ދިވެހި ބަހުގެ އެކަޑަމީގެ "އަސްކަނި މައުރަޒު" ވަރަށް ކާމިޔާބު
މި މައުރަޒުން ރާއްޖޭގައި މިހާރު އާންމުކޮށް ނުލިބޭ ފޮތްތައް ލިބެންހުރި
"އަސްކަނި މައުރަޒު"ގެ ތެރެއިން | ސަން އޮންލައިން
ދިވެހި ބަހުގެ އެކަޑަމީން އިންތިޒާމުކޮށްގެން ބޭއްވި ފޮތް މައުރަޒު، "އަސްކަނި މައުރަޒު 2023" ކާމިޔާބުކަމާއެކު ނިންމާލައިފިއެވެ.
ބަހުގެ އެކަޑަމީގެ މި ފޮތް މައުރަޒަކީ ރާއްޖޭގައި މިހާރު އާންމުކޮށް ނުލިބޭ ފޮތްތަކުގެ އިތުރުން، އެކި ދާއިރާތަކުގެ އެކި މައުލޫމާތުތަކުގެ މައްޗަށް، މިހާރުގެ ލިޔުންތެރިންނާއި ކުރީގެ ލިޔުންތެރިން ލިޔެފައިވާ ފޮތްތައް ހެޔޮ އަގުގައި ވިއްކުމަށް ކުރިއަށް ގެންދިޔަ ފޮތް މައުރަޒެކެވެ.
މި މައުރަޒާ ގުޅޭގޮތުން ރާއްޖެއެމްވީއާ ވާހަކަދައްކަވަމުން، ދިވެހި ބަހުގެ އެކަޑަމީގެ ރައީސް ޑރ. އަޝްރަފް އަބްދުއްރަހީމް ވިދާޅުވީ، މި ފޮތް މައުރަޒަކީ ފަހުގެ ފޮތް މައުރަޒުތަކުގެ ތެރެއިން އެންމެ ކާމިޔާބު އަދި އެންމެ ގިނަ ފަރާތްތަކުން ފޮތް ގަތުމަށް ޒިޔާރަތްކުރި މައުރަޒު ކަމަށެވެ.
އެގޮތުން މި ފޮތް މައުރަޒަކީ މިދިޔަ ދެ އަހަރުގެ ތެރޭގައިވެސް ބޭއްވުނު އެންމެ ކާމިޔާބު ފޮތް މައުރަޒުގެ ގޮތުގައި އަޝްރަފް ސިފަކުރެއްވިއެވެ. އެގޮތުން އަޝްރަފް ވަނީ މި ފޮތް މައުރަޒުގައި ލިބެން ހުރި އިހުގެ ފޮތްތަކަށް އޮތް ޑިމާންޑް ފާހަގަކުރައްވައި، އެފަދަ ފޮތްތައް އާންމުކޮށް ލިބޭނެފަދަ އުސޫލަކާ ގުޅޭގޮތުން މަޝްވަރާ ކުރަމުންދާކަމަށް ވިދާޅުވެފައެވެ.
އަޝްރަފް ވިދާޅުވީ މި މައުރަޒުން ލިބުނު ތަރުހީބާއެކު، އަންނަ އަހަރުގެ ޖެނުއަރީގެ ތެރޭގައި އެފަދަ ބޮޑު މައުރަޒެއް ބޭއްވުމަށް އެކަޑަމީން މަސައްކަތް ކުރަމުން އަންނަ ކަމަށެވެ.
މި މައުރަޒު ބުރާސްފަތި ދުވަހު ނިންމާލާފައިވާއިރު، މި މައުރަޒުން ފެނުނު އެންމެ ޚާއްސަކަމެއްގެ ގޮތުގައި ފާހަގަކުރެވުނީ މިހާރު އާންމުކޮށް ނުލިބޭ ފޮތްތަކުގެ ތެރޭގައި ހިމެނޭ, "ބަހުގެ ހަމައިގެ އަތްމަތީ ފޮތް"، "ދިވެހި ބަހުގެ ގަވާއިދު"، "ޕިރާޑުގެ ގަލަމުން ދިވެހި ރާއްޖެ"، "ޖަމީލުގެ ޑްރާމާތައް" ފަދަ ފޮތްތައް ލިބެން ހުރުމެވެ. މި ފޮތްތަކަކީ ކުރިން ހުސްވެފައި ހުރިނަމަވެސް، މި ފަހަރު ޗާޕްކޮށްގެން ނެރުނު ފޮތްތަކެކެވެ.
