ކައިވެންޏަކާއި ގުޅިގެން ގާޒީ ޙަސަން ސައީދުގެ ސުލޫކީ މައްސަލައެއް ޖޭއެސްސީން ބަލަނީ
4 އެޕްރީލު 2021 | އާދީއްތަ 07:43މައްސަލަ ތަހުޤީޤު ކުރުމަށް ޖޭއެސްސީން ނިންމީ ނިމިދިޔަ މާރޗް މަހުގެ 17 ވަނަ ދުވަހު
ކްރިމިނަލް ކޯޓުގެ މިހާރުގެ ގާޒީ ޙަސަން ސައީދު- ގާޒީ ޙަސަން ސައީދު ވަނީ މީގެ ކުރިން ފެމިލީ ކޯޓުގެ އިސްގާޒީކަންވެސް ކުރައްވާފައި
ކްރިމިނަލް ކޯޓުގެ މިހާރުގެ ގާޒީ ޙަސަން ސައީދުގެ ސުލޫކީ މައްސަލައެއް ޖުޑީޝަލް ސަރވިސް ކޮމިޝަން (ޖޭއެސްސީން) ބަލަން ފަށައިފިއެވެ.
ޖޭއެސްސީން އާދިއްތަ ދުވަހު ނެރުނު ބަޔާނެއްގައި ބުނީ، މި މައްސަލައަކީ ގާޒީ ޙަސަން ސައީދު ފެމިލީ ކޯޓުގެ އިސްގާޒީ ކަމުގައި ހުންނެވި ދުވަސްވަރުގައި ހިނގި މައްސަލައެއް ކަމަށެވެ. އެގޮތުން މިއީ 2018 ވަނަ އަހަރު ގާޒީ ޙަސަން ސައީދު އިސްގާޒީ ކަމުގައި ހުންނެވިއިރު ފެމިލީ ކޯޓުގެ ފަރާތުން އެ ކޯޓުގެ މުވައްޒަފުން ރާއްޖެއިން ބޭރަށް ފޮނުވައިގެން ކައިވެންޏެއް ކޮށްދިން މައްސަލައެއްކަމަށް ޖޭއެސްސީން ބުނެއެވެ.
މި މައްސަލަ ތަހުޤީޤު ކުރުމަށް ޖޭއެސްސީން ނިންމީ ނިމިދިޔަ މާރޗް މަހުގެ 17 ވަނަ ދުވަހު ބޭއްވި ޖަލްސާއެއްގައި ކަމަށްވެސް ބަޔާނުގައި ބުނެފައިވެއެވެ.
ގާޒީ ޙަސަން ސައީދުގެ އިތުރު މައްސަލަތަކެއްވެސް ޖޭއެސްސީން ދަނީ ތަހުޤީޤު ކުރަމުންނެވެ. އެގޮތުން ކުރީގެ ޓޫރިޒަމް މިނިސްޓަރ ޢަލީ ވަޙީދުގެ ޕާސްޕޯޓް ދޫކުރުމަށް ކްރިމިނަލް ކޯޓުން ނެރުއްވި އަމުރާއި ގުޅިގެންވެސް ގާޒީ ޙަސަން ސައީދުގެ މައްސަލައެއް ޖޭއެސްސީން ދަނީ ބަލަމުންނެވެ. މި މައްސަލަ ޖޭއެސްސީއަށް ހުށައަޅާފައިވަނީ ޕްރޮސެކިއުޓަރ ޖެނެރަލް (ޕީޖީ) އޮފީހުންނެވެ.
ޖޭއެސްސީން މީގެ ކުރިންވެސް ގާޒީ ޙަސަން ސައީދުގެ މައްސަލަތަކެއް ބަލާފައިވެއެވެ. އޭރު ޙަސަން ސައީދު ފެމިލީ ކޯޓުގެ އިސްގާޒީ ކަމުގައި ހުންނަވަނިކޮށް، ޖޭއެސްސީން ބެލި މައްސަލަތައް ސާބިތުވެ ކޮމިޝަނުން އޭރު ނިންމީ ގާޒީއަށް ނަސޭޙަތް ދިނުމަށްފަހު، އޭރު ހުރި ކޯޓު ނޫން އެހެން ކޯޓަކަށް ބަދަލު ކުރުމަށެވެ. އެގޮތުން އޭރު ގާޒީ ޙަސަން ސައީދު ބަދަލު ކުރެއްވީ ކްރިމިނަލް ކޯޓަށެވެ.
އޭގެ ކުރިން 2016 ވަނަ އަހަރު ޖޭއެސްސީން ގާޒީ ހަސަން ސައީދާ ގުޅޭ ގޮތުން ބެލި މައްސަލައެއްގައި އޭނާ ސަސްޕެންޑްވެސް ކުރިއެވެ.
