"އަވައްޓެރި ފުލުހުންގެ ޚިދުމަތުގެ އެންމެ ބޮޑު އަސާސަކީ މުޖުތަމައު އެކަތިގަނޑަކަށް ހެދުން"
5 އެޕްރީލު 2021 | ހޯމަ 07:57ކުށެއް ކުށަކަށް ވުމުގެ ކުރިން ކުށުގެ އަސްލު ދެނެގަނެ ނައްތާލުމަށް މަސައްކަތް ކުރަންޖެހޭ
ހޯމް މިނިސްޓަރ ޢިމްރާން އަބްދުالله
އަވައްޓެރި ފުލުހުންގެ ޚިދުމަތުގެ އެންމެ ބޮޑު އަސާސަކީ މުޖުތަމައު އެކަތިގަނޑެއްގެ ގޮތުގައި މަސައްކަތްކުރުން ކަމަށް ހޯމް މިނިސްޓަރ އިމްރާން އަބްދުالله ވިދާޅުވެއްޖެއެވެ.
އެމަނިކުފާން މިހެން ވިދާޅުވީ އަރިއަތޮޅު އުތުރުބުރީގައި އަވައްޓެރި ފުލުހުންގެ ޚިދުމަތް ފެށުމަށް މަތިވެރީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. މިނިސްޓަރ ވިދާޅުވީ މި ޚިދުމަތުގެ ބޭނުމަކީ ފުލުހުންނާއެކުގައި މުޖުތަމައުގެ ހުރިހާ ފަންތިއެއްގެ މީހުން މަސައްކަތްކުރާނެ ނިޒާމެއް އެކުލެވިގެން ދިއުން ކަމަށެވެ. ކުށެއް ހިނގުމުގެ ކުރިން ނުވަތަ ކުށެއް ކުށަކަށް ވުމުގެ ކުރިން ކުށުގެ އަސްލު ދެނެގަނެ, އެ ނައްތާލުމަށްޓަކައި މަސައްކަތް ކުރުމަކީ މި ނިޒާމުގެ ބޭނުން ކަމަށް މިނިސްޓަރ ވިދާޅުވިއެވެ. އެދިމާއަށް ކުރެވޭ ދަތުރުގައި ކައުންސިލާއި, ސްކޫލާއި, ހެލްތް ސެންޓަރާއި, ރަށުގެ އެހެން މުއައްސަސާތަކާއި ފުލުހުން ގުޅިގެން ކުރެވޭ މަސައްކަތުން ރައްކާތެރިކަމާއި, ސަލާމަތަކީ އެންމެން އެކުގައި ގުޅިގެން ކުރާކަމެއްކަން ކަށަވަރުވެގެންދާނެކަން މިނިސްޓަރ ފާހަގަ ކުރެއްވިއެވެ. ރަށުގެ އަމާންކަމާއި ރައްކާތެރިކަން ކަށަވަރުވާ މިންވަރަކީ ރަށުގެ ފާގަތިކަމާއި, އިގްތިސާދަށްވެސް ލިބިގެންދާނެ ކުރިއެރުމެއްކަން މިނިސްޓަރ ފާހަގަކުރެއްވިއެވެ.
މިއަދު ދުނިޔެއަށް އައިސްފައިވާ ބަދަލުތަކާއެކު, ބަވަނަވެފައިވާ ދުނިޔޭގައި ދަތުރުކުރަމުންދާއިރު އެކި ދިމަދިމާއިން އަންނަ ކަޅުވިލާތަކުގެ ހިތި ވާރޭގެ އަސަރު އަޅުގަނޑުމެންނަށްވެސް އެކިގޮތްގޮތަށް ފޯރާކަން ފާހަގަކުރައްވައި މިނިސްޓަރ ވިދާޅުވީ މީގެ ސާޅީހަކަށް އަހަރު ކުރިން ކުދި ރަށްރަށުގައި ނުދަންނަ މަސްތުވާތަކެތީގެ ބާވަތްތައް ފެތުރި ނުރަނގަޅު އަސަރުކޮށްފައިވާކަމަށެވެ. ކުދި ކުދި ވައްކަމާއި, މާރާމާރީއާއި އެނޫންވެސް, ކުށްތައް ފެށިގެން އައިސް ފުލުހުންގެ ފަރާތުން ދެވޭ ޚިދުމަތް އާއުސްމިނަކަށް ދަތުރުކުރަން ޖެހިފައިވާކަމަށް މިނިސްޓަރ ވިދާޅުވިއެވެ.
އަވައްޓެރި ފުލުހުންގެ ޚިދުމަތް މިއަދު އަރިއަތޮޅު އުތުރުބުރީގައި ފެށި, އެ ޚިދުމަތް ތައާރަފްކުރެވި, މުޅި ކޮމިއުނިޓީއާއެކުގައި ޚިދުމަތް ދެވެން ފެށުމުން އެއީ ހުރިހާ މައްސަލަތަކަށް ބޮޑު ފަރުވާއެއް ގެނެސްދޭނެ އުޖާލާ އަލިކަމަކަށް މަގުދައްކައިދޭނެ ގޮތެއްކަންވެސް މިނިސްޓަރ ފާހަގަކުރެއްވިއެވެ.
