ހަތަރު މޭޔަރުކަމާއެކު ހާހެއްހާ ގޮނޑި ކާމިޔާބުކުރާނަން: ރައީސް ނަޝީދު
އިންތިޚާބުތައް ކާމިޔާބުކުރަނީ ވަރަށް ފުޅާ ވިސްނުމެއްގައި ޕާޓީން އަބަދުވެސް މަސައްކަތްކުރާތީ
އއ ރަސްދޫއަށް ވަޑައިގެންނެވުމުގެ ކުރިން ރައީސް ނަޝީދު ވާހަކަދައްކަވަނީ
ކުރިޔަށް އޮތް ލޯކަލް ކައުންސިލްގެ އިންތިޚާބާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގައި އެމްޑީޕީން ހަތަރު މޭޔަރުކަމާއި ހާހެއްހާ ގޮނޑި ކާމިޔާބު ކުރާނެކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކައުންސިލް އިންތިޚާބަށް އެމްޑީޕީން ކުރިޔަށް ގެންދާ "ރަށްވެހި ފަތިސް" ކެމްޕެއިން ނިންމާލުމަށް އއ. ރަސްދޫގައި ބާއްވާ ޖަލްސާއަށް ފުރާވަޑައިގެންނެވުމުގެ ކުރިން ވާހަކަފުޅު ދައްކަވަމުން ނަޝީދު ވިދާޅުވީ މިފަހަރުގެ ކައުންސިލް އިންތިޚާބުގެ ކަންކަން ދިގުދެމިގެން ދިޔަ ގޮތުން އިންތިޚާބު ނުބޭއްވިދާނެ ކަމުގެ ކަންބޮޑުވުންތަކެއް އޮތްކަމަށެވެ. ނަމަވެސް އެމްޑީޕީއަކީ އަބަދުވެސް އިންތިޚާބާ ކުރިމަތިލާ ޕާޓީއެއް ކަމަށް ނަޝީދު ވިދާޅުވިއެވެ. ކައުންސިލް އިންތިޚާބަށް އެމްޑީޕީން 1500ށް ވުރެ ގިނަ ކެންޑިޑޭޓުން ނިކުންނަކަން ފާހަގަކުރައްވާ ނަޝީދު ވިދާޅުވީ އެމްޑީޕީން އޭގެތެރެއިން ހާހެއްހާ ގޮނޑި ނަގާނެކަމަށެވެ. އަދި ވަކިން ފާހަގަކުރާ ގޮނޑިތަކެއް ހުންނަކަމަށް ނަޝީދު ވިދާޅުވިއެވެ.
ނަޝީދު ވިދާޅުވީ ބަލައިލެވޭ ބަލައިލުމުން ބައެއްފަހަރު ނުތަނަވަސްކަން އަންނަކަމަށެވެ. ހިތްތަކަށް މާޔޫސްކަން އަންނަކަމަށާއި އެހެންނަމަވެސް ފޯކަސް ގެއްލުވާނުލުމަށް ނަޝީދު ވަނީ އެދިވަޑައިގަންނަވާފައެވެ.
ނަޝީދު އިތުރަށް ވިދާޅުވީ އެމްޑީޕީ ނިކުމެ އޮތީ ރައްޔިތުންގެ މިޝަކުވާތަކަށް ހައްލު ހޯދައިދިނުމަށްކަމަށެވެ. އަދި ޕާޓީން ކުރާ ކޮންމެ ދަތުރަކީވެސް އެޝަކުވާތަކަށް ތަސައްލީއެއް ހޯދައިދިނުމަށް ސިޔާސަތުތައް ރާވާ ރައްޔިތުންނަށް ތަނަވަސް ދިރިއުޅެއް ހޯދައިދިނުމަށް ކުރަމުންދާ ދަތުރުތަކެއްކަމަށް ނަޝީދު ވިދާޅުވިއެވެ.
ކައުންސިލް އިންތިޚާބުގެ ކެމްޕޭން ނިންމަން "އާވިލުން" ނަމުގައި އއ.ރަސްދޫގައި ބުރާސްފަތި ދުވަހުގެ ރޭ ޖަލްސާ ބޭއްވުމަށް ވަނީ ހަމަޖެހިފައެވެ. ޖަލްސާ ބާއްވަން މާލޭން ވަޑައިގަންނަވާ ބޭފުޅުން ތިއްބަވާނީ އެ ރަށު ފަޅުތެރޭ އުޅަނދުތަކުގައެވެ. އެއީ ކޮވިޑްގެ ބަލިމަޑުކަމާ ހެދި އަޅާފައިވާ ރައްކާތެރިކަމުގެ ފިޔަވަޅުތަކާ ހެދި، ރަށްރަށަށް އަރައި ފޭބުމަށް ހުރި ހުރަސްތަކާ ގުޅިގެންނެވެ. މިޖަލްސާގައި ބައިވެރިވެވުމަށް ބުރާސްފަތި ދުވަހު ފުރި އުޅަނދުތަކުގައި 120 މެމްބަރުން ބައިވެރިވިކަމަށް އެމްޑީޕީން ބުނެއެވެ. މިޖަލްސާގައި ރައީސް ނަޝީދުގެ އިތުރުން ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުވެސް ބައިވެރިވެވަޑައިގަންނަވާނެއެވެ.
