18 ފޮއްޓެއްގެ ނަތީޖާ ކަށަވަރު ކުރަންޖެހޭ: އީސީ

ނިމިދިޔަ ލޯކަކލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމެޓީތަކުގެ އިންތިޚާބުގައި، 18 ފޮއްޓެއްގެ ނަތީޖާ ކަށަވަރުކުރަންޖެހޭ ކަމަށް އިލެކްޝަންސް ކޮމިޝަންގެ ރައީސް އަޙްމަދު ޝަރީފް ވިދާޅުވެއްޖެއެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި، ޝަރީފް ވިދާޅުވީ، އެ ފޮށިތަކުގެ ނަތީޖާ ކަށަވަރުކުރުމަށްޓަކައި، ފޮށިތަކުގެ ޝީޓްތަކުގައި ހުރި މައްސަލަތައް ދެނެގަނެ ހައްލު ކުރުމުގެ މަސައްކަތް ކުރުމަށް ނިންމާފައިވާކަމަށެވެ. އަދި ވޯޓުލީ މީހުންގެ އަދަދާއި، ސައްޙަ ވޯޓާއި ބާތިލް ވޯޓުގެ އަދަދު ޗެކް ކުރުމަށްފަހު، މައްސަލައެއް ނެތްތަނަމަ އެފޮށިތަކުގައި އިތުރު ކަމެއް ނުކުރާނެ ކަމަށް ވިދާޅުވިއެވެ.

Advertisement

ޝަރީފް ވިދާޅުވީ، ވޯޓުލީ މީހުންގެ ތަފާސްހިސާބު ދިމާވާކަމަށް ވަނީނަމަ، މި މަސައްކަތުގެ ތެރެއިން، އިތުރު ކަމެއް ނުކުރާނެ ކަމަށެވެ. ހަމަ އެހެންމެ، އެއްވެސް ސެކިއުރިޓީ އުރައެއް ހުޅުވާއިރު، ބަލަންތިބޭ މީހުނަށް އޮޅުންއަރާ ފަދަ ކަމެއް ނުކުރާނެ ކަމަށް ވިދާޅުވިއެވެ. އެގޮތުން ކޮންމެ ސެކިއުރިޓީ އުރައެއް ހުޅުވާއިރު އެ ސެކިއުރިޓީ ހުޅުވާ ބޭނުން ބުނާނެކަމަށް ޝަރީފް ވިދާޅުވިއެވެ.

މީގެ އިތުރުން، ވޯޓު އަލުން ގުނާނީ ނަތީޖާ ކަށަވަރުކުރެވޭނެ އިތުރު އެއްވެސް ގޮތެއް ނެތްނަމަ އެންމެ ފަހުކަމެއްގެ ގޮތުގައި ކަމަށް ޝަރީފް ވިދާޅުވިއެވެ.

އިލެކްޝަންސް ކޮމިޝަނުން އަންގާރަދުވަހު ކޮށްފައިވަނީ، ޝީޓްތަކުގައި މައްސަލަ ފާހަގަކުރެވުނު 18 ފޮށީގެ ނަތީޖާ ކަށަވަރުކުރުމުގެ މަސައްކަތެވެ. އެހެން ނަމަވެސް އިލެކްޝަންސް ކޮމިޝަނުގެ މަސައްކަތާ ގުޅިގެން، އިދިކޮޅު ޕީޕީއެމްއާއި ވެރިކަން ކުރާ އެމްޑީޕީން ވަނީ ހަމަނުޖެހުންތަކެއް ހިންގާފައެވެ. މި ހަމަނުޖެހުންތަކާއި ގުޅިގެން، އެ މަސައްކަތް ވަނީ ފަސްކޮށްފައެވެ.

މިކަމާއި ގުޅިގެން ޝަރީފް ވިދާޅުވީ، މި މަސައްކަތަކީ އެ ކޮމިޝަނަށް އިންތިޚާބާއި ބެހޭގޮތުން ލިބުނު ޝަކުވާގެ ސަބަބުން ކުރާ މަސައްކަތެއް ނޫން ކަމަށެވެ. އަދި އެ ވާހަކަތައް، ވާދަވެރި ސިޔާސީ ޕާޓީތަކުން ދައްކާފައިވަނީ ހަގީގަތާއި ޚިލާފަށް ކަމަށް ވިދާޅުވިއެވެ.

އިލެކްޝަންސް ކޮމިޝަނުން ބުނީ، އިންތިޚާބު ކުރިއަށް ގެންގޮސްފައިވަނީ އިންސާފުވެރިކަމާ އެކުގައި ކަމަށެވެ. އަދި އެއްވެސް ފަރާތަކުން، އިންތިޚާބަށް ނުފޫޒު ފޯރުވަން މަސައްކަތް ކޮށްފައި ނުވާކަމަށް ޝަރީފް ވިދާޅުވިއެވެ.