ކާޑު އޭޖެންޓުންގެ ފުރިހަމަ ފައިދާ މިއަދު ފެންނަމުން އެބަދޭ - އެސްޓީއޯ

ކާޑު އޭޖެންޓުންގެ ފުރިހަމަ ފައިދާ މިއަދު ފެންނަމުންދާކަމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ މެނޭޖިން ޑިރެކްޓަރ ހުސެއިން އަމްރު ވިދާޅުވެއްޖެއެވެ.

ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުން އެސްޓީއޯގެ މެނޭޖިން ޑިރެކްޓަރ ހުސެއިން އަމްރު ވަނީ ރަށްރަށަށް ކާޑު ގެންދިއުމާއި ކާޑުގެ ސްޓޮކް ބެލެހެއްޓުމަށް ކާޑު އޭޖެންޓުން 2019 އަހަރު ކަނޑައަޅާފައިވާއިރު، މި ކަމަކީ ކާމިޔާބީއެއްކަމަށް ސިފަކުރައްވާފައެވެ. އެގޮތުން މިއަދު ރަށްރަށުގައި ކާޑުގެ އަގުތައް މާލެއެކޭ އެއްއަގެއްގައި ލިބެން ހުންނައިރު، ދަތިކަމެއް ނެތި މިތަކެތި ގުދަން ކުރެވިފައިވާކަމަށް ވިދާޅުވިއެވެ. މިއަދު ރާއްޖޭގައި ޖުމްލަ 300ށް ވުރެ ގިނަ ކާޑު އޭޖެންޓުން އެބަ ތިބިކަމަށް ވިދާޅުވިއެވެ. މީގެ ކުރިން ކާޑު ވިއްކުމުގެ ވިޔަފާރިއަކީ ގެއްލުމުގައި ކުރަމުންދިޔަ ވިޔަފާރިއެއްކަން ފާހަގަކުރައްވާ އަމްރު ވަނީ މިއަދު މި ވިޔަފާރިން ބޮޑު ފައިދާއެއް ލިބެމުންދާކަމަށް ވިދާޅުވެފައެވެ. ޕެންޑަމިކްގެ ޙާލަތުގައިވެސް ރާއްޖޭގެ ރަށްރަށަށް އެކަށޭނަ މިންވަރަށް ކާޑު ފޯރުކޮށްދިނުމުގައި އެސްޓީއޯގެ ކާޑު އޭޖެންޓުންނާއި، ސްޓޭޓް ޝިޕިންގެ ރޯލް ބޮޑުކަން އަމްރު ފާހަގަކުރެއްވިއެވެ. އެގޮތުން ޕެންޑަމިކްގެ ދަތި ޙާލަތުގައި އިންޑިއާއާއި އަވައްޓެރި ޤައުމުތަކުން ބޭހާއި ކާޑު ރާއްޖެ ގެނެސްފައިވުމުން މިއަދު ރާއްޖެއަކީ މި ބަލިމަޑުކަމުގައި އެންމެ ކާމިޔާބު ހޯދާފައިވާ އެއް ޤައުމުގެ ގޮތުގައި ގުނާލެވޭކަމަށް ވިދާޅުވިއެވެ.

Advertisement

ރޯދަމަހަށް އެސްޓީއޯއިން ވި ތައްޔާރީތަކަށް އަލިއަޅުއްވާލައްވަމުން، އަމްރު ވިދާޅުވީ ރޯދަމަހަށް ޚާއްސަކޮށް ފިޔާ، އަލުވި ބިހުގެ ޝިޕްމަންޓްތައް 2 މަސްކުރިން ރާއްޖެ ގެނެސް ރާއްޖޭގެ ހުރިހާ ސަރަހައްދެއްގައި ގުދަން ކުރެވިފައިވާކަމަށެވެ. މީގެ އިތުރުން އިންޑިއާގެ ޓުޓިކޮރިންއިން އައްޑޫ، ކުޅުދުއްފުށި އަދި ތިނަދޫއަށް ސީދާ ދަތުރުތައް ފަށާފައިވުމުންވެސް ކާޑު ގެނައުމަށް ބޮޑެތި ލުއިފަސޭހަތަކެއް ލިބިފައިވާކަމަށް ވިދާޅުވިއެވެ.

ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒްވަނީ ޑިމާންޑް ބޮޑުވިޔަސް މުޅި މަހު އެއް އަގެއްގައި ކާޑު ލިބޭނެ އިންތިޒާމު ސްޓޭޓް ޓްރޭޑިން އޯގަނައިޒޭޝަން، އެސްޓީއޯ މެދުވެރިވެގެން ކުރަމުންދާކަމަށް ވިދާޅުވިއެވެ. އެގޮތުން މި މަހަށް ބޭނުންވާވަރަށް ހަނޑޫ ހަކުރު ފުށް އަދި މީގެ އިތުރުން ފިޔާ، އަލުވި، ބިސް ލިބި ރާއްޖޭގެ އެކި ސަރަހައްދުތަކަށް ބެހުމުގެ މަސައްކަތް ކުރަމުންދާކަމަށް ވިދާޅުވިއެވެ. މިކަން ރާއްޖެއަށް އިމްޕޯޓްކޮށް ކްލިއަރކުރާ ކޮންޓެއިނަރުގެ އަދަދު 150ން 270 ކޮންޓެއިނަރަށް އިތުރުވުމުން ހާމަކޮށްދޭކަމަށް ވިދާޅުވިއެވެ. އެސްޓީއޯގެ 217 އޭޖެންޓުން ރާއްޖޭގެ އެކި ކަންކޮޅުތަކުގައި ތިބިކަން ފާހަގަކުރައްވާ މަބްރޫކް ވަނީ ރަށްރަށުގައި މި ފަދަ ޒަރޫރީ ކާބޯތަކެތީގެ ޔަޤީންކަން ކަށަވަރުކުރުމަށް ގުދަންކުރަމުންދާކަމަށެވެ. އެގޮތުން މިހާތަނަށް އައިރު އެއްލައްކަ ބަސްތާ ހަނޑޫ، 50،000 ބަސްތާ ފުށް އަދި 27،000 ބަސްތާ ހަކުރު ގުދަންކުރެވިފައިވާކަމަށް ވިދާޅުވިއެވެ.

މީގެ އިތުރުން މި މަހު ރާއްޖޭގެ ދަނޑުވެރިން އުފައްދާ ކަރާ މިރުސް އަދި ކާށީގެ އަގު ހިފެހެއްޓުމަށް އެގްރޯނެޓުން ގިނަ މަސައްކަތްތަކެއް ކުރަމުންދާކަމަށް ވިދާޅުވިއެވެ. އެގޮތުން މިހާތަނަށް އައިރު 363 ދަނޑުވެރިއަކާއެކު ކޮންޓްރެކްޓް ހަދާފައިވާކަމަށް މަބްރޫކް ވިދާޅުވިއެވެ. މީގެ އިތުރުން ވެމްކޯއާއި، ޓްރެފިކް ޕޮލިހުންވެސް ރޯދަމަހު އަންނަ ބަދަލުތަކަށް ތައްޔާރުވެފައިވާކަމަށް ވިދާޅުވިއެވެ.