ކައުންސިލް ގޮނޑިދޭށޭ ބުނާއިރު ޕީޕީއެމް ލަދުގަންނަން ޖެހޭނެ - އިލްޔާސް
ގޮނޑިމޭޒު ދަށާއި މުށުތެރެއަށް ބާރުތައް ލައިގެން އުޅުނު ބަޔަކަށް ކައުންސިލް ހިންގަން ނޭގޭނެ
ހުޅުދޫ ދާއިރާގެ މެމްބަރު އިލްޔާސް ލަބީބު
ކައުންސިލްތަކުގެ ބާރު ކަނޑުވާލަން މަސައްކަތްކުރި ބަޔަކު ކައުންސިލްގެ ގޮނޑި ހޯދަން މަސައްކަތް ކުރާއިރު ލަދުގަންނަން ޖެހޭނެ ކަމަށް ހުޅުދޫ ދާއިރާގެ މެމްބަރ އިލްޔާސް ލަބީބް ވިދާޅުވެއްޖެއެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ވާހަކަ ދައްކަވަމުން އިލްޔާސް ވިދާޅުވީ، ރައީސް ޔާމީންގެ ސަރުކާރުގައި ކައުންސިލްތައް ބަންދުކޮށް ތަޅު އަޅުވައިގެން، ކައުންސިލްތަަކަށް ފައިސާ ނުދީ ހުރިހާ ކަމެއް ހިފަހައްޓާފައި އޮތް ކަމަށެވެ. ކައުންސިލްތަކަށް އޭރު އޮތް ހަމައެކަނި މަސައްކަތަކީ ސަހަރާތަކުގެ ވަށާފާރު ރޭނުން ކަމަށެވެ.
މާލެ ސިޓީ ކައުންސިލްގެ ބާރުތައްވެސް މިނިސްޓްރީގެ ދަށަށް ބަދަލުކޮށް، ސިޓީ ކައުންސިލްގެ މުދާތަކާއި، މުވައްޒަފުންނާއި ގެންގޮސް މިނިސްޓްރީއަށް ވެއްދި މީހަކު މާލެ ރައްޔިތުން ގާތު މޭޔަރު ކަަމަށް ވޯޓު ދޭށޭ ބުނަން ލަދުގަންނަން ޖެހޭނެ ކަމަށް އިލްޔާސް ވިދާޅުވިއެވެ. ގޮނޑި މޭޒު ދަށާާއި މުށުތެރެއަށް ބާރުތައް ލައިގެން އުޅުނު ބަޔަކަށް ކައުންސިލް ހިންގަން ނޭގޭނެ ކަމަށާއި، ކައުންސިލަށް ނުކުންނަން ޖެހޭނީ އެކަމުގެ ބާރުވެރިކާމާއި، އެކަމުން ރައްޔިތުންނަށް ޚިދުމަތްދޭން އެނގޭ ބަޔަކު ކަމަށް އިލްޔާސް ވިދާޅުވިއެވެ.
މޭޔަރަކަށް އަންނަ މީހަކީ ރައީސުލްޖުމްހޫރިއްޔާ ކައިރިއަށް ޖަލުގައި އޮތް މީހަކު މިނިވަންކުރަން ދާން ހޮވާ މީހެއް ނޫން ކަމަށާއި، އެއީ ރައްޔިތުންނަށް ޚިދުމަތްކޮށްދޭން ހޮވާ މީހެއް ކަމަށް އިލްޔާސް ވިދާޅުވިއެވެ.
މާލޭއަށް ގެންނަންޖެހ ތަރައްގީގެ ވިސްނުންހުރީ ހަމައެކަނި އެމްޑީޕީގައި ކަމަށް އިލްޔާސް ވިދާޅުވިއެވެ. އެހެންކަމުން މިދިޔަ 7 އަހަރު މުޅި މާލެއާއި މުޅި ރާއްޖޭގެ ލާމަރުކަޒީ ނިޒާމް ހަލާކުކޮށްލި ބަޔަކަށް އެކަން ކުރަން އެގޭނެ ކަމަށް ގަބޫލް ނުކުރައްވާ ކަމަށް ވެސް ވިދާޅުވިއެވެ.
