އިއްޔެ ރާއްޖެއިން ވެކްސިން ޖެހި މީހުންގެ އަދަދު 6،000ން މަތީގައި
18 އެޕްރީލު 2021 | އާދީއްތަ 14:22ހޮނިހިރު ދުވަހު ވެކްސިންގެ ފުރަތަމަ ޑޯޒު ޖެހީ 1،233 މީހުން
ވެކްސިން ޖެހުމަށް އިސްލާމީ މަރުކަޒު ބޭރުގައި ހަދާފައި ކިއު
ހޮނިހިރު ދުވަހު މުޅި ރާއްޖެއިން 6،169 މީހަކު ވެކްސިން ޖަހާފައިވާކަމަށް އެޗްޕީއޭގެ ތަފާސްހިސާބުތަކުން ދައްކައިފިއެވެ.
އެޗްޕީއޭގެ ތަފާސްހިސާބުތައް ދައްކާގޮތުން ހޮނިހިރު ދުވަހު ވެކްސިންގެ ފުރަތަމަ ޑޯޒު ޖެހީ 1،233 މީހުންނެވެ. ދެވަނަ ޑޯޒު ޖެހީ 4،936 މީހުންނެވެ. އެންމެ ގިނައިން ދެވަނަ ޑޯޒު ޖަހާފައި ވަނީ މާލެ ސަރަހައްދުންނެވެ.
މިއާއެކު މުޅި ރާއްޖެއިން ވެކްސިން ޖެހި މީހުންގެ ޖުމްލަ އަދަދު 279،301ށް އަރާފައިވާއިރު އޭގެ ތެރެއިން 40،230 މީހުން ވަނީ ވެކްސިންގެ ދެވަނަ ޑޯޒު ޖަހާފައެވެ.
ފެބްރުއަރީ މަހު ކޮވިޝީލްޑް ވެކްސިންގެ ފުރަތަމަ ޑޯޒް ޖެހި މީހުންނަށް މިހާރު އަންނަނީ ދެވަނަ ޑޯޒް ދެމުންނެވެ. މާލެ ސަރަހައްދުގައި ދެވަނަ ޑޯޒްދެމުން އަންނަނީ، ސޯޝަލް ސެންޓަރާއި ނެޝަނަލް އާޓް ގެލަރީ، ރައްޔިތުންގެ މަޖިލީހާއި ހުޅުމާލޭ ވެކްސިނޭޝަން ސެންޓަރުގެ އިތުރުން ސެނެހިޔާ ހޮސްޕިޓަލާއި ވިލިމާލޭ ޒުވާނުންގެ މަރުކަޒުންނެވެ.
މި ތަންތަނުގައި ވެކްސިން ޖަހަންދާ މިހުންގެ ކިއު ދިގުވެ ކިއުތަކުގައި އެއްވެސް ހަމައެއް އުސޫލެއް ނޯންނަކަމުގެ މައްސަލަތައް ފެންމަތިވެފައިވާއިރު، އެޗްޕީއޭއިން ބުނީ އެކަން ހައްލުކުރުމަށް މަސައްކަތްކުރަމުން އަންނަ ކަމަށެވެ. ރޯދަ މަހު ވެކްސިން ޖަހައިދެނީ ރޭގަނޑު 9ން ފެށިގެން 11:45އާ ހަމައަށެވެ.
ފުރަތަމަ ޑޯޒް ޓްރީޓޮޕް ހޮސްޕިޓަލުން ޖަހައިދެމުން އަންނައިރު ފުރަތަމަ ޑޯޒްގެ ގޮތުގައި މިހާރު ދެމުން އަންނަނީ ޗައިނާގެ ސިނޮފާރމް ވެކްސިނެވެ. މި ވެކްސިން ޖަހަނީ އުމުރުން 18 އަހަރާއި 60 އަހަރާ ދެމެދުގެ މީހުންނަށެވެ. ޚާއްސަ ހާލަތުގައި ފައިޒަރ ވެކްސިން ދޭންވެސް ވަނީ ފަށާފައެވެ. އެ ވެކްސިން ދެނީ އެޕޮއިންޓްމަންޓު އުސޫލުންނެވެ.
