ޓެރަރިޒަމާއި ހަރުކަށި ފިކުރު ފަތުރަނީ މުޖުތަމައު ބައިބައިކޮށްލަން: ޑިފެންސް މިނިސްޓަރ
8 އެޕްރީލު 2021 | ބުރާސްފަތި 17:29ހަތިޔާރާއި ބާރުގެ ބޭނުންކޮށްގެން ފާޅުގައި ގައުމުތަކަށް އަރައި އިސްތިއުމާރުކޮށް އުޅުނު ޒަމާން މާޒީވެ ހިނގައްޖެ
19 ވަނަ ކޯސްޓްގާޑް ބޭސިކް ކޯސް ނިންމުމުގެ ރަސްމިއްޔާތު
ޓެރަރިޒަމާއި ހަރުކަށި ފިކުރު ފަތުރަނީ މިބަދަހި މުޖްތަމައު ބައިބައިކޮށްލުމަށް ކަމަށް ޑިފެންސް މިނިސްޓަރ މާރިޔާ އަހްމަދު ދީދީ ވިދާޅުވެއްޖެއެވެ.
19 ވަނަ ކޯސްޓްގާޑު ބޭސިކް ކޯސް ނިންމުމަށް ބުދަދުވަހު ސަދަން އޭރިޔާގެ ހެޑް ކުއާޓަރުގައި ބޭއްވި ރަސްމިއްޔާތުގައި ވާހަކަފުޅު ދައކަވަމުން މިނިސްޓަރ ވިދާޅުވީ ދިވެހި ކޯސްޓްގާޑުގެ އެންމެބޮޑު މަސްއޫލިއްޔަތަކީ ރާއްޖޭގެ ކަނޑުތައް ބެލެހެއްޓުން ކަމަށާއި މިއަދު ދުނިޔޭގެ "ތްރެޓް" މާހައުލަކީ އިއްޔެ ދުށް މާހައުލެއް ނޫން ކަމަށެވެ. މިނިސްޓަރ ވިދާޅުވީ ގައުމުތަކުން ހަތިޔާރާއި ބާރުގެ ބޭނުންކޮށްގެން ފާޅުގައި ގައުމުތަކަށް އަރައި އިސްތިއުމާރުކޮށް އުޅުނު ޒަމާން މާޒީވެ ހިނގައްޖެ ކަމަށެވެ.
ހަރުކަށި ފިކުރު ފަތުރާ މީހުންގެ ބޭނުމަކީ ރައްޔިތުން ބިރުވެރި ކަމެއްގައި ބައިތިއްބައިގެން ޓެރަރިޒަމާއި ހަރުކަށި ފިކުރު ފަތުރައި މިބަދަހި މުޖްތަމައު ބައިބައިކޮށްލުން ކަމަށާއި ޒަމާނުއްސުރެ މިޖަޒީރާ ރަށްތަކުގައި އުޅެމުން އައި މީހުންގެ އެކުވެރިކަމާއި އެއްބައިވަންތަކަން ނަގާލުމަށް ކަމަށް މިނިސްޓަރު މާރިޔާ ވިދާޅުވި އެވެ.
މިނިސްޓަރ ވިދާޅުވީ، ކޯވިޑް -19 ޕެންޑެމިކްގެ އެންމެ ނުރައްކާތެރި ހާލަތުގައި ވެސް ކޯސްޓްގާޑުގެ ސިފައިން ދިވެހިރާއްޖޭގެ އެކި ކަންކޮޅުތަކުގައިވާ އެތައް މިލިއަން ޑޮލަރެއްގެ އަގުހުރި ރިޒޯޓުތަކާއި ފަޅުރަށްތައްވެސް ޓެރަރިޒަމްގެ ނުރައްކަލުން ސަލާމަތް ކުރުމަށް އެތަންތަން ރައްކާތެރިކަމާއެކު ބަލަހައްޓާފައިވާ ކަމަށެވެ.
ކޯވިޑް 19 ޕެންޑެމިކާ ގުޅިގެން ރާއްޖެ ހިމެނޭ ހަލަބޮލި އިންޑިއާ ކަނޑުގެ ސަރަހައްދަށް ކުރިމަތިވެފައިވާ އެންމެ ބޮޑު އެއް ތްރެޓްކަމަށްވާ މަސްތުވާތަކެތި ޓްރެފިކްކުރުން ވަނީ އިތުރުވެފައި ކަން ފާހަގަ ކުރައްވަމުން މިނިސްޓަރ މާރިޔާ ވިދާޅުވީ، ދާދިފަހުން ނޮދަން އޭރިޔާއަށް ލެއްގި މަސްތުވާތަކެތި ވަގުތުން އަތުލައި، އަމާނާތްތެރިކަމާއެކު ކަމާބެހޭ ފަރާތްތަކާ ހަވާލުކުރުމުގައި ކޯސްޓުގާޑުގެ ސެއިލަރުން ދިޔައީ އިޚްލާސްތެރި ގައުމީ ޚިދުމަތުގައި ނަމޫނާ ދައްކަމުން ކަމަށެވެ.
މަސްތުވާތަކެތީގެ އިތުރުން އިންސާނީ ވަގުފާރިއާއި ކަނޑުފޭރުމާއި، މަސްކަނޑުތަކުން ވައްކަންކުރުން ފަދަ ނުރައްކާތަކުން މިގައުމު ސަލާމަތްކުރަން އެންމެ ކުރީ ސަފަށް ނުކުމެ ތިބޭ ބަޔަކީ ކޯސްޓްގާޑުގެ ސެއިލަރުން ކަމަށްވެސް ވިދާޅުވިއެވެ.
މިއަހަރުގެ އޭޕްރީލް 3 ވަނަ ދުވަހުގެ ނިޔަލަށް، ކޯސްޓްގާޑުން ވަނީ ޖުމްލަ 73 ހާދިސާއެއްގައި 127 މީހެއްގެ ފުރާނަ ސަލާމަތް ކޮށްފައިކަން ފާހަގަ ކުރައްވައި މިނިސްޓަރ ވިދާޅުވީ، މޫދުގައި ގެނބިގެން މަރުވާ މީހުން ހޯދުމަށް ކޯސްޓްގާޑުގެ ޑައިވަރުން، ކޮންމެ ވަގުތެއްގައި ވެސް ޑައިވްކޮށްގެން އެކުރާ މަސައްކަތަކީ ހިތްވަރުގަދަ މަސައްކަތެއް ކަމަށެވެ.
މިރަސްމިއްޔާތުގައި އިތުރަށް ވާހަކަފުޅު ދައްކަވަމުން މިނިސްޓަރ މާރިޔާ ވިދާޅުވީ، ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ އިބްރާހީމް މުހައްމަދު ސާލިހުގެ ތަސައްވުރަކީ ދިވެހި ސިފައިންނަކީ ފަންނީ، ގާބިލް، ޕްރޮފެޝަނަލް އަދި "ފައިޓިން ފިޓް ފޯރސް" އަކަށް ހެއްދެވުން ކަމަށެވެ. އަދި މިތައްސައްވުރު ހަގީގަތަކަށް ހެދުމަށް ވޭތުވެދިޔަ 2 އަހަރާއި ބައިގެ ތެރޭގައި ސިފައިންގެ ލީޑަރޝިޕާ ގުޅިގެން ގިނަ އަދަދެއްގެ ސިފައިން ޓްރެއިންކޮށް އެތައް މަސައްކަތްތަކެއް ކޮށްފައިވާ ކަމަށާއި މިހާރުވެސް ދަނީ އެމަސައްކަތްތައް ކުރައްވަމުން ކަމަށް ވިދާޅުވިއެވެ.
މިރަސްމިއްޔާތުގައި ޗީފް އޮފް ޑިފެންސް ފޯރސް މޭޖަރ ޖެނެރަލް އަބްދުﷲ ޝަމާލާއި ދިވެހި އަސްކަރިއްޔާއިން ދިފާއީ ވަޒީރަށް ކަނޑައަޅުއްވާފައި ހުންނަވާ މިލިޓަރީ ސެކްރެޓަރީ ބްރިގޭޑިއަރ ޖެނެރަލް އަބްދުލް މަތީން އަހުމަދާއި ކޮމާންޑަރ ސަދަން އޭރިޔާ ކާނަލް އިބްރާހިމް ރަޝީދާއި ކޯސްޓްގާޑުގެ ކޮމާންޑަރ ކާނަލް މުހައްމަދު ސަލީމްގެ އިތުރުން ސިފައިންގެ އިސް ބައެއް އޮފިސަރުން ބައިވެރިވެވަޑައިގެންނެވިއެވެ.
