ބުރާސްފަތި ދުވަހުގެ ކުރިން ހުރިހާ ރަށަކަށް ވޯޓު ފޮށިތައް ފޮނުވާނެ: ޝަރީފް
މިހާރު ވަނީ ވޯޓު ކަރުދާސް ޗާޕުކޮށް ނިމިފައި
އިލެކްޝަންސް ކޮމިޝަންގެ ރައީސް އަހުމަދު ޝަރީފް
އޭޕްރީލް މަހުގެ 10 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް ބޭނުންވާ ވޯޓު ކަރުދާހާއި ވޯޓު ފޮށިތައް އަދި އެހެނިހެން ތަކެތި މިހަފްތާގެ ބުރާސްފަތި ދުވަހުގެ ކުރިން ރަށްތަކަށް ފޮނުވާ ނިންމާނެކަމަށް އިލެކްޝަންސް ކޮމިޝަން(އީސީ)ގެ ރައީސް އަހުމަދު ޝަރީފް ވިދާޅުވެއްޖެއެވެ.
އިންތިޚާބާއި ގުޅިގެން އީސީން ވަމުން އަންނަ ތައްޔާރީތަކާއި ގުޅޭގޮތުން "ރާއްޖެއެމްވީ"އަށް ދެއްވި އިންޓަރވިިއު އެއްގައި ޝަރީފް ވިދާޅުވީ މިހާރު ވޯޓު ކަރުދާސް ޗާޕްކޮށް ނިންމާފައިވާ ކަމަށެވެ. އަދި މިހާރު ކުރަމުންދަނީ އެކި ރަށްރަށަށް ފޮނުވަން ޖެހޭ ވޯޓު ކަރުދާސްތައް ވަކިކުރުމުގެ މަސައްކަތް ކަމަށެވެ. އަދި ވޯޓު ފޮށިތައް ތައްޔާރުކުރުމާއި އިދާރީ ގޮތުން ކުރަންޖެހޭ އެހެން ކަންކަން ކުރަމުންދާ ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ވޯޓު ފޮށިތައް ބަހައްޓަންވީ ތަންތަން ކަނޑައެޅި ހުރިހާ ކަމެއްވެސް ދަނީ ޝެޑިޔުލް ކުރެވިފައިވާ ގޮތަށްކަމަށެވެ.
މިފަހަރުގެ އިންތިޚާބުގައި 735 ވޯޓު ފޮއްޓެއް ބަހައްޓާނެއެވެ. ކޮވިޑާއި ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އެކުލަވާލި ގައިޑްލައިންގެ ސަބަބުން ކުރިން ކަނޑައެޅި އަދަދަށްވުރެ އިތުރަށް ވޯޓު ފޮށި ބަހައްޓާނެއެވެ.
ޝަރީފް ވިދާޅުވީ އެއްވެސް ފޮއްޓަކަށް 600ށް ވުރެ ގިނަ މީހުން ވޯޓު ނުލާނެކަމަށެވެ. އަދި ވޯޓުލާ މަރުކަޒުތަކުގައި އަމަލުކުރަމުންދާނީ އެޗްޕީއޭއިން އެކުލަވާލާފައިވާ ގައިޑްލައިނާ އެއްގޮތަށް ކަމަށް ޝަރީފް ވިދާޅުވިއެވެ.
މޮނިޓަރިންގ ގައި ރަށެއް އޮތް އޮތްނަމަވެސް އެރަށްރަށުގައިވެސް ވޯޓުލުމުގެ ކަންކަން ކުރިޔަށްދާނެއެވެ. ޝަރީފް ވިދާޅުވީ މޮނިޓަރިންގ ގައި އޮންނަ ރަށްތަކަށް ތަކެތި ބޭލުމުން އެރަށެއްގައި ތިބޭ އީސީގެ އޮފިޝަލުން އެތަކެއްޗާ ހަވާލުވާނެކަމަށެވެ.
މި އިންތިޚާބުގައި ވޯޓު ދިނުމުގެ ހައްގު 273،128 ( ދެލައްކަ ހަތްދިހަ ތިންހާސް އެއްސަތޭކަ އަށާވީސް) މީހުންނަށް ލިބެއެވެ.
