ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމުކުރާ ތިންވަނަ ޑިވިޝަން ފުޓްބޯޅަ މުބާރާތުގެ ކުޅުން އާދީއްތަ ދުވަހުގެރޭ ފަށައިފިއެވެ.
މާފަންނު ޓާފް ދަނޑުގައި ކުރިއަށްދާ މި މުބާރާތުގެ ކުޅުން އާދީއްތަ ދުވަހުގެރޭ ފެށިއިރު، މިހާތަނަށް ވަނީ ދެ މެޗެއް ކުޅެފައެވެ. އެގޮތުން މި މުބާރާތުގައި ކުޅުނު ފުރަތަމަ މެޗުން އާދީއްތަ ދުވަހުގެރޭ ޓެންޓް ސްޕޯޓްސް ކުލަބު ވަނީ ކުލަބު ބްލޫ ލެޕާޑް ސްޕޯޓްސް އަތުން 4-1 ގެ ނަތީޖާއަކުން މޮޅުވެފައެވެ.
މި މެޗުގެ ފުރަތަމަ ހާފުގައި ޓެންޓުން ދެ ލަނޑުގެ ލީޑެއް ނެގިއިރު، މެޗުގެ 13 ވަނަ މިނެޓުގައި އެ ޓީމުގެ ފުރަތަމަ ލަނޑު ޖަހައިދީފައިވަނީ އިބްރާހީމް ސަނޫނެވެ. އަދި މެޗުގެ 29 ވަނަ މިނިޓުގައި ޔާމީން އިބްރާހިމް ވަނީ ޓެންޓަށް ލީޑު ފުޅާކޮށްދީފައެވެ. ދެން މި މެޗުގައި ޓެންޓުން ކާމިޔާބުކުރި އަނެއް ދެ ލަނޑު، ދެވަނަ ހާފުގައި ކާމިޔާބުކޮށްދިނީ އަޒްމާން އަޙްމަދެވެ. މި މެޗުގައި ބްލޫ ލެޕާޑުން ކާމިޔާބުކުރި ހަމައެކަނި ލަނޑު، މެޗުގެ އިތުރު ވަގުތުގައި ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އަޙްމަދު ފިރާޝެވެ.
މީގެ އިތުރުން މި މުބާރާތުގައި ހޯމަ ދުވަހުގެރޭ ވިލިމާލެ ޔުނައިޓެޑާއި ލޮރެންޒޯ ސްޕޯޓްސް ކުލަބު ބައްދަލުކުރި މެޗު ނިމުނީ 3-3 ގެ ނަތީޖާއަކުން ދެ ޓީމު އެއްވަރުވެގެންނެވެ.
ފޯރިގަދަ ކުޅުމެއް ފެނިގެންދިޔަ މި މެޗުގެ 18 ވަނަ މިނެޓުގައި ހަސަން ނަސީރު ވަނީ ވިލިމާލެ ޔުނައިޓެޑަށް ލީޑު ނަގައިދީފައެވެ. އެކަމަކު ދެވަނަ ހާފު ފަށައިގެން ތިންވަނަ މިނެޓުގައި ތޯހާ ޔޫސުފުގެ ލަނޑުން ލޮރެންޒޯއިން ނަތީޖާ އެއްވަރުކުރިއިރު، 58 ވަނަ މިނެޓުގައި އާދަމް ނުޒައިރު ވަނީ ލޮރެންޒޯއަށް ލީޑު ނަގައިދީފައެވެ.
އެކަމަކު އޭގެ ފަސް މިނެޓު ފަހުން ވިލިމާލެ ޔުނައިޓެޑަށް ނަތީޖާ އެއްވަރުކޮށްދިނީ ހުސައިން ރަޝީދު މޫސާއެވެ. އަދި މެޗުގެ 77 ވަނަ މިނެޓުގައި ލިބުނު ޕެނަލްޓީއަކުން އަބްދުﷲ އިލްހާމް ވިލިމާލެ ޔުނައިޓެޑަށް ދެވަނަ ފަހަރަށް ލީޑު ނަގައިދިން ނަމަވެސް، މެޗު ނިމެން ހަތް މިނެޓަށް ވެފައި ވަނިކޮށް އައިމަން ތައުފީގު ވަނީ ލޮރެންޒޯއަށް އަލުން ނަތީޖާ އެއްވަރުކޮށްދީފައެވެ.
ތިންވަނަ ޑިވިޝަނުގެ ކުޅުން އާދީއްތަ ދުވަހުގެރޭ ފެށިއިރު، މި މުބާރާތުގައި 14 ޓީމެއް ވާދަކުރެއެވެ. ހަތަރު ގްރޫޕަކަށް ބަހާލައިގެން މި މުބާރާތް ކުރިއަށްދާއިރު، ގްރޫޕް ސްޓޭޖް މެޗުތަކަށްފަހު ކުއާޓާ ފައިނަލަށް ކޮންމެ ގްރޫޕަކުންވެސް އެންމެ މޮޅު ދެ ޓީމު ދަތުރުކުރާނެއެވެ. ކުއާޓާ އާއި ސެމީގެ މެޗުތަކަށްފަހު މުބާރާތުގެ ފައިނަލް މެޗު ކުޅުމަށް މިހާރު ތާވަލުކޮށްފައިވަނީ މެއި މަހުގެ 24 ވަނަ ދުވަހުއެވެ.
