މި އަހަރުގެ އަދަބީ ކަލަންޑަރުގައި ދިވެހި ބަހުގެ އެކެޑަމީން ކަނޑައަޅައިފައިވާ އަލްއުސްތާޛު އިބްރާހީމް ޝިހާބުގެ ހަނދާނީ ވާދައިގެ ތަށްޓަށް ބާއްވާ ވާހަކަދެއްކުމުގެ 36ވަނަ ޤައުމީ މުބާރާތުގައި ބައިވެރިވުމުގެ ފުރުސަތު ހުޅުވާލައިފިއެވެ.

ހަތަރު ބަޔަކަށް ބަހާލައިގެން ކުރިއަށްގެންދަން ހަމަޖެހިފައިވާ މި މުބާރާތުގައި ހިމެނެނީ ސްކޫލުތަކުގެ ބަޔާއި، މަތީ ތަޢުލީމުގެ ބަޔާއި، އަމިއްލަ ފަރާތްތަކުގެ ބައިގެ އިތުރުން އޮފީސް، ކުންފުންޏާއި، ކުލަބުތަކާއި ޖަމިއްޔާ ޖަމާޢަތްތަކުގެ ބައެވެ.

ސްކޫލްތަކުގެ ބައިގައި ހިމެނެނީ ކީ ސްޓޭޖް 3،4،5 އެވެ. މަތީ ތައުލީމުގެ ބައިގައި ހިމެނެނީ ޔުނިވަރސިޓީތަކާއި ކޮލެޖުތަކާއި އިންސްޓިޓިއުޓްތަކާއި އެކެޑަމީތަކެވެ. އަދި އަމިއްލަ ފަރާތްތަކުގެ ބައިގައި ހިމެނެނީ 18 އަހަރުން ދަށުގެ އުމުރުފުރާއާއި 18 އަހަރުން މަތީގެ އުމުރުފުރާގެ ފަރާތްތަކެވެ.

މި މުބާރާތުގެ މަތީ ތަޢުލީމުގެ ބަޔާއި އޮފީސް، ކުންފުނި، ކުލަބު، އަދި ޖަމުޢިއްޔާ ޖަމާޢަތްތަކުގެ ބަޔަށް އޮންނާނީ ބަހުސެއްކަމަށް އެކަޑަމީން ވަނީ ބުނެފައެވެ. މި މުބާރާތް ބޭއްވުމަށް ހަމަޖެހިފައިވަނީ 12 ފެބްރުއަރީ 2023 އިން ފެށިގެންނެވެ.

މުބާރާތުގެ ދާއިރާތަކުން ވާހަކަދައްކާނެ މައުޟޫއުތައް މުބާރާތް ފެށުމުގެ މަދުވެގެން 7 ދުވަސް ކުރިން އެކެޑަމީގެ ވެބްސައިޓުން ލިބެން ހުންނާނެ ކަމަށް ދިވެހި ބަހުގެ އެކަޑަމީން ބުންޏެވެ. އަދި މުބާރާތުގައި ބައިވެރިވާން އެދޭ ފަރާތްތަކުން އެކަމަށް އެދި، ފޯމު ފުރިހަމަކުރުމަށް ފަހު 2 ފެބުރުއަރީ 2023 ވާ ބުރާސްފަތި ދުވަހުގެ މެންދުރު 1:00 ގެ ކުރިން ހުށައަޅަންވާނެ ކަމަށް ވެސް އެ އެކަޑަމީން ކުރި އިއުލާނުގައި ވަނީ ބުނެފައެވެ.