ލާމަރުކަޒީ ނިޒާމަކީ އެމްޑީޕީގެ ހާއްޔެއް: ރައީސް ނަޝީދު
ނަޝީދު ވިދާޅުވީ އެމްޑީޕީން ލާމަރުކަޒީ ނިޒާމެއް ގާއިމު ކުރީ ރައްޔިތުންނާއި ގުޅިގެން ރައްޔިތުންނާއި ގާތުން މަސައްކަތް ކުރެވޭނެ ގޮތެއް ހޯދުމަށް ކަމަށް
ރައީސް މުހައްމަދު ނަޝީދު
ލާމަރުކަޒީ ނިޒާމަކީ އެމްޑީޕީން ހެދި ހާއްޔެއް ކަމަށާއި، އެއަށް ބިސް އަޅާނީ ވެސް އެމްޑީޕީން ކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ލާމަރުކަޒީ ނިޒާމަކީ ރާއްޖޭގެ ތަރައްގީގެ ހާލިކަމަށް ސިފަކުރައްވަމުން ނަޝީދު ވިދާޅުވީ، ހާލި ހެދުމަށް ބޭނުން ކޮންމެ ފަތެއް، ކޮންމެ ނަރެއް އެއްކުރީ ހަމަ އެމްޑީޕީން ކަމަށެވެ. އަދި އިދިކޮޅު ޕީޕީއެމް އަކީ ކޮވެއްޔެއް ކަމަށް ސިފަކުރައްވަމުން ނަޝިދު ވިދާޅުވީ، ކޮވެއްޔަކީ އަބަދުވެސް ކާޅު ހާއްޔަށް ބިސްއަޅާ އެއްޗެއް ކަމަށެވެ.
ޕީޕީއެމްއަށް ފާޑު ވިދާޅުވަމުން، ނަޝީދު ވިދާޅުވީ އެމްޑީޕީގެ ލާމަރުކަޒީ ހާއްޔަށް ޕީޕީއެމަށް ބިސް ނޭޅޭނެ ކަމަށެވެ. އެއާއެކު، ކޮވެލީގެ ޒާތަށް ޕީޕީއެމުން ކަންކަން ކުރަން ނޫޅުމަށް ނަޝީދު ގޮވާލެއްވިއެވެ. އަދި ލާމަރުކަޒީ ނިޒާމަކީ، އުފާވެރި މިނިވަން ދިވެހިރާއްޖެއެއް ހޯދުމަށް އެމްޑީޕީން ހެދި ނިޒާމެއް ކަމަށް ނަޝީދު ވިދާޅުވިއެވެ.
މީގެ އިތުރުން، ޑިމޮކްރެޓިކް އުސޫލެއް ފެށިގެން އަންނަނީ ރައްޔިތުންގެ ކިބައިން ކަން ފާހަގަ ކުރައްވާ ނަޝިދު ވިދާޅުވީ، އެމްޑިޕީން ލާމަރުކަޒީ ނިޒާމެއް ގާއިމު ކުރީ ރައްޔިތުންނާއި ގުޅިގެން ރައްޔިތުންނާއި ގާތުން މަސައްކަތް ކުރެވޭނެ ގޮތެއް ހޯދުމަށް ކަމަށެވެ.
ނަޝީދުގެ ވާހަކަފުޅުގައި، ދިވެހި ރައްޔިތުންނަށް އިޖުތިމާއީ ރައްކާތެރިކަން ފޯރުކޮށްދިނީ އެމްޑިޕީން ކަން ފާހަގަކުރެއްވިއެވެ. އަދި އެމްޑީޕީން ރައްޔިތުންނަށް ފަހިކޮށްދިނީ، އަދަށްވުރެ ރަނގަޅު މާދަމާއަކަށް އުންމީދު ކުރުމަށް ކަމަށް ނަޝީދު ވިދާޅުވިއެވެ.
