ސިވިލް ކޯޓުގެ ގާޒީ ރިޒްމީނާގެ ސުލޫކީ މައްސަލައެއް ޖޭއެސްސީން ތަހުޤީޤު ކުރަނީ
މި މައްސަލަ ތަހުޤީޤު ކުރުމަށް ޖޭއެސްސީން ނިންމީ 2021 ވަނަ އަހަރުގެ މާރޗް މަހުގެ 17 ވަނަ ދުވަހު
ޖުޑީޝަލް ސަރވިސް ކޮމިޝަން (ޖޭއެސްސީ)- ޖޭއެސްސީއަށް އާންމުންގެ އިތުބާރު ބޮޑުވެފައިވާކަމަށް ގިނަ ބަޔަކު ބުނޭ، އެގޮތުން ހުށައެޅޭ މައްސަލަތައްވެސް ގިނަ
ސިވިލް ކޯޓުގެ ގާޒީ ރިޒްމީނާ އިދްރީސްގެ ސުލޫކީ މައްސަލައެއް ޖުޑީޝަލް ސަރވިސް ކޮމިޝަން (ޖޭއެސްސީން) ތަހުޤީޤު ކުރަން ފަށައިފިއެވެ.
ޖޭއެސްސީން ބުނީ، ގާޒީ ރިޒްމީނާގެ ސުލޫކީ މައްސަލައެއް ތަހުޤީޤު ކުރުމަށް ޖޭއެސްސީން ނިންމީ 2021 ވަނަ އަހަރުގެ މާރޗް މަހުގެ 17 ވަނަ ދުވަހު ކޮމިޝަނުން ބޭއްވި ޖަލްސާއެއްގައި ކަމަށެވެ. އެގޮތުން މިއީ މައްސަަލައެއްގައި ދައުވާ ކުރާ ފަރާތް ތަމްސީލު ކުރުމަށް ކޯޓަށް ވަކީލަކު ހާޒިރުވެ ހުރިއިރު، ވަކީލުގެ ޢައިރު ހާޒިރުގައި ޝަރީއަތް ކުރިއަށް ގެންގޮސްފައިވާކަމަށް ބުނެ ހުށައަޅާފައިވާ މައްސަލައެއްކަން ޖޭއެސްސީން ފާހަގަކޮށްފައިވެއެވެ.
ޖޭއެސްސީން ދަނީ ފަނޑިޔާރުންނާއި ގުޅިގެން ހުށައެޅޭ މައްސަލަތައް ހާމަކަން ބޮޑު ގޮތެއްގައި ބަލައި، އެކަމުގެ މައުލޫމާތުތައް ރައްޔިތުންނަށްވެސް ހިއްސާކޮށްދެމުންނެވެ. އެގޮތުން ހުށައެޅޭ މައްސަލަތަކާއި ގުޅިގެން ތަހުޤީޤު ކޮމިޓީ އެކުލަވާލުމާއި، މައްސަލަ ތަހުޤީޤު ކުރަން ނިންމުމުގެ އިތުރުން، މައްސަލަތަކާއި ގުޅިގެން އަޅަމުންދާ ފިޔަވަޅުތައްވެސް ޖޭއެސްސީން ދަނީ ހާމަ ކުރަމުންނެވެ. ޖޭއެސްސީން ފާއިތުވި 2020 ވަނަ އަހަރު ޖޭއެސްސީއަށް ހުށަހެޅުނު ގިނަ މައްސަލަތަކުގެ ތެރެއިން 54 މައްސަލައެއް ބަލާ ނިންމާފައިވާއިރު، މިދިޔަ އަހަރު ކޮމިޝަނުން ބަލަމުން ދިޔަ 114 މައްސަލައެއްގައި 44 ތަހުގީގު ކޮމިޓީއަކުން މަސައްކަތް ކޮށްފައިވާކަމަށް ޖޭއެސްސީން މައުލޫމާތު ދެއެވެ. އެގޮތުން 9 ފަނޑިޔާރަކު ވަކި ކުރުމަށާއި، 2 ފަނޑިޔާރަކު ސަސްޕެންޑް ކުރަން އަދި 4 ފަނޑިޔާރަކަށް ނަސޭހަތް ދޭން ކޮމިޝަނުން ނިންމާފައިވާ ކަމަށް ޖޭއެސްސީގެ ތަފާސްހިސާބުތަކުން ދައްކައެވެ.
އޭގެ އިތުރުން، ޖޭއެސްސީއަށް އާންމު ރައްޔިތުންގެ އިތުބާރު ބޮޑުވެ، އާންމުންގެ ފަރާތުން ހުށައަޅާ މައްސަލަތައްވެސް ވަނީ އިތުރުވެފައެވެ. އެގޮތުން 2018 ވަނަ އަހަރު ފަނޑިޔާރުންނާ ގުޅިގެން ޖޭއެސްސީއަށް ހުށައަޅާފައި ވަނީ އެންމެ 9 ޝަކުވާއެވެ. އެހެން ނަމަވެސް، ޝަކުވާ ބެލުމުގެ ނިޒާމު ހަރުދަނާވެގެން ދިއުމުގެ ނަތީޖާއެއްގެ ގޮތުން 2019 ވަނަ އަހަރު އެ އަދަދު 114 އަށް އިތުރުވެގެން ދިޔަކަމަށް ބަންޑާރަ ނައިބް އިބްރާޙިމް ރިއްފަތުވެސް ވިދާޅުވެފައިވެއެވެ.
