ޚަރަދުތައް ހަމަޖައްސަން ސަޕްލިމެންޓަރީ ބަޖެޓް ހުށަހަޅާތީ މީގެ ކުރިން ރައީސް ޑރ.މުހައްމަދު މުއިއްޒު ވެސް އަދި ސަރުކާރުގެ އިސް މީހުންވެސް އަމާޒުކުރެއްވީ އިންތިހާ ފާޑުކިޔުމެވެ. އެހެންނަމަވެސް ވެރިކަން ހިންގަންވީމަ މިއަދު ސަޕްލިމަންޓަރީ ބަޖެޓެއް ރައްޔިތުންގެ މަޖިލީހަށް ހުށަހެޅުމަށް ނިންމާ އެކަން ވެސް އެދަނީ ކުރައްވަމުންނެވެ. ހައިރާންވާން ޖެހޭ ކަމަކީ ސަޕްލިމެންޓަރީ ބަޖެޓެއް ހުށަހަޅާ އިރު ބަޖެޓު ހޭދަކުރި ގޮތާއި މެދު ތިއްބެވީ ހަނުކަމެވެ.
ސަޕްލިމެންޓަރީ ބަޖެޓެއް ހުށަހަޅާކަން ހޮނިހިރު ދުވަހު އެކަން ހާމަކުރެއްވީ މާލީ ވަޒީރު މޫސާ ޒަމީރުއެވެ. ވިދާޅުވަނީ ކޭޝްފްލޯ ބެލެހެއްޓުމުގައި ދަތިތަކެއް ދިމާވެފައިވާ ކަމަށެވެ. އަދި ދައުލަތުގެ ޚަރަދުތައް ފޫބެއްދުމަށް އެހެނިހެން އަހަރުތަކެކޭ އެއްފަދަައިން މި އަހަރުވެސް ސަޕްލިމެންޓަރީ ބަޖެޓެއް ހުށަހަޅާނެކަން ހާމަކުރެއްވިއެވެ. އަދި މިހާތަނަށް ސަޕްލިމެންޓަރީ ބަޖެޓުގެ ސީދާ އަދަދު އަދި ކަނޑައަޅާފައެއް ނުވެއެވެ. ވިދާޅުވަނީ ހުށަހަޅާނީ ކިހާ ވަރެއްގެ ސަޕްލިމެންޓަރީ ބަޖެޓެއް ކަން ކަނޑައަޅާ ނިންމާނީ ކެބިނެޓުގެ އިތުރު ލަފާ ހޯދައި އަދި ރައީސުލްޖުމްހޫރިއްޔާގެ ލަފައާ އެއްކޮށް، އޮޑިޓާ ޖެނެރަލްގެ ރިޕޯޓު ވެސް ލިބުމުން ކަމުގައެވެ.
ސަޕްލިމެންޓަރީ ބަޖެޓަކާއި ހިސާބަށް ދިޔަ އިރު ބަޖެޓްކޮށްފައި ހުރި މަޝްރޫޢުތައް ހުރީ ނުހިނގައެވެ. އާ ޕްރޮޖެކްޓެއް ނުހިނގައެވެ. އާމްދަނީ ވީ އިތުރެވެ. ބަޖެޓް ހޭދަ ކުރި ގޮތުގެ ތަފްސީލް ހާމައެއް ނުކުރައްވައެވެ. އެކަމަކު ވަކާލާތުކުރައްވަނީ ތިމާމެންނަކީ އިސްވެ ކަންކަން ހާމަކުރާ ބައެއްކަމަށް ދެއްކުމަށެވެ. ދެން އޮތްކަމަކީ ޚަރަދުކުޑަ ނުކޮށްފި ނަމަ ސަޕްލިމެންޓަރީ ބަޖެޓު 10 ބިލިއަން އަށް އަރާފާނެ ކަމަށް ބުނެފައި އަދިވެސް ޚަރަދު ކުޑަކުރަން އުޅުއްވާ ތަނެއް ނުފެނުމެވެ. އެ ޚަރަދުވެސް ސަލާމަތްކުރައްވާނެ ގޮތެއް ބުނެއެެއް ނުދެއެވެ.
ސަޕްލިމެންޓަރީ ބަޖެޓް ހުށަހަޅަމުން އަންނަ ގޮތާއި މެދު ސަރުކާރުން ވަނީ ކަންބޮޑުވުން ފާޅުކޮށްފައެވެ. އެކަމާއި ގުޅޭގޮތުން ބަންޑާރަ ނައިބު އަހުމަދު އުޝާމް ވިދާޅުވީ ޤާނޫނު އަސާސީގައި ބުނާގޮތުން ދައުލަތުގެ ޚަރަދުތައް ކުރަން ޖެހެނީ މަޖިލީހުން ފާސްކުރާ ބަޖެޓާއި އެއްގޮތަށް ކަމަށެވެ. ބަޖެޓްކޮށްފައިވާ މިންވަރަށް ވުރެ އިތުރަށް ޚަރަދުކޮށްގެން ނުވާނެކަން ވަރަށް ސާފުކޮށް އެނގެން އޮތް ކަމަށް އުޝާމް ވިދާޅުވިއެވެ. މަޖިލީހަށް ބަޖެޓް ހުށަހަޅާފައި ހުންނަނީ ސަޕްލިމެންޓްކުރުމަށް ފަހުގައި ކަމަށާއި، ޚަރަދު ކުރުމަށް ފަހު އެކަން ކުރުމަކީ ޤާނޫނު އަސާސީގެ ރޫހާއި ޚިލާފުކަމެއް ކަމަށް އުޝާމް ވިދާޅުވިއެވެ. އެހެންވިދާޅުވާ އިރު ބަޖެޓްގައި ލިޔުނުކަންކަން ނުކޮށް ބަޖެޓް ހުސްވި ގޮތް ވެސް ބަލަން ވާނެ ނޫންތޯއެވެ.
މި އަހަރު ރައްޔިތުންގެ މަޖިލީހުން ފާސްކޮށްފައިވަނީ 49.8 ބިލިއަން ރުފިޔާގެ ބަޖެޓެކެވެ. ސަރުކާރުން 5 ވަރަކަށް ބިލިއަން ރުފިޔާގެ ސަޕްލިމެންޓަރީ ބަޖެޓެއް ހުށަހަޅަން ޖެހޭނެ ކަމަށް އަންދާޒާކުރާ އިރު 2023 ވަނަ އަހަރު 6.5 ބިލިއަން ރުފިޔާގެ ބަޖެޓެއް ހުށަހެޅިއެވެ.
