ކަނޑަށް ތެޔޮ އެޅުމުގެ ބަދަލުގައި 17 މިލިއަން ޑޮލަރު ހޯދަން ލަންކާ ސަރުކާރުން ދައުވާ ކޮށްފި

ސްރީލަންކާގެ އިރުމަތިން 270،000 ޓަނުގެ ތެޔޮ ބަރުކޮށްގެން ދަތުރުކުރަމުން ދިޔަ ޓޭންކަރުގައި ރޯވެ ކަނޑަށް ތެޔޮ އެޅުމުން އެ ބޯޓުގެ ވެރިފަރާތުގެ އަތުން 17.38 މިލިއަން ޑޮލަރުގެ ބަދަލެއް ހޯދަން ލަންކާގެ ސަރުކާރުން ދައުވާ ކޮށްފިއެވެ.  

ނިއު ޑައިމަންޓް ބޯޓުގައި މިދިޔަ ސެޕްޓެމްބަރު މަހު އަލިފާން ރޯވީ ކުވޭތުން އިންޑިއާއަށް ކްރޫޑް ތެޔޮ ހިފައިގެން ދަތުރު ކުރަމުން ދަނިކޮށެވެ. އަލިފާން ރޯވެ އެ ބޯޓުން ބޭރުވި ތެޔޮ 40 ކިލޯމީޓަރުގެ ސަރަހައްދަކަށް ފެތުރިފައިވެއެވެ. ރިޕޯޓްތައް ބުނާ ގޮތުން އެ ބޯޓުން 480 ޓަނުގެ ތެޔޮ ކަނޑަށް ބޭރުވެފައިވާނެ ކަމަށެވެ.

ލަންކާގެ ސަރުކާރުން ބޯޓުގެ ވެރިފަރާތް ޖޫރިމަނާ ކުރުމަށް ދައުވާ ކޮށްފައިވާއިރު، މީގެ ކުރިން އެ ބޯޓުގެ ކެޕްޓަން 65،000 ޑޮލަރުން ޖޫރިމަނާ ކޮށްފައިވެއެވެ. އެއީ ކަނޑަށް ތެޔޮ ލީކުވުމާއި، ލީކުވި ތެލުން ތިމާވެއްޓަށް ލިބުނު ގެއްލުން ރިޕޯޓްކޮށްފައި ނުވާ ކަމަށް ބުނެއެވެ.

ޕެނަމާގައި ރަޖިސްޓަރ ކޮށްފައިވާ 330 މީޓަރު ދިގު ނިއު ޑައިމަންޑްގައި ރޯވި އަލިފާން ނިއްވާލުމުގައި ލަންކާގެ އިތުރުން އިންޑިއާގެ ކޯސްޓް ގާޑުން އެހީތެރިވެފައިވެއެވެ. އަލިފާން ނިއްވާލުމަށް ލަންކާއިން ކުރި މަސައްކަތުގެ ބަދަލުގައި ޕޯޓޯ އެމްޕޯރިއޮސް އިން ވަނީ ލަންކާއަށް 2.8 މިލިއަން ޑޮލަރު ދީފައެވެ.