ބްރައިޓަނާ އެއްވަރުވި ނަމަވެސް، ޗެލްސީ ހަތަރަކަށް

އިނގިރޭސި ޕްރިމިއާ ލީގުގައި އަންގާރަ ދުވަހުގެރޭ ބްރައިޓަނާ އެއްވަރުވި ނަމަވެސް، ތާވަލުގެ ހަތަރުވަނައަށް ޗެލްސީ ޖެހިލައިފިއެވެ.

އަންގާރަ ދުވަހުގެރޭ ޗެލްސީ އާއި ބްރައިޓަން ބައްދަލުކުރި މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

ޗެލްސީގެ ދަނޑުގައި ކުޅުނު މި މެޗުގައި އެ ޓީމަށް އެންމެ އެދެވޭ ކުޅުމެއް ނުދެއްކުނު ނަމަވެސް، ފުރަތަމަ ހާފުގައި ލީޑު ނަގަން އެ ޓީމުގެ ޒުވާން ތަރި ކައި ހަވާޓްޒްއަށް ވަނީ ރަނގަޅު ފުރުޞަތެއް ލިބިފައެވެ. އެކަމަކު އޭރިއާ ތެރެއިން އޭނާ ފޮނުވާލި ހަމަލާ ބްރައިޓަނުގެ ގޯލްކީޕަރު ވަނީ ދިފާއުކޮށްފައެވެ.

އޭގެ ފަހުން މި މި މެޗުގައި ލީޑު ނަގަން އެންމެ ރަނގަޅު ފުރުސަތުތަކެއް ލިބިފައިވަނީ ބްރައިޓަނަށެވެ. މެޗުގެ ފަހުކޮޅު ޗެލްސީގެ ކާޓް ޒޫމާ ހެދި ގޯހެއްގެ ފައިދާ ނަގައި، ބްރައިޓަނުގެ އެޑަމް ލަލާނާއަށް ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ނުރައްކާތެރި ހަމަލާ ޗެލްސީގެ ގޯލްކީޕަރު ކެޕާ އަރިއްޒަބަލާގާ ވަނީ މަތަކޮށްފައެވެ. އަދި އޭގެ ފަހުން ބްރައިޓަނުގެ ޑެނީ ވެލްބެކް ފޮނުވާލި ހަމަލާއެއް ވަނީ ގޯލުގެ އަރިމަތީ ދަނޑިއަށް އަމާޒުވެފައެވެ.

އެކަމަކު މި މެޗު ބްރައިޓަނުން ނިންމާލަން ޖެހުނީ އެއް ކުޅުންތެރިއަކު މަދުކޮށެވެ. އެއީ މެޗުގެ އިތުރު ވަގުތުގައި ޗެލްސީގެ ކަލުމް ހަޑްސަން-އޮޑޯއިއަށް ކުރި ފައުލަކަށް، ބްރައިޓަނުގެ ބެން ވައިޓަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ.

މި މެޗުން ލިބުނު ޕޮއިންޓަކާއެކު ތާވަލުގެ ހަތަރުވަނައަށް ޗެލްސީ ޖެހިލިއިރު، އެ ޓީމަށް ވަނީ 32 މެޗުން 55 ޕޮއިންޓް ލިބިފައެވެ. ތާވަލުގެ ފަސްވަނައަށް ވެއްޓުނު ވެސްޓް ހޭމް ޔުނައިޓެޑަށްވެސް 32 މެޗުން 55 ޕޮއިންޓް ލިބިފައިވާއިރު، ޗެލްސީއަށް ކުރިލިބެނީ ލަނޑުގެ ތަފާތުންނެވެ. އަދި ޗެލްސީއާ އެއްވަރުކުރި ބްރައިޓަން އޮތީ ތާވަލުގެ 16 ވަނައިގައި 32 މެޗުން 34 ޕޮއިންޓާއެކުއެވެ.