މެދުރާސްތާ ބަޖެޓްގައި ހިމަނާނެ އައު މަޝްރޫޢުތަކާއި ޕްރޮގްރާމްތައް ހުށަހަޅަން އަންގައިފި
މި މައުލޫމާތުތައް ޖޫން 30 ކުރިން ފޮނުވަން ފިނޭންސް މިނިސްޓްރީން ވަނީ އަންގާފައި
ފިނޭންސް މިނިސްޓްރީ
ސަރުކާރުން ނިއު ޕޮލިސީ އިނީޝިއޭޓިވްއަށް ތައްޔާރުވުމުގެ ގޮތުން 2022-2024 ވަނަ އަހަރަށް ލަފާކުރާ މެދު ރާސްތާ ބަޖެޓު ތައްޔާރުކުރުމަށްޓަކައި ސަރުކާރުގެ އިދާރާތަކުން އަލަށް ފެށުމަށް ރާވާފައިވާ ޕްރޮގްރާމްތަކާއި މަޝްރޫޢުތަކުގެ މައުލޫމާތު ހުށަހަޅަން ފިނޭންސް މިނިސްޓްރީން އެދެފިއެވެ.
ފިނޭންސް މިނިސްޓްރީން އިއުލާނުކޮށްފައިވާ ސާކިއުލާގައިވާ ގޮތުން މި ބަޖެޓަކީ ސްޓްރެޓެޖިކް އެކްޝަން ޕްލޭނާއި ނޭޝަނަލް ރެޒިލިއެންސް އެންޑް ރިކަވަރީ ޕްލޭންގެ މައްޗަށް ބިނާކޮޮށް ތައްޔާރުކުރާ ޕްރޮގްރާމު ބަޖެޓެކެވެ.
ނިއު ޕޮލިސީ އިނިޝިއޭޓިވްސްގެ ގޮތުގައި ހުށަހަޅާނީ ބަޖެޓްގައި ހިމެނުމަށް ބޭނުންވާ އައު ކަންތައްތަކާއި ބަޖެޓުން އިތުރަށް ޖާގަ ބޭނުންވާތީ ހުށަހަޅާ ކަންތައްތައް ކަމަށް ފިނޭންސް މިނިސްޓްރީގެ ސަރކިޔުލަރގައި ބުނެފައިވެއެވެ. މިގޮތުން ނިއު ޕޮލިސީ އިނިޝިއޭޓިވްސްގެ ގޮތުގައި ހުށަހަޅާ ކަންކަން ބަޖެޓްގައި ހިމެނުމާމެދު ގޮތެއް ނިންމާނީ ފިނޭންސް މިނިސްޓްރީ އާއި ރައީސުލްޖުމްހޫރިއްޔާގެ އޮފީހުންނެވެ.
މި ބަޖެޓް އެކުލަވައިލުމަށްޓަކައި އިދާރާތަކުން ހިންގަން ރާވާ ކަންކަމާއި އެ އިދާރާއަކުން ހިންގާނެ ޕްރޮޖެކްޓްތަކުގެ ތަފްސީލު ހުށަހަޅަން ޖެހެއެވެ. އަދި ނިއު ޕޮލިސީ އިނީޝިއޭޓިވްގެ ދަށުން ބަޖެޓަށް ގެންނާނެ އައު ކަންކަން ވެސް ހިމަނަން ޖެހެއެވެ. ފިނޭންސް މިނިސްޓްރީން ވަނީ އައު ކަންކަން ހުށަހަޅަން ސަރުކާރުގެ ހުރިހާ އިދާރާތަކަށް ބަޖެޓުގެ ވަކި މިންގަނޑެއް ނުވަތަ ސީލިންގެއް ކަނޑައަޅައިފައެވެ.
ފިނޭންސް މިނިސްޓްރީން ބުނީ މިގޮތަށް އޮފީސްތަކަށް ކަނޑައަޅާފައިވާ ސީލިންގަކީ ރައްޔިތުންގެ މަޖިލީހަށް ބަޖެޓް ހުށަހަޅާ އިރު ކަނޑައާޅާފައިވާ ސީލިންގެއް ނޫންކަމަށެވެ. އެހެންކަމުން މެދު ރާސްތާގެ ބަޖެޓުގެ ގޮތުގައި އޮފީސްތަކަށް ދީފައިވާ ބަޖެޓުގެ އަދަދު ތަފާތުވާނެއެވެ.
ނިއު ޕޮލިސީ އިނީޝިއޭޓިވްތައް ނުވަތަ ބަޖެޓަށް ހުށަހަޅާ އައު ކަންކަން މިނިސްޓްރީތަކާއި އިދާރާތަކުން ހުށަހަޅާނީ isles.gov.mv މެދުވެރިކޮށެވެ. މި މައުލޫމާތުތައް ޖޫން 30 ކުރިން ފޮނުވަން ފިނޭންސް މިނިސްޓްރީން ވަނީ އަންގާފައެވެ.
