ވެންޓިލޭޓަރ މައްސަލައާ ގުޅުން ނެތް، ޝަައްކު އުފެދޭ ފައިސާގެ މުއާމަލާތްތަކެއް ފާހަގަ ކުރެވުނު - އޭސީސީ
ޝައްކު އުފެދޭ ފައިސާގެ މުއާމަލާތްތައް އޭސީސީން އަދި ތަހުގީގުކުރާނެ
ޖުޑިޝަރީ ކޮމިޓީއަށް އޭސީސީ ހާޒިރުކުރުން
ވެންޓިލޭޓަރ މައްސަލައާ ގުޅުން ނެތް އެހެންނަމަވެސް ޝަައްކު އުފެދޭ ފައިސާގެ މުއާމަލާތްތަކެއް ފާހަގަ ކުރެވުނުކަމަށް އޭސީސީން ބުނެފިއެވެ.
ޖުޑިޝަރީ ކޮމިޓީއަށް އޭސީސީ ހާޒިރުކޮށް ކޮމެޓީގެ މެމްބަރުން ކުރި ސުވާލުތަކަށް ޖަވާބު ދެއްވަމުން އޭސީސީގެ އިންވެސްޓިގޭޝަން އޮފިސަރ މާޖިދު ހަސަން ވިދާޅުވީ، ވެންޓިލޭޓަރު މައްސަލާގެ ތަހުގީގު ކުރިއަށް ގެންދިޔައިރު ޝައްކު އުފެދޭ ފައިސާގެ މުއާމަލާތްތަކެއް ފާހަގަކުރެވުނު ކަމަށާއި، އެކަން އޭސީސީން އަދި ތަހުގީގުކުރާނެ ކަމަށެވެ. އެހެންނަމަވެސް އެއީ ވެންޓިލޭޓަރު މައްސަލައާ ގުޅުންހުރި މުއާމަލާތްތަކެއް ނޫން ކަމަށްވެސް ވިދާޅުވިއެވެ.
ކޮމެޓީގެ މެމްބަރުން ކުރެއްވި ސުވާލުތަކަށް ޖަވާބު ދެއްވަމުން އޭސީސީން ބުނެފައިވަނީ، ފައިސާ ދަތުރުކުރި ގޮތް ހޯދުމަށް 31 މީހެއްގެ ބޭންކް ސްޓޭޓްމެންޓް ނަގާފައިވާ ކަމަށާއި، އެހެން ނަމަވެސް އޭގެ އެއްވެސް ސްޓޭޓްމެންޓަކުން އެ މައްސަލައާ ގުޅުންހުރި މުއާމަލާތެއް ފާހަގަ ވެފައިނުވާ ކަމަށެވެ. ދުބާއީގެ އެގްޒެކިއުޓަރ ޖެނެރަލް ޓްރޭޑިންގ ކުންފުންޏަށް ފައިސާ ދިޔަކަން ތަހުގީގަށް ސާފުވާކަމަށާއި، އޭގެ ފަހުން އެފައިސާ އެހެން އެއްވެސް ފަރާތަކަށް ދިޔަކަން ފާހަގަވެފައި ނުވާކަމަށްވެސް އޭސީސީން ބުނެއެވެ. ފައިސާ ޓްރޭސްކުރަން ފުލުހުންނާއެކުވެސް މަސައްކަތްކޮށްފައިވާކަމަށް އޭސީސީން ބުންޏެވެ.
އޭސީސީގެ ތަހުގީގަށް ލިބިފައިވަނީ ދުބާއީ ކުންފުނިން ސޮއިކޮށްފައި އޮތް އެއްބަސްވުމެއްތޯ، ކޮމެޓީގެ މެމްބަރު ހަސަން ލަތީފު ސުވާލު ކުރެއްވުމުން އޭސީސީން ބުނީ، ތަހުގީގަށް އެއްބަސްވުމުގެ އެކި ވާރޝަންތައް ލިބިފައިވާ ކަމަށާއި، އޭސީސީއަށް ލިބިފައިވާ އެއްބަސްވުމުގައިވެސް ދުބާއީ ކުންފުނީގެ ނަން އޮތްތަނުގައި ސޮއި ކޮށްފައި ނުވާކަމަށެވެ. އެހެންނަމަވެސް އެއްބަސްވުމުގެ ހުރިހާ ސޮފްހާއެއްގައި ސޮއިކޮށްފައިވާ ކަމަށެވެ.
ވެންޓިލޭޓަރ ގަންނަން ކުރި މުއާމާލާތުގައި ޕާފޯމެންސް ގެރެންޓީއެއް ބަހައްޓާފައިނުވާކަން ތަހުގީގަށް އެނގެން އޮތްކަމަށާއި، ޕާފޯމެންސް ގެރެންޓީއެއް ބަހައްޓަން އޭޖީ ލަފާ ދެއްވާފައިވާކަންވެސް ސާފުކޮށް އެނގެން އޮތް ކަމަށް އޭސީސީގެ މެމްބަރު އާއިޝަތު އަބްދުﷲ ވިދާޅުވިއެވެ. އަދި ޕާފޯމެންސް ގެރެންޓީއެއް ނުބަހައްޓާނަމަ ފިނޭންސްގެ ހުއްދައެއް ހޯދަންޖެހޭކަމަށް މާލިއްޔަތު ގާނޫނުގައި އޮތްއިރު އެ ހުއްދަވެސް ހޯދާފައިނުވާކަން ތަހުގީގަށް އެނގޭކަމަށް އާއިޝަތު ވިދާޅުވިއެވެ.
މި މައްސަލައާ ގުޅިގެން ފޯން ރެކޯޑްތަކެއް ހޯދުމަށް ކްރިމިނަލް ކޯޓުގައި އަމުރަކަށް އެދުނު ކަމަށާއި، އެ އަމުރު ކްރިމިނަލް ކޯޓުން ނުދެއްވާކަމަށް އޭސީސީގެ ރައީސާ މަރްޔަމް ޝިއުނާ ވިދާޅުވިއެވެ. ޝިއުނާ ވިދާޅުވީ، އެކަމާ ގުޅުންހުރި އިތުރު ތަފްސީލް ކޮމިޓީގެ ސިއްރު ބައްދަލުވުމުގައި ދެއްވާނެ ކަމަށެވެ.
ޕީޖީން ވެންޓިލޭޓަރު މައްސަލާގައި ދައުވާ ނުކުރުމަށް ނިންމި ނިންމުމާ ގުޅިގެން ޝިއުނާ ވިދާޅުވީ، ތަހުގީގު ފުރިހަމަ ނުވާކަމަށް ޕީޖީ ވިދާޅުވި ނަމަވެސް އިތުރަށް ފުރިހަމަ ކުރަން ޖެހެނީ ކޮން ކަމެއްކަން ފާހަގަ ކޮށްފައިނުވާ ކަމަށެވެ.
މައްސަލާގައި އޭސީސީން އެދުނީ، އޭރުގެ ހެލްތު މިނިސްޓަރު އަބްދުﷲ އަމީނާއި އެ މިނިސްޓްރީގެ 11 މުވައްޒަފެއްގެ މައްޗަށް ދައުވާ އުފުލުމަށެވެ. އެ މީހުންގެ ދައުވާ ކުރެވޭ މިންވަރަށް ހެކި ނެތްކަމަށް ބުނެ އެންމެ ފުރަތަމަވެސް ޕީޖީން މައްސަލަ އަނބުރާ ފޮނުވާލިއިރު މައްސަލަ ރިވިއުކޮށްދިނުމަށް އޭސީސީން އެދުނު ނަމަވެސް ދައުވާއެއް ސާބިތުކުރެވޭ މިންވަރަށް އުންސުރުތައް ނެތްކަމަށްބުނެ މައްސަލަ އަނެއްކާވެސް ވަނީ އޭސީސީއަށް އަނބުރާ ފޮނުވާފަ އެވެ.
ތިންވަނަ ފަހަރަށް އޭސީސީން މައްސަލަ ރިވިއު ކުރަން ހުށަހެޅީ އާ ހެކިތަކެއް ނެތިއެވެ. ނަމަވެސް ޕީޖީން ބުނީ ފުލުހުންގެ އެހީތެރިކަން ހޯދުމަށް އޭސީސީއަށް އަންގައި ދެން ހިންގާ ތަހުގީގަށްފަހު، މައްސަލަ އަލުން ޕީޖީން ރިވިއު ކުރާނީ އަލަށް ހޯދޭ ހެކިތަކުގެ މައްޗަށް ކަމަށެވެ.
ދުބާއީގެ އެގްޒެކިއުޓާސްއާ 30.91 މިލިއަން ރުފިޔާ ހަވާލުކުރީ 75 ވެންޓިލޭޓަރު ހޯދުމަށެވެ. މީގެތެރެއިން ރާއްޖެއަށް ފޮނުވީ 15 ވެންޓިލޭޓަރެވެ. އެ ކުންފުނިން ވެންޓިލޭޓަރުތައް ފޮނުވުމަށް 34 މިލިއަން ރުފިޔާގެ ބިޑެއް ހުށަހެޅުމުން މާލިއްޔަތު ގާވައިދާ ހިލާފަށް އެއްބަސްވުމުގައި ސޮއިނުކޮށް 30.91 މިލިއަން ރުފިޔާ، އެ ކުންފުންޏަށް ދޫކުރި އެވެ. އެ ކުންފުންޏަށް އެ މަސައްކަތް ހަވާލުކޮށްފައިވަނީ ޑަބްލިއުއެޗްއޯގެ ލަފާގެ މަތިން ކަމަށް ހެލްތު މިނިސްޓްރީން ބުނެފައިވާއިރު އެފަދަ ލަފާއެއް ދީފައިނުވާނެކަމަށް ޑަބްލިއުއެޗްއޯއިން ވަނީ ބުނެފަ އެވެ.
