ހުކުރު ދުވަހު ވެކްސިންގެ ދެ ވަނަ ޑޯޒް ޖެހީ 180 މީހުން
9 އެޕްރީލު 2021 | ހުކުރު 18:30ހުކުރު ދުވަހު ވެކްސިން ޖަހާފައި ވަނީ ޖުމްލަ 2،740 މީހުން
މަޖިލީހުގައި އާއްމުންނަށް ވެކްސިން ޖެހުން
ހުކުރު ދުވަހު ރާއްޖޭގައި ކޮވިޑް-19 ވެކްސިންގެ ދެވަނަ ޑޯޒް ޖެހީ 180 މީހުންނެވެ.
ހެލްތު ޕްރޮޓެކްޝަން އެޖެންސީން އާންމުކޮށްފައިވާ މައުލޫމާތުތައް ދައްކާގޮތުން ހުކުރު ދުވަހު ވެކްސިން ޖަހާފައި ވަނީ ޖުމްލަ 2،740 މީހުންނެވެ. އެއީ ފުރަތަމަ ޑޯޒް ޖެހި 2،560 މީހުންނާއި ދެ ވަނަ ޑޯޒް ޖެހި 180 މީހުންނެވެ.
ރާއްޖެއިން ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 267،795ށް އަރާފައެވެ. އަދި ދެވަނަ ޑޯޒް ޖެހި މީހުންގެ ޖުމްލަ އަދަދު ވަނީ 15،131ށް އަރާފައެވެ.
ރާއްޖޭގައި ބޭނުންކުރަމުން އަންނަނީ ކޮވިޝީލްޑް ވެކްސިނާއި، ސިނޮފާމްގެ އިތުރަށް ފައިޒާ ވެކްސިނެވެ. އޭގެ ތެރެއިން ކޮވިޝީލްޑް ވެކްސިންގެ ފުރަތަމަ ޑޯޒު ޖެހުން މިހާރު ހުއްޓާލާފައިވާއިރު މިހާރު ޖަހަނީ އޭގެ ދެވަނަ ޑޯޒެވެ. އަދި ފުރަތަމަ ޑޯޒު ޖަހަނީ ސިނޮފާމް ވެކްސިންގައެވެ. ފައިޒާ ވެކްސިން ބޭނުންކުރަނީ ޚާއްސަ ހާލަތްތަކުގައެވެ. އެގޮތުން ވަކި ބަލިތަކަކަށް ބޭސްކުރާ އުމުރުން 16 އަހަރާއި 17 އަހަރުގެ ކުދިންނާއި މީހުންނަށް އެ ވެކްސިން ޖަހައިދެއެވެ.
މިދިޔަ ފެބްރުއަރީ މަހުގެ އެއް ވަނަ ދުވަހު ރާއްޖޭގައި ވެކްސިން ޖެހުމުގެ ގައުމީ ކެމްޕޭނެއް ފަށާފައިވާއިރު، ރާއްޖޭގައި ދިރިއުޅޭ އެންމެނަށް ވެސް އަންނަނީ ހިލޭ ވެކްސިން ޖަހައިދެމުންނެވެ. މީގެ އިތުރުން ރާއްޖެއިން ބޭރުން ފުރަތަމަ ޑޯޒު ޖެހި މީހުންގެ ތެރެއިން ރާއްޖޭގައި ދިރިއުޅޭ މީހުންނަށް ވެސް ރާއްޖޭގައި ބޭނުންކުރާ ވެކްސިންތަކުގެ ދެވަނަ ޑޯޒު ޖެހޭނެ އިންތިޒާމު މިހާރު ވަނީ ހަމަޖައްސާފައެވެ.
