ހިންމަފުށީ ޖަލާއި ދޫނިދޫން ކޮވިޑް ކޭސްތަކެއް ފެނި ދެ ރަށް ވެސް މޮނިޓަރިންއަށް
21 އެޕްރީލު 2021 | ބުދަ 17:36ހިންމަފުށިން ޖުމްލަ 7 ޕޮޒިޓިވް ކޭސް ފެނިފައިވޭ
ދޫނިދޫ ޖަލުގެ އިތުރުން ހިންމަފުށީ ޖަލުން ވެސް ވަނީ ކޮވިޑްގެ ކޭސްތަކެއް ފެނިފައި
މާލެއަތޮޅު ދޫނިދޫއާއި ހިންމަފުށިން ކޮވިޑް-19ގެ ކޭސްތަކެއް ފެނި ދެ ރަށް ވެސް މޮނިޓަރިންއަށް ލައިފިއެވެ.
އެޗްޕީއޭއިން ބުނީ ހިންމަފުށިން އެންމެ ފުރަތަމަ ކޭސް ފެނުނީ މި މަހު 19ގައި ކަމަށާއި އެ ދުވަހުން ފެށިގެން އެރަށް އޮތީ މޮނިޓަރިންގެ ހާލަތުގައި ކަމަށެވެ. ރަށު ކައުންސިލްގެ ރައީސް ޝާން މުހައްމަދު "ރާއްޖެޓިވީ" އަށް ވިދާޅުވީ އެރަށުން އެންމެ ފުރަތަމަ ޕޮޒިޓިވްވީ ހިންމަފުށީގައި ހުންނަ އައްސޭރި ޖަލުގެ ސެކިއުރިޓީ މުވައްޒަފެއް ކަމަށެވެ. އަދި މިހާރު ރަށުން ޕޮޒިޓިވްވެފައި ވަނީ 7 މީހުން ކަމަށާއި އެއީ ޖަލުގެ ސެކިއުރިޓީ އޮފިސަރުންގެ އިތުރަށް ވެއިޓަރުންތަކެއް ކަމަށް ވިދާޅުވިއެވެ. އޭނާ ވިދާޅުވީ މި ދެ ދުވަހު ރަށުން އާންމުންގެ ތެރެއިން ރެންޑަމް ސާމްޕަލް ނަގާފައިވާ ކަމަށާއި އަދި އޭގެ ނަތީޖާތައް ނުލިބޭ ކަމަށެވެ.
ޝާން ވިދާޅުވީ ޕޮޒިޓިވްވި ޖަލު މުވައްޒަފުންގެ ކޮންޓެކްޓުންގެ ގޮތުގައި ހިމެނޭ ގައިދީންގެ ސާމްޕަލްތައް ވެސް ނަގާފައިވާ ކަމަށާއި އަދި އޭގެ ނަތީޖާ ވެސް ނުލިބޭ ކަމަށެވެ.
މީގެ އިތުރަށް ދޫނިދޫން ވެސް ޕޮޒިޓިވް ކޭސްތަކެއް ފެނިފައިވާއިރު އެޗްޕީއޭއިން ބުނީ އެރަށުން މިހާތަނަށް 13 ޕޮޒިޓިވް ކޭސް ފެނިފައިވާ ކަމަށެވެ. ފުލުހުން ބުނީ ދޫނިދޫ އިން ޕޮޒިޓިވްވެފައި ވަނީ މައްސަލަތަކެއްގެ ތުހުމަތުގައި ފުލުހުންގެ ބެލުމުގެ ދަށަށް ދޫނިދޫ އަށް ގެންގޮސްފައިވާ ބައެއް ކަމަށެވެ. އަދި އެ ކޭސްތަކާ ގުޅިގެން ބަލަން ޖެހޭ ކަންކަން މިހާރު ބަލަމުން އަންނަ ކަމަށާއި، އަމަކުރަމުން އަންނަނީ އެޗްޕީއޭގެ ގަވާއިދާ އެއްގޮތަށް ކަމަށެވެ.
