ވޯޓުލާން ނިކުތް މީހުންގެ އަދަދު އީސީގެ އަންދާޒާއަށްވުރެ އިތުރު، 63.6 އިންސައްތަ މީހުން މިހާތަނަށް ވޯޓުލައިފި

މިހާރު ކުރިއަށްދާ ކައުންސިލް އިންތިޚާބުގައި މިހާތަނަށް 173،909 މީހުން ވޯޓުލާފައިވާކަމަށް އީސީގެ ރައީސް އަހުމަދު ޝަރީފް ވިދާޅުވެއްޖެއެވެ.

ޝަރީފް ކުރެއްވި ޓްވީޓެއްގައި ހާމަކުރައްވާފައިވާ އަދަދުތަކަށް ބަލާއިރު ވޯޓުލާފައިވަނީ 88،010 ފިރިހެނުންނާއި 85،899 އަންހެނުންނެވެ. މިއީ ވޯޓުލުމުގެ ހައްގު ލިބިފައިވާ 63.67 އިންސައްތައެވެ.

Advertisement

ވޯޓުލުމުގެ ހައްގު ލިބިފައިވަނީ 273،128 މީހުންނަށެވެ. ހޮނިހިރު ދުވަހުގެ އިރުއޮއްސި 6:50 އާއި ހަމައަށް 178،280 މީހުން ވަނީ ވޯޓުލާފައެވެ.

މިހާތަނަށް އައިއިރު ބަންދުކޮށްފައިވަނީ 117 ވޯޓު ފޮއްޓެކެވެ. މުޅި ޖުމްލަ 713 ވޯޓު ފޮއްޓެއް ވަނީ ބަހައްޓާފައެވެ. 51 ފޮއްޓެއްގެ ވަގުތު އިތުރުކުރުމަށް އީސިން ވަނީ ނިންމާފައެވެ. މީގެތެރެއިން ވިލުފުށީގައި ބަހައްޓާފައިވާ ދެ ފޮށި ބަންދުކުރުމަށް ހަމަޖެހިފައިވަނީ ހޮނިހިރު ދުވަހުގެ ރޭ 21:50ގައެވެ.

ހޮނިހިރު ދުވަހު އީސީން ބޭއްވި އެޑްވައިޒަރީ ކޮމިޓީގެ ބައްދަލުވުމުގައި ވާހަކަ ދައްކަވަމުން އީސީގެ ރައީސް އަހުމަދު ޝަރީފް ވިދާޅުވެފައިވަނީ މިފަހަރު ވޯޓުލާން ނިކުންނާނެކަމަށް އަންދާޒާކުރެވެނީ 38 އާއި 40 އިންސައްތައާ ދެމެދުގެ މީހުން ކަމަށެވެ.

ވޯޓުލުން ހޮނިހިރު ދުވަހުގެ 7 ޖެހިއިރު ފަށައިގެން ގިނަ އިރުތަކެއް ވަންދެން ގިނަ ވޯޓު ފޮށިތައް ކައިރީގައި ވޯޓުލާން ތިބީ މަދު އަދަދެއްގެ ބައެކެވެ. ނަމަވެސް މެންދުރު ފަހުން ވަނީ ގިނަ ބަޔަކު ވޯޓުލާން ނިކުމެފައެވެ.

ކައުންސިލް އިންތިޚާބުގައި ވޯޓުލާން އާންމުކޮށްވެސް ނިކުންނަ މީހުންގެ އަދަދު މަދެވެ.

2011 ވަނަ އަހަރު ބޭއްވި ކައުންސިލް އިންތިޚާބު

އެންމެ ފުރަތަމަ 2011 ވަނަ އަހަރު ބޭއްވި ލޯކަލް ކައުންސިލްތަކުގެ އިންތިޚާބުގައި ވޯޓު ދިނުމުގެ ހައްގު ލިބިފައިވަނީ 223،975 (ދެ ލައްކަ ތޭވީސް ހާސް ނުވަ ސަތޭކަ ހަތްދިހަ ފަސް) މީހުންނަށެވެ. އެފަހަރު ވޯޓުލާން ނިކުމެފައިވަނީ 161،510(އެއްލައްކަ ފަސްދޮޅަސް އެއްހާސް ފައްސަތޭކަ ދިހަ) މީހުންނެވެ. އެއީ ވޯޓުލުމުގެ ހައްގު ލިބިފައިވާ މީހުންގެ 72.11 އިންސައްތައެވެ.

2014 ވަނަ އަހަރު ބޭއްވި ކައުންސިލް އިންތިޚާބު

2014 ވަނަ އަހަރު ބޭއްވި ލޯކަލް ކައުންސިލްތަކުގެ އިންތިޚާބުގައި ވޯޓުލުމުގެ ހައްގު ލިބިފައިވަނީ 240،220 މީހުންނަށެވެ. މީގެތެރެއިން ވޯޓުލާފައިވަނީ 154،942 މީހުންނެވެ. މިއީ ވޯޓު ލުމުގެ ހައްގު ލިބިފައިވާ މީހުންގެ ތެރެއިން 64.5 ޕަސެންޓު މީހުންނެވެ.

2017 ވަނަ އަހަރު ބޭއްވި ކައުންސިލް އިންތިޚާބު

އެންމެ ފަހުން 2017 ވަނަ އަހަރު ބޭއްވި ކައުންސިލް އިންތިޚާބުގައި ވޯޓު ދިނުމުގެ ހައްގު ލިބިފައިވަނީ 255،987 މީހުންނަށެވެ. އެއިންތިޚާބުގައި ވޯޓުލާފައިވަނީ އޭގެތެރެއިން 168،951 މީހުންނެވެ. އެއީ ވޯޓު ދިނުމުގެ ހައްގު ލިބުނު މީހުންގެ ތެރެއިން 65.9 ޕަސެންޓު މީހުންނެވެ.