންނެވެ. އަދި ތާވަލުގެ ތިންވަނައިގައި 32 މެޗުން ލިބުނު 67 ޕޮއިންޓާއެކު ސެވިއްޔާ އޮތްއިރު، ބާސެލޯނާ އޮތީ ތާވަލުގެ ހަތަރުވަނައިގައި 30 މެޗުން 65 ޕޮއިންޓާއެކުއެވެ.