ބަޖެޓް ނުކުރާ ކަންކަން އެބަހުރި ކޮށްފައި
ޑިމޮކްރެޓްސްގެ ނައިބު ރައީސް މުހައްމަދު ޝިފާޒް
އެއްވެސް ކަމެއް ފެންނަން ނެތި އަނެއްކާ 5 ބިލިއަން ދޭށޭ ބުނުމަކީ މައްސަލައެއް ކަމަށް ދަ ޑިމޮކްރެޓްސް ޕާޓީގެ ނައިބްރައީސް މުޙައްމަދު ޝިފާޒް (ޝިއްޕެ) ވިދާޅުވެއްޖެއެވެ.
ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން ޝިފާޒް ވިދާޅުވީ ދިވެހިންނަށް ރައްޔިތުންގެ މަޖިލިސް އެނގެން ފެށިފަހުން މިހާތަނަށް ބަޖެޓަށްވީ ގޮތް ނޭނގި ސަޕްލިމެންޓަރީ ބަޖެޓެއް ހުށަހަޅާފައި ނުވާ ކަމަށެވެ. ކުރިން ދިން އެއްޗަކަށް ވީގޮތް އޮޅުން ނުފިލުވާ އެހެން އެއްޗަކަށް އެދެވޭނެތޯ ޝިފާޒު ސުވާލު އުފެއްދެވިއެވެ. އޭނާ ވިދާޅުވީ ބަޖެޓް ތަފްސީލު ނުދެއްވާ އަނެއްކާ 5 ބިލިއަން ދޭން ބުނުމަކީ ހަމަޖެހޭ އުސޫލެއް ނޫން ކަމަށެވެ. އެއީ ރައްޔިތުންގެ އިތުބާރު ސަރުކާރަށް ގެއްލޭ ސަބަބު ކަމަށް ޝިފާޒު ވިދާޅުވިއެވެ.
ޝިފާޒް ވިދާޅުވީ ސަރުކާރުން ހިތަށް ނާރާ ކަންކަންވެސް ކުރަމުންދާ ކަމަށެވެ. އަދި ހާމަނުކުރާހާ ހިނދަކު ބޮޑު އިލްޒާމެއް އެޅުވޭނެ ކަމަށާއި، އެހާހިސާބުން ރައްޔިތުން ނުކުންނާނީ މާލިއްޔަތަށް ވީގޮތެއް އޮޅުން ފިލުވަން ކަމަށާއި، ދަވުލަތް ހިންގަން ދޭ ލާރިއަށްވީގޮތެއް ނޭނގުމުން އެހިސާބުން އެމީހަކު ވަގަކަށްވާނެ ކަމަށެވެ.
ޝިފާޒް ވިދާޅުވީ ބަޖެޓުން 31 ބިލިއަން ރުފިޔާ ގެއްލިފައިވާ ކަމަށެވެ. ކަންކަން ހާމަ ނުކުރާނަމަ ވަގަށް ގޮވާނެ ކަމަށާއި، 31 ބިލިއަން ރުފިޔާއަށްވީގޮތެއް ސަރުކާރުން ހާމަ ނުކުރި ކަމަށެވެ. ދެވަނަ މާލީ ވަޒީރެއް އައި ނަމަވެސް އެއިން އެއްވެސްކަމެއް ހާމަނުކުރާ ކަމަށާއި، އެއް އަހަރުވެގެން ދިޔަ އިރުވެސް ކަން އޮތީ މިހެން ކަމަށެވެ. އަދި މިގޮތަށް ކަންކަން ބަލަން ރައްޔިތުން އަބަދު ނުތިބޭނެ ކަމަށެވެ.
