ރޯދަ މަހު ވިޔަފާރި ރަޖިސްޓަރީކުރުމާ ގުޅޭ ޚިދުމަތް ދޭ ގަޑި އާންމުކޮށްފި

މި ރަމަޟާން މަހު ވިޔަފާރި ރަޖިސްޓަރީކުރުމާ ގުޅޭ ޚިދުމަތް ފޯރުކޮށްދިނުމަށް ހަމަޖެހިފައިވާ ގަޑި އިކޮނޮމިކް މިނިސްޓްރީން ހާމަކޮށްފިއެވެ.

އެ މިނިސްޓްރީން ބުނީ ވިޔަފާރިތަކަށް ފޯރުކޮށްދޭ ވިޔަފާރި ރަޖިސްޓްރީ ކުރުމާ ގުޅޭ ޚިދުމަތްތައް، ސަރުކާރު ބަންދު ދުވަސްތައް ފިޔަވައި އެހެން ދުވަސްތަކުގައި ރަމަޟާން މަހާއި ޝައްވާލް މަހުގެ ފުރަތަމަ 7 ދުވަހު ފޯރުކޮށް ދިނުމަށް ހަމަޖެހިފައިވަނީ ހެނދުނު 9:00 އިން މެންދުރުފަހު 1:00ށް ކަމަށެވެ.

އަދި މިނިސްޓްރީގެ އޮންލައިން ވިޔަފާރި ޕޯޓަލް މެދުވެރިކޮށް ޚިދުމަތަށް އެދޭނީhttps://business.egov.mvމި ލިންކް މެދުކޮށް ކަމަށާއި މިނިސްޓްރީއަށް ލިޔެކިޔުމުގެ އަސްލު ހުށަހަޅަންޖެހޭ ޚިދުމަތްތަކަށް އެޕޮއިންޓްމަންޓް އުސޫލުން ޚިދުމަތް ފޯރުކޮށްދެމުން ދާނެ ކަމަށެވެ.

އިކޮނޮމިކް މިނިސްޓްރީން ބުނީ ވިޔަފާރި ރަޖިސްޓަރީކުރުމާގުޅޭ ޚިދުމަތްތަކާ ބެހޭ މައުލޫމާތު، ހުކުރު އަދި ހޮނިހިރު ދުވަސް ފިޔަވައި ކޮންމެ ދުވަހެއްގެ ހެނދުނު 9:30ން މެންދުރުފަހު 02:00ށް މިނިސްޓްރީގެ ލައިވް ޗެޓް އަދި ކޯލްސެންޓަރ 1691 މެދުވެރިކޮށް ފޯރުކޮށްދޭނެ ކަމަށެވެ.

ރަމަޟާން މަހު އެކިއެކި ޚިދުމަތްތައް ދޭ ގަޑިތަކަށް ބަދަލު ގެނެސްފައިވާއިރު ބައެއް ވިޔަފާރިތައް ހުޅުވާ ގަޑިތަކަށް ބަދަލު ގެނެސްފައިވެއެވެ. ރަމަޟާން މަހުން ފެށިގެން، ޝައްވާލްމަހުގެ ފުރަތަމަ 7 ދުވަހު، މުދާ ވިއްކާ ތަންތަން ހުޅުވާފައި ބެހެއްޓޭނެ ގަޑިއަކީ ހެނދުނު 8:00ން މެންދަމު 12:00ށް ކަމަށް އިކޮނޮމިކް މިނިސްޓްރީން ވަނީ ކަނޑައަޅާފައެވެ.