އަލުން މުރާޖައާ ކުރުމަށްފަހު، ދައުވާ ނުކުރުމަށް ކުރިން ޕީޖީން ނިންމި ނިންމުން ވަނީ ދަމަހައްޓާފައި
ޕްރޮސެކިއުޓަރ ޖެނެރަލް ހުސައިން ޝަމީމް - ވެންޓިލޭޓަރު މައްސަލައިގައި ދައުވާކުރެވޭނެކަމުގެ އުއްމީދު އެބައޮތް ކަމަށް ޝަމީމް ވަނީ ވިދާޅުވެފައި
ކޮވިޑް-19 އާ ގުޅިގެން ގަންނަން ހަވާލުކުރި ވެންޓިލޭޓަރުގެ މަސައްލައިގައި ޕްރޮސެކިއުޓަރ ޖެނެރަލް (ޕީޖީ) އޮފީހަށް ފާހަގަ ކުރެވެނު ކަންތައްތަކުގެ ތެރެއިން އެންޓި ކޮރަޕްޝަން ކޮމިޝަން (އޭސީސީ)އަށް ހުށަހަޅާފައިވާ ކަންކަން ބަލައި ނިމުމުން މި މައްސަލައިގައި ދައުވާކުރަން ފޮނުވާނެ ކަމަށް ޕީޖީ ހުސައިން ޝަމީމް ވިދާޅުވެއްޖެއެވެ.
ކޮވިޑް-19 އާ ގުޅިގެން ހެލްތުގެ މިނިސްޓްރީގެ ފަރާތުން ރާއްޖެ ގެނައުމަށް މަސައްކަތްކުރި ވެންޓިލޭޓަރުތަކާ ބެހޭ މައްސަލައިގައި، އެންޓި ކޮރަޕްޝަން ކޮމިޝަނުން، ޕީޖީ އޮފީހަށް ހުށަހެޅި އިތުރު މައުލޫމާތުތަކާ ގުޅިގެން، މައްސަލަ އަލުން މުރާޖައާ ކުރުމަށްފަހު، ދައުވާ ނުކުރުމަށް ކުރިން ޕީޖީން ނިންމި ނިންމުން ވަނީ ދަމަހައްޓާފައެވެ. ވެންޓިލޭޓަރު މައްސަލައިގައި ޓީވީ ޕްރޮގްރާމެއްގައި ވާހަކަ ދައްކަވަމުން ޕީޖީ ޝަމީމް ވިދާޅުވީ މީހަކު ކުށެއް ނުކުރާކަން ނުވަތަ މީހެއް ކުށެއްކޮށްފައި ނުވާކަން ސާބިތު ނުކޮށްދެވޭނެކަން އެނގިހުރެ ދައުވާއެއް ކުރުމަކީ ވަރަށް ޒިންމާދާރުކަން ކުޑަކަމެއް ކަމަށެވެ. އަދި ވެންޓިލޭޓަރު މައްސަލައިގައި ދައުވާކުރެވޭ ވަރުގެ މައްސަލައެއް އޮތް ނަމަ ދައުވާ ކުރައްވާނެ ކަމަށެވެ.
ޝަމީމް ވިދާޅުވީ މި މައްސަލައިގެ ހައްސާސްކަމުން އާންމުކޮށް ބަލާ މިންވަރަށްވުރެ ގާތުން މި މައްސަލަ ބަލާފައި ވާނެ ކަމަށެވެ. އަދި 2 ފަހަރެއްގެ މަތިން އަލުން މުރާޖަޢާ ވެސް ކޮށްފައިވާ އިރު، އެންމެ ފަހުން ބެލި ބެލުމުން ވެސް އިތުރު ކަންތައްތަކެއް ފާހަގަކުރެވިގެން އޭސީސީގައި އެކަންކަން ބަލާފައި ފޮނުވައި ދިނުމަށް އެދިފައިވާނެ ކަމަށް ޝަމީމް ވިދާޅުވިއެވެ.
މި މައްސަލައިގައި އަދިވެސް ބުރަ ވެވެނީ ތަހުގީގީ އިދާރާތަކުން ކުރާ މަސައްކަތްތަކަށް ކަމަށް ޝަމީމް ވިދާޅުވިއެވެ. ސަބަބަކީ ޕީޖީ އޮފީހަކީ ތަހުގީގުކުރާ އިދާރާއަކަށް ނުވުމުން، ކޯޓުގައި ޕީޖީ އޮފީހުގެ ހޯދުންތަކުގެ ވާހަކައެއް ނުދެއްކޭނެ ކަމަށެވެ. އަދި ދައްކައިފި ނަމަ އެއީ ރަނގަޅު ވާހަކައަކަށް ވެސް ނުވާނެ ކަމަށާއި، އެއީ ގާނޫނުގައި ކަނޑައަޅާފައިވަނީ ތަހުގީގު ކުރަން ޖެހޭނީ ވަކި އިދާރާއަކުން ކަމާއި ދައުވާ ކުރަން ޖެހޭނީ ވަކި އިދާރާއަކުން ކަމަށްވުމުން ކަމަށް ޝަމީމް ވިދާޅުވިއެވެ.
ޝަމީމް މީގެ ކުރިން ވިދާޅުވީ، އޭސީސީއާއި ފުލުހުން ގުޅިގެން ހިންގި ތަހުގީގުގައި، މިހާތަނަށް، އެ ފައިސާ ޖަމާވެފައި ވަނީ ކޮންކޮން އެކައުންޓްތަކަކަށް ކަމެއް، ނުވަތަ އެފައިސާ ލިބިފައިވަނީ ކާކަށް ކަމެއް އެނގިފައި ނުވާ ކަމަށެވެ. އަދި އެކަން އޭސީސީން ފޮނުވި، ސިޓީގައި ވެސް ފާހަގަ ކޮށްފައިވާކަމަށް ޝަމީމް ވިދާޅުވިއެވެ.
އޭސީސީން ފަހުން ފޮނުވި ރިޕޯޓުގައި، އެކައުންޓުތަކެއްގެ މައުލޫމާތު ހިމަނާފައިވާކަމަށާއި، އެހެން ނަމަވެސް، ތުހުމަތު ކުރާ މިންވަރަށް، އެ އެކައުންޓުތަކަށް ފައިސާ ޖަމާވެފައިވާކަން ތަހުގީގަށް އެނގިފައި ނުވާކަމަށް ޝަމީމް ވިދާޅުވިއެވެ. އަދި ކޮރަޕްޝަނުގެ ފައިސާއާއި އެކައުންޓުތަކަށް ވަދެފައިހުރި ފައިސާއާ ގުޅުމެއް ހުރިކަން ތަހުގީގަށް އެނގިފައި ނުވާކަމަށް، އޭސީސީން ފޮނުވި ސިޓީގައި ބަޔާންކޮށްފައި ވާކަމަށް ޝަމީމް ކުރިން ވިދާޅުވެފައިވެއެވެ.
ދުބާއީގެ ކުންފުންޏެއްކަމަށްވާ އެގްޒެކިއުޓާސް ޖެނެރަލް ޓްރޭޑިންއާ އެކު 75 ވެންޓިލޭޓަރު ސަޕްލައިކޮށްދިނުމަށް އެއްބަސްވެފައި ވާއިރު، މިހާތަނަށް ލިބިފައިވަނީ އެންމެ 15 ވެންޓިލޭޓަރެވެ. އެ އެއްބަސްވުން ހެދި އިރު އެއްވެސް ގެރެންޓީއަކާ ނުލާ އެ ކުންފުންޏަށް ވަނީ އެޑްވާންސަށް 30.91 މިލިއަން ރުފިޔާ ދީފައެވެ.
