އެމްޑީޕީ މިހާރު އޮތީ އާ ރޫހެއްގައި، އެކުގައި އަދި ވަރަށް ގިނަ މަސައްކަތްކުރަން އެބަ ހުރި - ރައީސް ޞާލިހު
2 އޯގަސްޓު 2025 | ހޮނިހިރު 04:42ރައްޔިތުންގެ މަޖިލީހުގެ މެމްބަރުންނާއި ކުރީގެ މެމްބަރުން ވެސް ވަނީ ކުރިއަށް އޮތް އިންތިޚާބުތަކަށް ވަރުގަދަ އަށް ތައްޔާރުވާން ޖެހޭ ކަމަށް ފާހަގަކުރައްވާފަ
ރީގެ ރައީސް އިބްރާހިމް މުހައްމަދު ޞާލިހު އެމްޑީޕީގެ ރަންރީނދޫ އިވެންޓަށް ފަހު ރާއްޖެއެމްވީ އަށް ދެއްވި ބަސްތީގަތުމުގެ ތެރެއިން - 01.07.25
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) މިހާރު އޮތީ އާ ރޫހެއްގައި ކަމަށާއި ގައުމަށް ދިމާވެފައިވާ ކަންތައްތަކަށް ހައްލު ހޯދުމަށްޓަކައި، އެންމެން އެކީގައި އަދި ވަރަށް ގިނަ މަސައްކަތްތަކެއް ކުރަން އެބަ ހުރި ކަމަށް ކުރީގެ ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
އެމަނިކުފާނު އެފަދައިން ވިދާޅުވީ ހުކުުރު ދުވަހު ބޭއްވި އެމްޑީޕީގެ ރަންރީނދޫ އިވެންޓަށް ފަހު ރާއްޖެއެމްވީ އަށް ދެއްވި ބަސްތީގަތުމެއްގައެވެ.
އެމްޑީޕީ އަކީ އަބަދުވެސް ކަންތައްތަކުގައި އިސްވެ ހަރަކާތްތެރިވާ ޕާޓީ އެއް ކަމަށް އެ މަނިކުފާނު ވިދާޅުވިއެވެ. މިއަދު އަނެއްކާވެސް ގައުމުގައި ރަނގަޅުކުރަން ހުރި ކަންކަން ހުރިކަން ފެނިގެން ޕާޓީން ނިކުންނަ މަންޒަރު ފެންނަ ކަމަށް އެ މަނިކުފާނު ވިދާޅުވިއެވެ. އެ މަނިކުފާނު ވަނީ ރާއްޖޭގެ މިވަގުތުގެ ހާލަތު ރަނގަޅު ނޫންކަން އާއްމުންނަށް ވެސް ވިސްނޭ ކަމަށެވެ. އެ މަނިކުފާނު ވަނީ ސަރުކާރުގެ ސިޔާސަތުތައް ދޯހަޅިވުމާއި އާއްމުންނާއި މެދު ނުވިސްނާ، އާއްމުންނަށް ނޭދެވޭ އަސަރުތައް އަންނަ ގޮތަށް ނިންމުންތައް ނިންމާތީ އެކަމަށް ފާޑު ވިދާޅުވެފައެވެ/
ފެނިގެން ދަނީ އާއްމު މެމްބަރުން ރާއްޖޭގެ ހާލަތު ވިސްނިގެން އާ ރޫހަކާއި އާ އަޒުމަކާއި އެކު ނުކުންނަ މަންޒަރު. އަނެއްކާވެސް އާ ރޫހަކާއި އެކީ ނުކުމެ މިކަމަށް ހައްލު ހޯދަން އެކުގައި މަސައްކަތްކުރުން އޮތީ. ސަރުކާރުގެ ސިޔާސަތުތަކާއި ގުޅިގެން ދިމާވާ ގިނަ މައްސަލަތަކެއް އެބަހުރި. މިކަންކަމުން ސަލާމަތްވެވޭނީ އެންމެން އެކުގައި މަސައްކަތްކޮށްގެން.ކުރީގެ ރައީސް އިބްރާހިމް މުހައްމަދު ޞާލިހު
ރައީސް ޞާލިހުގެ އިތުރުން އެމްޑީޕީގެ ޗެއަރޕަރސަން ފައްޔާޒް އިސްމާއިލް ވެސް ވަނީ މިއީ އެކުގައި މަސައްކަތްކުރަންވީ ވަގުތެއް ކަމަށް ވިދާޅުވެފައެވެ. މި ވަގުތު އެންމެ ބޮޑު ފޯކަސް އަކަށް ވާނީ އެމްޑީޕީގެ ބްރޭންޑް އިތުރަށް ވަރުގަދަކުރުން ކަމަށް ފައްޔާޒް ވަނީ ވިދާޅުވެފައެވެ.
މީގެ އިތުރުން ރައްޔިތުންގެ މަޖިލީހުގެ މެމްބަރުންނާއި ކުރީގެ މެމްބަރުން ވެސް ވަނީ ޕާޓީގެ އެންމެން އެކުގައި މަސައްކަތްކޮށްގެން ކުރިއަށް އޮތް އިންތިޚާބުތަކަށް ވަރުގަދަ އަށް ތައްޔާރުވާން ޖެހޭ ކަމަށް ފާހަގަކުރައްވާފައެވެ.
