ދިވެހިރާއްޖެ ފަދަ ނިސްބަތުން ކުޑަ އާބާދީއެއް އޮތް، ކުޑަ ގައުމަކަށް އަމިއްލަ ބަހަކާއި އަކުރެއް ލިބިފައިވުމީ، ނުހަނު ބޮޑު ނަސީބެއް ކަމަށް އާޓްސް، ކަލްޗަރ އެންޑް ހެރިޓޭޖް މިނިސްޓަރު ޔުމްނާ މައުމޫން ވިދާޅުވެއްޖެއެވެ.

ދިވެހިބަހުގެ ދުވަހުގެ މުނާސަބަތުގައި މިނިސްޓަރު ޔުމްނާ ވަނީ، އަންނަށް އޮތް ޖީލުތަކަށް ހެޔޮގޮތުގައި ދިވެހިބަސް ގެންގޮސްދިނުމަށްޓަކައި، އެންމެން އެކުގައި މަސައްކަތްކުރުމަށް އިލްތިމާސްކުރައްވާފައެވެ. އަދި ދުވަހުގެ ތަހުނިޔާ، ބަސްކުރިއަރުވަން މަސައްކަތްކުރާ އެންމެހައި ފަރާތްތަކަށާއި ދިވެހިރައްޔިތުންނަށް ވިދާޅުވެފައިވެއެވެ.

މިމުނާސަބަތުގައި ދިވެހި ބަހުގެ އެކެޑެމީގެ ރައީސް އަޝްރަފް އަލީ ވެސް، ދިވެހި ރައްޔިތުންނަށް ތަހުނިޔާ ވިދާޅުވެފައިވެއެވެ. ދުވަހުގެ ތަހުނިޔާ ވިދާޅުވަމުން، އަޝްރަފް ވިދާޅުވީ، ދިވެހިބަހަކީ ދިވެހީންގެ އަމިއްލަ ވަންތަކަން ރަމްޒުކޮށްދޭ މައިގަނޑު އަސާސް ކަމަށެވެ. އަދި ދިވެހި ބަހަކީ ދިވެހީންގެ ޝަރަފާއި ފަޚްރުކަމަށް ވެސް އަޝްރަފް ސިފަކުރެއްވިއެވެ.

އެހެންކަމުން ދިވެހިބަސް ރައްކާތެރިކޮށް ދެމެހެއްޓުމަށް ކުރަންޖެހޭ އެންމެހާ މަސައްކަތްތައް ކުރުމަކީ، ހުރިހާ ރައްޔިތުންގެ ފަރުދީ، ވަޠަނީ، އަދި ގައުމީ ޒިންމާއެއްކަމަށް އަޝްރަފް ވިދާޅުވިއެވެ.  

ދިވެހިބަހުގެ ދުވަހުގެ މުނާސަބަތުގައި، ރައީސުލްޖުމްހޫރިއްޔާގެ ދެކަނބަލުންނަށާއި ބަހުގެ އެދުރުންނަށް، ދުވަހުގެ  ހެޔޮއެދުމާއި ތަހުނިޔާ ދިވެހި ބަހުގެ އެކެޑަމީން ވަނީ ފޮނުވާފައެވެ.

"ދިވެހިބަހުން ބުނަމާ! އަދި ލިޔަމާ" މި ޝިޢާރުގެ ދަށުން މި އަހަރުގެ ދިވެހިބަހުގެ ދުވަސް ފާހަގަކުރާއިރު، މި މުނާސަބާއާ ގުޅިގެން ދިވެހިބަހުގެ އާ ފޮތްތަކަކާއި، އެޕްލިކޭޝަންތަކެއް ނެރުމަށް ދިވެހިބަހުގެ އެކެޑެމީން ނިންމާފައިވެއެވެ.

ކޮންމެ އަހަރެއްގެ އޭޕްރީލް 14 ވަނަ ދުވަހު ފާހަގަކުރާ ދިވެހިބަހުގެ ދުވަހަކީ، ދިވެހިބަހާއި އަދަބިއްޔާތާއި ތާރީޚަށް ގިނަގުނަ ޚިދުމަތްތަކެއް ކޮށްދެއްވި އަލްއައްލާމާ ހުސައިން ޞަލާޙުއްދީން ދުނިޔޭގެ އަލިކަން ދެކެވަޑައިގެންނެވި ދުވަހަށް ނިސްބަތްކޮށް ފާހަގަކުރާ ދުވަހެކެވެ. މަރްހޫމް ހުސައިން ޞަލާޙުއްދީން ދުނިޔޭގެ އަލިކަން ދެކެވަޑައިގެންނެވީ، 14 އޭޕްރިލް 1881 ގައެވެ.