ހުޅުމީދޫ މިފްކޯ ބަނދަރު ތަރައްޤީ ކުރުމުން މަސްވެރިންގެ ބޮޑެތި ކަންބޮޑުވުންތަކަށް ޙައްލު އަންނާނެ: ފައުޒީ

ހުޅުމީދޫ މިފްކޯ ބަނދަރު ތަރައްޤީ ކުރުމުން މަސްވެރިންގެ ބޮޑެތި ކަންބޮޑުވުންތަކަށް ޙައްލު އަންނާނެކަމަށް މިފްކޯގެ މެނޭޖިންގ ޑިރެކްޓަރ އިސްމާއިލް ފައުޒީ ވިދާޅުވެއްޖެއެވެ.

ފައުޒީ އެހެން ވިދާޅުވީ، ހުޅުމީދޫ މިފްކޯ ބަނދަރު ތަރައްޤީ ކުރުމުގެ ފުރަތަމަ ފިޔަވަހީގެ އަމަލީ މަސައްކަތް ފެށުމަށް ހޮނިހިރު ދުވަހު ސ. ހުޅުމީދޫގައި ބޭއްވި ރަސްމިއްޔާތެއްގައި ވާހަކަ ދައްކަވަމުންނެވެ. މި ރަސްމިއްޔާތުގައި ބައިވެރިވެވަޑައިގެން ވާހަކަ ދައްކަވަމުން ފައުޒީ ވިދާޅުވީ، އައްޑޫ ހުޅުމީދޫ ކޮމްޕްލެކްސް ވުޖޫދަށް އައުމުން މަސައްކަތްތަކަށް އިތުރު ފުރިހަމަ ކަމެއް އައި ކަމަށާއި، ނަމަވެސް އޮޕަރޭޝަންތައް އެންމެ ފުރިހަމައަށް މެނޭޖް ނުކުރެވޭ ކަމަށެވެ. އަދި މިހާރު ހުރި ބޯޓު ފަހަރު ކައިރިކޮށްގެން މަސް ލޯޑު ކުރުމުގެ އިންތިޒާމު އަދި ނެތްކަން ފާހަގަ ކުރައްވައި ފައުޒީ ވިދާޅުވީ، ހުޅުމީދޫ މިފްކޯ ބަނދަރާއެކު އެފަދަ މައްސަލަތަކަށް ޙައްލު ލިބިގެންދާނެ ކަމަށެވެ.

މި ރަސްމިއްޔާތުގައި ހުޅުދޫ ދާއިރާގެ މަޖިލިސް މެމްބަރު އިލްޔާސް ލަބީބާއި، މީދޫ ދާއިރާގެ މަޖިލީސް މެމްބަރު ރޮޒޭނާ އާދަމްއާއި، މިފްކޯގެ މެނޭޖިންގ ޑިރެކްޓަރ އިސްމާއިލް ފައުޒީއާއި ސީއީއޯ އާދަމް އާޒިމްއާއި އެމްޓީސީސީގެ އިސްވެރިން ބައިވެރިވެ ވަޑައިގެންނެވިއެވެ. އޭގެ އިތުރުން، އެ ދާއިރާގެ މަޖިލިސް މެމްބަރުންނާއި، ޕްލޭނިންގ މިނިސްޓްރީގެ ސްޓޭޓް މިނިސްޓަރ ޝިފާޒު އަލީ އާއި އައްޑޫ ސިޓީގެ މޭޔަރއާއި، އެމްޕީއެލްގެ ސީއީއޯވެސް މި ރަސްމިއްޔާތުގައި ބައިވެރިވެ ވަޑައިގެންނެވިއެވެ.

މި މަސައްކަތުގެ ދަށުން، 471،380 ކިއުބިކް މީޓަރުގެ ސަރަޙައްދެއްގެ ބަނދަރު ފުންކުރުމާއި، 1788 ކިއުބިކް މީޓަރުގެ ސަރަހައްދެއްގެ ބިން ހިއްކުމާއި، 97 މީޓަރުގެ ސަރަހައްދެއްގައި އެއްގަމު ތޮށި ލުމުގެ މަސައްކަތް ހިމެނެއެވެ. އެމްޓީސީސީން މައުލޫމާތުދޭ ގޮތުގައި މިނިސްޓްރީ އޮފް ނޭޝަނަލް ޕްލޭނިންގ ހައުސިންގ، އެންޑް އިންފްރާސްޓްރަކްޗަރ އިން ހަވާލުކުރި މި މަސައްކަތަކީ 68.80 މިލިއަން ރުފިޔާގެ މަސައްކަތެކެވެ.