ހިންމަފުށީގެ ފެންފަށަލަ ތަޣައްޔަރުވެފައިވާތީ، ދިމާވާ ދަތިތައް ރައީސްއާ ހިއްސާކުރައްވައިފި
12 ޑިސެމްބަރު 2019 | ބުރާސްފަތި 14:31ސްކޫލުގެ ޖާގައިގެ ދަތިކަމުގެ މައްސަލައަށް ހައްލު ހޯދުމާ ބެހޭ ގޮތުން މަޝްވަރާކުރެއްވި
ރައީސް ސޯލިހުއާއެކު ބޭއްވި ބައްދަލުކުރެއްވުމުގެ ތެރެއިން
ކ. ހިންމަފުށީގެ ފެންފަށަލަ ތަޣައްޔަރުވެފައިވާތީ، ރައްޔިތުންނަށް ދިމާވާ ދަތިތައް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި ޙިއްޞާކުރައްވައިފިއެވެ.
ބުރާސްފަތި ދުވަހު ރައީސް އޮފީހުގައި ބޭއްވި ބައްދަލުކުރެއްވުމުގައި ހިންމަފުށީގެ މިހާރުގެ ޙާލަތާއި، ރައްޔިތުންނަށް އެންމެ ބޮޑަށް ދަތިވެފައިވާ ކަންކަމާ ބެހޭ މަޢުލޫމާތު ކައުންސިލަރުން ރައީސް ޞާލިޙާއި ޙިއްޞާކުރެއްވިއެވެ.
އެގޮތުން، ރަށުގެ ނަރުދަމާ ނިޒާމުގެ މަސައްކަތް އަވަސްކުރުމާ ބެހޭގޮތުންނާއި، ރަށުގެ ފެންފަށަލަ ތަޣައްޔަރުވެފައިވާތީ އެކަމުގެ ސަބަބުން ރައްޔިތުންނަށް ދިމާވާ ދަތިތަކާއި، ސްކޫލުގެ ޖާގައިގެ ދަތިކަމާއި، ކުނި މެނޭޖުކުރުމުގައި ދިމާވާ ދަތިތަކާއި، ސިއްޙީ ޚިދުމަތް އިތުރަށް ތަރައްޤީކުރުމާ ބެހޭގޮތުން ކައުންސިލަރުން ރައީސް ޞާލިޙާއި މަޢުލޫމާތު ޙިއްޞާކުރެއްވިއެވެ.
މީގެއިތުރުން ވެސް ރަށުގެ ބަނދަރުބޮޑުކުރުމާއި މަރާމާތަށް ބޭނުންވާކަން ކައުންސިލަރުން ފާހަގަކުރެއްވިއެވެ. އަދި، ރަށުގައި އިޤްތިޞާދީ ކަންކަން އިތުރުކުރުމުގެ މުހިންމުކަން ކައުންސިލަރުން ފާހަގަ ކުރެއްވިއެވެ.
މިބައްދަލުކޮށްލެއްވުމުގައި ރައީސުލްޖުމްހޫރިއްޔާ ދެއްކެވި ވާހަކަފުޅުގައި، ކައުންސިލަރުން ފާހަގަކުރެއްވި މަޝްރޫޢުތަކުގެ އެންމެފަހުގެ މަޢުލޫމާތު ޙިއްޞާކުރެއްވިއެވެ. މީގެ އިތުރުން ކައުންސިލަރުން އެދިވަޑައިގެންނެވި މުހިންމު ކަންކަމަށް ކަމާބެހޭ އިދާރާތަކާ މަޝްވަރާކުރައްވައިގެން ޙައްލު ހޯއްދަވައިދެއްވުމަށް މަސައްކަތްކުރައްވާނެކަމަށް ވެސް އެމަނިކުފާނު ވިދާޅުވިއެވެ.
