ތެލެސީމިއާ އެލަވަންސް ދޭން ފަށާނެ ކަމަށާއި އެކަނިވެރި މައިންގެ އެލަވަންސް ބޮޑުކުރާނެ ކަމަށް ރައީސް މުއިއްޒު އަނެއްކާ ވެސް ވިދާޅުވެއްޖެ
އެކަނިވެރި މައިންނާއި ބަފައިންނަށް ދޭ އެލަވަންސް ކޮންމެ ކުއްޖަކަށް 3000 ރުފިޔާއަށް ބޮޑުކުރެވޭނެ
ރައީސް ޑރ މުހައްމަދު މުއިއްޒު ލ. ގަމުގެ ރައްޔިތުންނާއި ބައްދަލުކުރައްވައި ވާހަކަދައްކަވަނީ
ތެލެސީމިއާ އެލަވަންސް ދޭން ފަށާނެ ކަމަށާއި އެކަނިވެރި މައިންގެ އެލަވަންސް ބޮޑުކުރައްވާނެ ކަމަށާއި އެކަން ބަޖެޓުގައި ވެސް ހިމަނާނެ ކަމަށް ވިދާޅުވެ، ރައީސް ޑރ މުހައްމަދު މުއިއްޒު ކުރިން ވިދާޅުވި ބަސް އަނެއްކާ ވެސް ތަކުރާރު ކުރައްވައިފި އެވެ.
ރައީސް މުއިއްޒު މިފަދައިން ވިދާޅުވީ ހައްދުންމައްޗަށް މިހާރު ކުރައްވަމުން ގެންދާ ދަތުރުރުފުޅުގެ ތެރެއިން އެ އަތޮޅު ގަމަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ވާހަކަ ދައްކަވަމުންނެވެ.
މިއީ ތެލެސީމިއާ އެލަވަންސް ބަޖެޓުގައި ހިމަނާނެ ކަމަށް ރައީސް މުއިއްޒު ވިދާޅުވި ފުރަތަމަ ފަހަރެއް ނޫނެވެ. މިދިޔަ އަހަރުގެ ފެބްރުއަރީ މަހު "ރައީސްގެ ޖަވާބު" ސީރީޒްގައި ވެސް މި އަހަރުގެ ބަޖެޓުގައި މިކަން ހިމަނައިގެން ތެލެސީމިއާ ކުދިންނަށް އެލަވަންސް ދޭން ފަށާނެ ކަމަށް ވިދާޅުވެފައި ވެއެވެ. އެހެން ނަމަވެސް އަހަރު ނިމެން ކައިރިވެފައިވާ އިރު އަދިވެސް މުއިއްޒު އެ ވިދަޅުވި ގޮތަށް އަމަލީގޮތުން އެ ވައުދު ތަންފީޒުވާތަން ނުފެނެ އެވެ.
ލ. ގަމު ރައްޔިތުންނާއި ބައްދަލުކުރައްވައި ރައީސް މުއިއްޒު ވިދާޅުވީ އެކަނިވެރި މައިންނާއި އެކަނިވެރި ބަފައިންނަށް، މިހާރު ދޭ އެލެވެންސް ކޮންމެ ދަރިއަކަށް މަހަކު 3،000ރ. ރޭޓުން އަންނަ އަހަރުގެ ޖެނުއަރީ މަހުން ފެށިގެން ބޮޑުވާނެ ކަމަށެވެ.
ތެލެސީމިއާ ހުންނަ ކުދިންނަށް ސަރުކާރުން މި އަހަރު ދޭން ފަށާނެ ކަމަށް ވިދާޅުވި އެލަވަންސާއި އެކަނިވެރި މައިންނާއި ބަފައިންނަށް ދޭ އެލަވަންސް ބޮޑުކުރުން އަންނަ އަހަރަށް ލަފާކޮށް ސަރުކާރުން މަޖިލީހަށް ހުށަހަޅާ ބަޖެޓުގައި ހިމަނާނެ ކަމަށް ވެސް ރައީސް ވިދާޅުވި އެވެ.
އެކަނިވެރި މައިންނާއި ބަފައިންނަށް ދޭ އެލަވަންސް ކޮންމެ ކުއްޖަކަށް 3،000 ރުފިޔާއަށް ބޮޑުކުރެވޭނެ ކަން ފާހަގަކުރައްވަމުން ރައީސް ވިދާޅުވީ މި އެލަވަންސް ލިބެންޖެހޭ 5،870 ފަރާތެއް މިހާރު ރަޖިސްޓްރީވެފައިވާ ކަމަށް ވެސް އެމަނިކުފާނު ފާހަގަކުރެއްވި އެވެ.
މި އަންނަ އަހަރު ބަޖެޓު ފާސްވެގެން ދިޔުމުން، ޖެނުއަރީ މަހުން ފެށިގެން. ސިންގަލް ޕޭރެންޓު އެލަވަންސް. އެކަނިވެރި މައިންނަށް ދޭ އެލަވަންސް. ކޮންމެ ކުއްޖަކަށް 3،000ރ. އަށް ބޮޑުވެގެންދާނެ. މިގޮތަށް މި ފައިސާ ލިބެންޖެހޭ 5،87 ފަރާތެއް އެބަތިބި.ރައީސް ޑރ މުހައްމަދު މުއިއްޒު
ރައީސް ވިދާޅުވީ އަންނަ އަހަރުގެ ޖެނުއަރީ މަހުން ފެށިގެން އެކަނިވެރި މައިންނާއި ބަފައިންގެ އެލެވެންސްގެ އިތުރުން ތެލެސީމިއާ ކުދިންނަށް 1،000ރ. ގެ އެލެވެންސެއް ލިބިގެންދާނެ ކަމަށެވެ.
އަންނަ އަހަރުގެ ބަޖެޓުގައި އެކަނިވެރި މައިންގެ އެލަވަންސަށް 211 މިލިއަން ރުފިޔާ ހިމަނާފައިވާނެ ކަމަށާއި، އަދި އަލަށް ތަޢާރަފުކުރާ ތެލެސީމިއާ އެލަވަންސަށް 11.7 މިލިއަން ރުފިޔާ ވަނީ ކަނޑައަޅާފައިވާ ކަމަށް މުއިއްޒު ވިދާޅުވިއެވެ. މިވަގުތު ރާއްޖޭގައި 982 ތެލެސީމިއާ ބަލިމީހުން ތިބިކަން ފާހަގަކުރެވެ އެވެ.
އެކަނިވެރި މައިންނާއި އެކަނިވެރި ބަފައިންނަށް، ދަރީންގެ ތަރުބިއްޔަތަށްޓަކައި ދޭ މިންވަރު، ޖުމުލަ 12،000 ރުފިޔާ އާ ހަމައަށް، ކޮންމެ ދަރިއަކަށް 3000 ރުފިޔާގެ މަގުން އިތުރުކުރުމަކީ، މުއިއްޒުގެ މެނިފެސްޓޯގައި ހިމެނޭ މުހިންމު ވައުދެއް ކަމަށް ރައީސް އޮފީހުން ނެރުނު ބަޔާނުގައި ފާހަގަ ކޮށްފައިވާއިރު، ދައުރުގެ ދެވަނަ އަހަރު މިހާރު އަންނަނީ ނިމެމުންކަން ފާހަގަ ކުރެވެއެވެ.
އެންސްޕާގެ ތަފާސްހިސާބުތަކުން ދައްކާ ގޮތުގައި، އެކަނިވެރި މައިން ނުވަތަ ބަފައިންގެ ބެލުމުގެ ދަށުގައި ތިބޭ ކުދިންގެ އަދަދު ދުވަހެއް ދުވަހަކަށް އަންނަނީ އިތުރުވަމުންނެވެ. އެގޮތުން މިދިޔަ ސެޕްޓެމްބަރު މަހު އެކަނި ވެސް 69 ކުދިން އަލަށް ރަޖިސްޓްރީވެފައިވެ އެވެ. އަދި މިދިޔަ އޮގަސްޓް މަހު އެކަނި ވެސް މި ފަދަ ކުދިންނަށް 4.9 މިލިއަން ރުފިޔާ ދޫކޮށްފައިވާ ކަމަށް އެ އިދާރާއިން ބުނެފައި ވެ އެވެ.
